5
Israel runakuna, wanupakuy cantutanö kanan cantaptï shumaq wiyayämay.2 Piwanpis manarä kakushqa jipashnö kuyayllapä kaykarpis nacionniki ushakanqami.
Pasaypa ushakätsishqa kaptinmi pipis shäritsiyta kamäpakunqatsu.
3 Tayta Diosmi nin:
“Israel nacioncho juk markapita juk waranqa (1,000) runakuna pelyaman aywar juk pachakllanami (100) kutiyämunqa.
Juk markapita juk pachak runakuna pelyaman aywar chunkallanami kutiyämunqa”.
4 Tayta Diosmi nin:
“Israel runakuna, noqata ashiyämay.
Ashimarqa kawayankimi.
5 Bet-elman ama aywayaytsu.
Gilgalman ni Beersebamanpis ama chäyaytsu.
Gilgal markacho taq runakunataqa juk nacionmanmi prësu apakuyanqa.
Bet-el markapis pasaypa ushakätsishqami kanqa”.
6 Tayta Diosta ashirqa kawayankimi.
Mana cäsukuyaptikiqa imaykatapis nina ushanqannömi llapaykikunata ushakätsiyäshunki.
Tsayöraqa Bet-elcho adorayanqayki ïdulukuna manami mayqanpis salvayäshunkitsu.
7 Qamkunaqa muchuqkuna quejakuyanqantapis manami arreglayankitsu.
Jutsayuqpa janan shärirmi jutsaynaq kaqpa contran shäriykäyanki.
8 Tayta Diosmi kamashqa Pléyades ninqan qoyllurkunata y Orión ninqan qoyllurkunatapis.
Paymi paqastapis junaqman tikratsin.
Junaqtapis paqasmanmi tikratsin.
Lamarpita pukutayta shäritsirmi tamyatsimun.
Jutinpis Yahwehmi kaykan.
9 Kallpasapa runatapis ushakätsinmi.
Altu murällayuq markakunatapis ushakätsinmi.
10 Qamkunaqa demanduta alli arreglaq kaqta chikiyankimi.
Rasun kaqllata willakuq testïgukunatapis qarquyankimi.
11 Impuestukunata muchuqkunata pägatsirmi mikuyänanpä qoriyanqantapis qechuykäyanki.
Tsaynö kayanqaykipitami llaqllashqa rumiwan kuyayllapä wayikunata shäritsirpis täyankitsu.
Üvata plantarpis vïnuta manami upuyankitsu.
12 Musyämi jutsata rurar mana cäsukayämanqaykitapis.
Qamkunaqa chaskipakurmi jutsayuqkunapa janan shäriykäyanki y jutsaynaq kaqta tikrapaykäyanki.
13 Tikrapäyänaykipä kanqanta musyarmi tantiyaq runakunapis upällakuyan.
Mana alli kayaptikimi pïmaypis mantsa mantsallana kawayan.
14 Kuyay munaypä kawayänaykipä llutankunata rurayaytsu, tsaypa trokinqa alli kaqkunallata rurayay.
Tsaymi llapanta mandaq Tayta Dios yarpäyanqaykinölla yanapayäshunki.
15 Llutan ruraykunata kacharir alli kaqkunallata rurayay.
Despächuykikunachöpis shumaq arreglayay.
Tsaynö rurayaptikiqa Josépita aywaraqkuna llapayki mana ushakäyänaykipä capazchi llapanta mandaq Tayta Dios kuyapaykuyäshunkimanpis.
16 Munayyuq y llapanta mandaq Tayta Diosmi nin:
“Pläzakunachöpis waqakuyllami kanqa.
Cällikunachöpis pasaypa llakikurmi qayaräyanqa.
Chakracho aruqkunatapis waqashiyänanpämi qayayanqa.
Waqaqkunawanmi juntu waqayanqa.
17 Shamur castigaptïmi llapan üva chakrakunachöpis Israel runakuna waqayanqa”.
Tayta Diosmi tsaynö nin.
18 ¡Ay, imanörä kayanki Tayta Dios juzganan junaq chämuptin!
¿Imanirtä munaykäyanki tsay junaq chämunanta?
Tsay junaq alli kananpä kanqanta yarpäyaptikipis pasaypa mantsariypämi kanqa.
19 Tsay junaq kanqa leonpita qeshpir ösuwan tinkuqnömi.
Tsaynöpis kanqa wayinman yaykur pirqaman tukmakuptin makinta culebra kaniqnömi.
20 Tsaymi Tayta Dios juzganan junaq shamuptin kushikuyänanpa trokin pasaypa llakikuyanqa.
Tsakaychönö kar manami ima ruraytapis kamäpakuyanqatsu.
21 “Noqapä fiestata rurayanqaykitapis pasaypami melanä.
Qorikar janan shonqulla adorayämanqaykitapis pasaypami ajayä.
22 Rupatsina sacrificiukunata y tsaki mikuykunata noqapä rupatsiyaptikipis manami chaskishätsu.
Wera torïtuta alli päsakuy sacrificiupä rupatsiptikipis manami chaskishätsu.†
23 Arpata tukar kushishqa cantayanqaykitapis manami wiyayta munätsu.
24 Noqaqa munä runa mayikikunawan alli kawar munanqänö kawayänaykitami.
Mayu mana ushakaypa aywanqannö runa mayikikunawan imaypis alli kawayay.†
25 “Israel runakuna, chusku chunka (40) wata tsunyaq jirkapa purir manami noqapätsu uywakunata y tsaki mikuykunata rupatsiyarqayki.
26 Tsaypa trokinqa rey kanqanta yarparmi Sicut jutiyuq ïduluta aparishqa puritsiyarqayki.
Tsaynöllami qoyllur niraq Quiún ïduluta aparishqa puritsiyarqayki.
Tsaykunataqa kikikikunami rurayarqayki diosnikikuna kayänanpä.
27 Tsaymi Damascupita mas washaqninman qarqatsiyäshayki”.†
Tsaynö rurayäshunaykipäqa Tayta Diosmi nin.
Paypa jutinqa Llapanta Mandaq Tayta Diosmia.