Moab nación runakunata Tayta Dios juzgananpä ninqan
2
Tayta Diosmi nin:“Moab nacioncho taq runakunapa jutsankunaqa poqushqanami kaykan.†
Paykunaqa Edom nacionpa mandaqnin reypa tullunkunatami uchpayanqanyaq kayayarqan.
Tsaynö rurayanqanpitami mana kuyapaypa castigashä.
2 Tsaymi imaykatapis nina rupar ushanqannö Moab nacionta y Queriotcho palaciukunatapis chipyaq ushakätsishä.
Pelyacho qayararrä cornëtanta tukaykäyaptinmi moabita runakunata soldädukuna wanutsir ushakätsiyanqa.
3 Tsay nacionpa mandaqnin reytapis ushakätsishämi.
Mandashiqninkunatapis wanutsishämi”.
Tayta Diosmi tsaynö nin.
Judá nación runakunata Tayta Dios juzgananpä ninqan
4 Tayta Diosmi nin:
“Judá nacioncho taq runakunapa jutsankunaqa poqushqanami kaykan.
Paykunaqa mandamientükunata y leynïkunata mana cäsukurmi unay castankuna adorayanqan ïdulukunata adoraykäyan.
Tsaynö rurayanqanpitami mana kuyapaypa castigashä.
5 Tsaymi imaykatapis nina rupar ushanqannö Judá nacionta y Jerusaléncho palaciukunatapis chipyaq ushakätsishä”.†
Israel nación runakunata Tayta Dios juzgananpä ninqan
6 Tayta Diosmi nin:
“Israel runakuna, qamkunapapis jutsaykikuna poqushqanami kaykan.
Qamkunaqa jutsaynaq runakunatami rantikuykäyanki.
Llanqipa chaninnölla jaqaykikuna kaykaptinpis muchuqkunatami wätay kayänanpä rantikuykäyanki.
Tsaynö rurayanqaykipitami mana kuyapaypa castigayäshayki.
7 Muchuqkunata y llampu shonqukunatami munayanqaykikunata ruraykätsiyanki.
Juez kaykarpis quejakuyanqantaqa manami arreglaykäyankitsu.
Wakinnikiqa taytaykiwan tsay warmillawanmi kakuykäyanki.
Tsaynö kakur santu jutïta manakaqmanmi churaykäyanki.
8 Latsapata prendakuykur jaqipäshunqayki jananchömi altarkuna ñöpanchöpis punuykäyanki.a
Tsaynöpis manakaqpita multata pägatsiyanqayki qellaywanmi vïnuta rantiskir juk dioskunata adorayanqayki wayikunacho upyaykäyanki.
9 “Qamkunata kuyarmi amorreo runakunata ushakätsishqä.b †
Cedru qerukunanö jatusaq kaykaqta y encina jachakunanö chukru kaykaqtami tsay runakunata ushakätsishqä.
Jachapa wayuynintapis michintapisc illakätsiqnömi illakätsishqä.
10 Amorreo runakuna täyanqanman chäyänaykipä kikïmi Egiptupita qamkunata jipimurqä.
Kikïmi chusku chunka (40) wata tsunyaq jirkakunapa qamkunata pushamurqä amorreo runakuna täyanqan markakunata qamkunata rikatsinäpä.†
11 Tsurikikunapitami wakinta akrashqä profëta kayänanpä.
Wakintanami akrashqä nazareo runa kayänanpä.†
Israel runakuna, ¿manaku tsaynö kananpä kamakätsinqäta tantiyayanki?”
Tayta Diosmi tsaynö nin.
12 “Tsaynö akraykaptïpis qamkunaqa nazareo runakunata mana munaykaptinmi vïnuta uputsiyashqayki.
Tsaynöllami profëtakunatapis michäyashqayki willakuynïta mana willakuyänanpä.
13 Tsaynö kayanqaykipitami pasaypa cargashqa carrëta patsacho imallatapis jarur ushakätsinqannö qamkunatapis ushakätsiyäshayki.
14 Noqapa makïpitaqa mayjina cörrirpis manami qeshpiyankitsu.
Ni kallpasapa karpis washäkuyta manami kamäpakuyankitsu.
Ni mayjina geniuyuq karpis manami salvakuyankitsu.
15 Flëchayta munarpis manami kamäpakuyankitsu.
Mayjina cörrirpis manami qeshpiyta kamäpakuyankitsu.
Cawalluta muntakurkur qeshpirpis manami salvakuyankitsu.
16 Tsay junaqqa mayjina geniuyuq karpis armaykikunata jitariykurmi qeshpir aywakuyanki”.
Tayta Diosmi tsaynö nin.