Israel y Judá nacionkuna castigashqa kayänanpä ninqan
6
¡Allaw Sióncho añaw täkuq autoridäkuna!¡Allaw Samaria jirkancho kushishqa täkuq yachaq runakuna!
Qamkuna alli tantiyatsikuq kayanqaykita yarparmi Israel mayikikuna tantiyatsiyänaykipä shayämun.
2 Calne markaman aywar paykunata ima päsanqantapis tantiyakuyay.
Hamat markamanpis aywar paykunata ima päsanqantapis tantiyakuyay.
Rikayay Filistea nacioncho kaykaq Gat markata ima päsanqantapis.
Tsay markakunacho taq runakunapita ¿mas alli pelyaq kayanqaykitaku yarpaykäyanki?
Markaykikunapis tsay markakunapita ¿mas jatun y mas atskaq runakuna kayanqantaku yarpaykäyanki?
3 Qamkunaqa yarpaykäyanki ima desgraciapis mana päsayäshunaykipä kanqantami.
Tsaynö yarparpis llutankunata rurarmi desgraciaman ishkiykäyanki.
4 Qamkunaqa marfilpita rurashqa kuyayllapä catrichörämi jitaräyankipis.
Üshakunata y wera torïtukunata mikurmi jamaräyankipis.
5 Arpakunatapis waqay waqaytarä tukarmi cantukunatapis mushuqkunallata inventaykäyanki.
Instrumentukunatapis Davidnörämi tukuy niraqta ruraykäyanki.†
6 Jatusaq väsukunawanrämi vïnutapis upuykäyanki.
Allinnin perfümikunatarämi wiñakuykäyanki.
Qamkunataqa manami imapis qokuyäshunkitsu Israel nación ushakätsishqa kananpä kaptinpis.
7 Tsaynö kaykaqtami qamkunatarä puntata jäpa markaman prësu apayäshunki.
Apayäshuptikimi fiesta ruraypis kanqanatsu.
8 Llapanta mandaq Tayta Diosmi kikinpa jutincho jurar nin:
“Jacobpita aywaraq runakuna runa tukuyanqan pasaypami ajanätsiman.
Palaciunkunata rikaytapis manami munätsu.
Tsaymi markanta y llapan imaykankunatapis contrankunapa makinman churashä.
9 Tsaynöpami juk wayicho chunka runakuna kawaykar quëdaqkunapis wanuyanqa.
10 Wanuq runakunapa ayanta qoriskir rupatsinanpämi mayqan castallanpis aywanqa.
Wayiman chaykur ruricho pillatapis rikarmi tapur ninqa: ‘¿Pillaqa qamwan tsaycho kaykanräku?’
Tsaymi ruripita nimunqa: ‘Manami pipis kaycho kantsu’.
Mastapis nimunqa: ‘Upälla kay. Paqtä Tayta Diospa jutinta joqariykushwan.
Jutinta joqarishqaqa maspis castigamäshunmi.
11 Tayta Diosmi kamakätsinqa jatusaq wayitapis taksha wayitapis juchutsiyänanpä’ ”.
12 ¿Pillaqa cawallun muntakurkur qaqapa cörrinmantsurä?
¿Pillaqa törukunawan lamarcho yapyanmantsurä?
Tsay yarpaykuna upa yarpay kanqannömi qamkunapis mana tantiyakuq runakuna kaykäyanki.
¿Imanirtä mana allikunata rurar Tayta Diospa leyninkunata venënumannö tikraykätsiyanki?
Runakunata kushitsiyänaykipa trokin ¿imanirtä mana allikunata rurar llakikuyman churaykäyanki?
13 Qamkunaqa manakaqkunapita alabakurmi nikäyanki:
“Kikintsikpa kallpantsikwanmi munayyuq kaykantsik”.
14 Llapanta mandaq Tayta Diosmi nin:
“Israel runakuna, shumaq wiyayämay.
Noqami juk nación runakunata pushamushä Hamat partipa lindërunpita hasta Arabá pampayaq munaynincho tsararäyäshunaykipä”.