Revelacioncho chukllushkunata Amós rikanqan
7
Reypa cosëchanta qorir ushaskir kikinkunapa cosëchankunata manarä qoriyta qallaykuyaptinmi Tayta Dios revelamarnin rikatsimarqan kamarinqan tsaytsika chukllushkunata kay patsaman kachamunanpäna kanqanta.† 2 Tsay chukllushkuna llapan qewakunata ushaykäyaqta rikatsimaptinmi rugakur nirqä: “Tayta Dios, perdonaykayällämay. Mana perdonayämaptikiqa Jacobpita aywaraqkuna wallkaqlla kaqpis llapäkunachi ushakäyäshä”.3 Tsaymi Tayta Dios kuyapämar nimarqan: “Rugakaykämaptikiqa chukllushkunata manami kachamushätsu”.
Revelacioncho ninata Amós rikanqan
4 Tsaypitanami revelacioncho Tayta Dios rikatsimarqan Israel nacionta ninawan castiganqanta. Tsay ninaqa patsa rurinpita pashtamuq yakuta tsakitsirmi entëru Israel nacionta usharqan.†
5 Tsayta rikarmi rugakur nirqä: “Tayta Dios, ama tsaynö ushakaykatsiyällamaytsu. Mana perdonayämaptikiqa Jacobpita aywaraqkuna wallkaqlla kaqpis llapäkunachi ushakäyäshä”.
6 Tsaymi Tayta Dios kuyapämar nimarqan: “Rugakamanqaykipita manami tsaytapis rurashätsu”.
Revelacioncho plomädata Amós rikanqan
7 Tsaypitanami revelacioncho Tayta Diosta rikarqä pirqa murälla ñöpancho plomädan aptashqa ichiraykaqta. 8 Tsaymi tapumar nimarqan: “Amós, ¿imatatä rikaykanki?” nir.
Nimaptinmi nirqä: “Taytay, albañilpa plomädan aptashqa ichiraykaqtami rikaykä”.
Tsaymi nimarqan: “Plomädawan murälla derëchu kanqanta o wiksu kanqanta musyayanqaykinömi Israel runakuna imanö kawayanqantapis musyashä. Jutsata rurar kawayanqanpita mananami perdonashänatsu.
9 “Isaacpita aywaraqkunaa ruratsiyanqan altarkunatami ushakätsishä.
Ïdulukunata adorakuyänan wayikunatapis llapantami juchutsishä.
Espädäta aptakurkurmi aywashä rey Jeroboampita aywaraqkunata ushakätsinäpä”.
Sacerdöti Amasías profëta Amóspa contran shärinqan
10 Amós tsaynö willakuptinmi Bet-elcho kaq sacerdöti Amasías Israel runakunapa mandaqnin rey Jeroboamman willakatsir nirqan: “Qampa contrayki parlarmi Amós puriykan. Israel runakuna pay ninqanta cäsupäyaptinqa nacionnintsik ushakanqami. 11 Payqa puriykan kaynö nirmi: ‘Jeroboamqa espädawan wanutsishqami kanqa. Tsaynöpis Israel runakunata juk nacionmanmi prësu apakuyanqa’ ”.
12 Tsaypitanami Amósta sacerdöti Amasías nirqan: “¡Profëta, kaypita ras aywakuy! Willakunqaykipita gänapakuyta munarqa Judá nacionman kutiykur tsaycho willakuy. 13 Kay Bet-elcho Israel nacionpa templun kaptinmi Diosta adorananpä reypis shamun. Tsaynö kaykaptinqa kaycho ama willakuytsu”.
14 Tsaynö niptinmi Amós nirqan: “Noqaqa manami profëtatsu ni profëtapa tsurintsu kä, tsaypa trokinqa üshakunata mitsikur y munti hïguskunata qorillarmi kawä. 15 Üshakunata mitsikur puriykaptïmi Tayta Dios nimarqan: ‘Israel runakunaman ayway willakuynïta willakunaykipä’. 16 Kanan shumaq wiyamay Tayta Dios qampä ninqanta.
“Qamqa kaynömi nikanki: ‘Israel runakunapa contran ama willakuytsu.
Tsaynöpis Isaacpita aywaraqkunapä imatapis ama parlakuytsu’.
17 “Tsaymi Tayta Dios nin:
‘Qampa warmikimi kay markacho prostitüta tikranqa.
Warmi tsurikikunata y ollqu tsurikikunatami espädawan wanutsiyanqa.
Chakraykikunatapis suertita jitarninmi rakipänakuyanqa.
Kikikinami wanunki Diosta mana cäsukuqkuna täyanqan nacioncho.
Israel mayikikunatami karu nacionman prësu apakuyanqa’ ”.