Revelacioncho poqushqa frütakunata Amós rikanqan
8
Tsaypitanami poqushqa frütakuna canastacho kaykaqta revelacioncho Tayta Dios rikatsimarqan. 2 Nirkurmi tapumarqan: “Amós, ¿imatatä rikaykanki?” nir.Tsaymi nirqä: “Taytay, juk canastacho poqushqa frütakuna wiñaraykaqtami rikaykä”.
Tayta Diosnami nimarqan: “Runakuna mikuyänanpä poqushqa frütakuna listu kanqannömi Israel runakunapis listu kaykäyan castigashqa kayänanpä. Tsaymi paykunata perdonashänatsu.
3 “Castigar ushakätsiptïmi Israel runakuna maytsaychöpis wanushqa jitaräyanqa. Tsaymi palaciuchöpis kushishqa cantayänanpa trokin wanushkunapä llakikurnin waqayanqa. Tsaynö ushakäyaptinmi llapanpis tsunyaranqa”. Tayta Diosmi tsaynö nin.
4 Kay ninqäta shumaq wiyayämay.
Qamkunaqa mana pägaypami ministiqkunata aruykätsiyanki.
Imaynaqkunatapis pasaypami ñakaykätsiyanki.
5 Qamkunaqa nikäyanki:
“¡Imayrä llullu killa fiesta ushakanqa trïguntsikta rantikunantsikpä!
¡Imayrä jamay junaqpis ushaykunqa tsaki mikuynintsikta rantikunantsikpä!
Negociuntsikta rantikurqa pësuwan y tupuwan engañaypami gänashun”.†
6 Qamkunaqa qellaypä ayrajashqa karmi trïgupa gransantapis rantikuykäyanki.
Jaqa tukuyanqanta pägayta mana kamäpakuq imaynaqkunatapis wätaynikikuna kayänanpämi rantiykäyanki.
Paykunata mana kuyapaypami rantiykäyanki ichiklla qellaywan karpis o juk par llanqillawan karpis.
7 Tsaymi Jacobpita aywaraq runakunata kuyaq Tayta Dios jurar nin:
“Jutsata rurayanqaykita manami imaypis qonqäshätsu.
8 Jutsaykikunapita ¿manatsurä kay patsapis tsuktsukyanqa?
Nilo mayu bunyaypa bunyar aywanqannömi kay patsapis kuyur tsuktsukyanqa.
Mana kuyapaypa castigaptïmi entëru Israelcho taq runakunapis waqayanqa”.
9 Tayta Diosmi nin:
“Castiganä junaqmi pullan junaq kaykaptin patsa tsakänanpä kamakätsishä.
Pullan junaq alli atsikyaraykaptinmi entëru mundupis tsakay rikakunqa.†
10 Fiestata rurayänaykipa trokinqa imaypis waqallarmi kayanki.
Cantarpis waqay waqayllatami cantayanki.
Qachqa latsapaykikuna jatishqallami puriyanki.
Llakikuypitami umaykikunatapis qalla putuypa rutukuyanki.
Jukllaylla tsuriki wanuykuptin waqayanqaykinömi pasaypa llakikur waqayanki.
Ima rurayanqaykipis manami shonquykipänötsu kanqa”.
11 Tayta Diosmi nin:
“Chaykämunnami entëru nacioncho muchuywan castiganäpä junaqkuna.
Manami mallaqaytsu ni yakunaytsu tsay muchuy kanqa, tsaypa trokinqa willakuynïta wiyayta munaymi.
12 Willakuynïta wiyayta munarmi runakuna maytsaypapis puriyanqa.
Lamar kuchunpita jukaq kuchunyaq aywarpis willakuynïta manami tariyanqatsu.
Norti kaqläpita rupay yarqamunan kaqläyaq aywarpis manami tariyanqatsu.
13 Tsay witsanmi willakuynïta mana wiyar kuyayllapä jipashkunapis y geniuyuq chölukunapis yakunaypita wanunaqnö kayanqa.
14 Tsaynöpis Samariacho kaq ïdulukunata adoraqkuna, Dancho kaykaq ïdulupa jutinta joqariqkuna y Beersebacho kaykaq ïdulukunapa jutinta joqariqkuna llapanpis wanurmi ushakäyanqa”.