Tayta Dios juzgaptin pipis mana qeshpinanpä ninqan
9
Tayta Diostami revelacioncho rikarqä altarpa ñöpancho ichiykur nimuqta:“Numbralkunapis tsuktsukyanqanyaq templupa columnankunata takay.
Tsaynöpami runakuna jananman templu juchumunqa.
Tsaypita qeshpiqkunata espädawan wanutsiptïmi ni jukllayllapis qeshpinqatsu.
2 Patsa rurinman pakakuptinpis jipimushämi.
Altu ciëluman witsaptinpis urätsimushämi.†
3 Carmelo jirkaman pakakuptinpis ashi ashiykurmi tsarimushä.
Lamar rurinman pakakuptinpis mantsaypä culebrawanmi kanitsishä.
4 Juklä markaman contrankuna prësu apakuyaptinpis espädawanmi wanutsishä.
Israel runakunataqa maycho rikarpis yanapanäpa trokinmi castigashä”.
5 Llapanta mandaq Tayta Dios kay patsata yataykuptinmi tsullukäkunqa.
Tsaymi entëru Israel nacioncho taq runakuna waqayanqa.
Nilo mayu bunyaypa bunyar aywanqannömi patsapis janaman y uraman kuyur tsuktsukyanqa.
6 Tayta Diosqa ciëluchömi wayinta rurakushqa.
Patsa janancho azulyaraykaqtapis paymi kamashqa.
Paymi lamarpita pukutaytapis shäritsir patsa jananman tamyatsimun.
Jutinpis Yahwehmi kaykan.
7 Tayta Diosmi nin:
“Israel runakuna, qamkunata kuyanqänöllami Etiopía runakunatapis kuyä.
Qamkunata Egiptupita jipiyämunqänöllami filisteo runakunatapis Caftor islapita jipimurqä.
Aram runakunatapis Kir partipitami jipimurqä.
8 “Noqa rikaykämi Israel nacioncho taqkuna jutsata pasaypa ruraykäyanqanta.
Tsaynö kayanqanpitami tsay nacionta ushakätsishä.
Ushakätsirpis Jacobpita aywaraqkunata wakintaqa manami ushakätsishätsu”.
Tayta Diosmi tsaynö nin.
9 “Trïguta zarandayanqannömi Israel runakunatapis llapan nación runakunatawan zarandashä.
Rurupa kaqkuna yarquptinpis chushu kaqkuna mana yarquyanqannö manami jukllayllapis mana cäsukamaqkuna castïgupita qeshpinqatsu.
10 Mana cäsukamaq kaqkunataqa llapantapis espädawanmi wanutsishä.
‘Manami imapis päsamäshuntsu’ niqkunaqa llapanmi ushakäyanqa”.
Israel nación yapay kananpä Tayta Dios ninqan
11 “Tsay witsanmi Davidpa wayin juchushqa kaptinpis yapay shäritsishä.a
Unay kanqannö yapay kananpämi rachinqankunata killpashä y juchushqa kaqkunata allitsashä.
12 Tsaynömi rurashä kawaykar quëdaq edomita runakunapis Israel runakunapa munaynincho kayänanpä.
Tsaynöpis jutïta joqariq kaq wakin nacionkunapis munayninchömi kayanqa”.
Tayta Diosmi tsaynö nin.
Paymi tsaykunata ruranqa.†
13 Tayta Diosmi nin:
“Shamuq watakunacho trïgu qoriyta manarä ushayaptinmi muruy tiempuna kanqa.
Üva jaruyta manarä ushayaptinmi üva plantapakuy tiempuna kanqa.
Jirkakunapapis y jirkankunapapis mayunörämi vïnu atska aywanqa.
14 Karu nacioncho kayanqanpitami kuyanqä Israel runakunata kutitsimushä.
Kutiskamurmi juchushqa markakunata allitsaskir tsaycho täyanqa.
Yapay plantayanqan üvapitami vïnutapis upuyanqa.
Murupakuyanqan alli wayuptinmi mikuyninkunapis tsaytsika kanqa.
15 Kikinkunapa nacionninman kutitsiptïmi imayyaqpis tsaycho täyanqa.
Tsaypitaqa mananami pipis qarqunqanatsu.
Noqa kuyashuqniki Tayta Diosmi tsaynö kananpä nï”.