Amós
1
Kay libruchömi qellqaraykan Amós willakunqan. Payqa Tecoa markacho taq üsha mitsiq runami karqan. Amós willakunqan witsanmi Judá nacioncho Uzías rey kaykarqan† y Israel nacionchönami Joáspa tsurin Jeroboam rey kaykarqan.† Amós willakunqanpita ishkay wata päsaskiptinrämi pasaypa temblor karqan. 2 Willakurmi Amós nirqan:“Tayta Diosmi Sión jirkanpita patsa leonnöpis qayarämun.
Jerusalénpita patsa qayakamunqanmi maqakuynörä wiyakämun.†
Parlamuptinmi jirkacho qewakunapis illaqpita qashrurunqa.
Carmelo jirkacho qewakunapis tsakinqami”.
Siria nación runakunata Tayta Dios juzgananpä ninqan
3 Tayta Diosmi nin:
“Damasco markachoa taq runakunapa jutsankunaqa poqushqanami kaykan.†
Paykunaqa ëracho trïguta trillaqnömi Galaad runakunata ushakätsiyashqa.†
Tsaynö rurayanqanpitami mana kuyapaypa castigashä.
4 Tsaymi imaykatapis nina rupar ushanqannö rey Hazaelpa castankunata y rey Ben-adad shäritsinqan palaciuta ushakätsishä.
5 Damasco markaman yaykuna punkukunatapis llapantami pakir ushakätsishä.
Bicat-avéncho y Bet-edéncho mandaqkunatapis tsaynöllami ushakätsishä.
Tsaypitanami contran runakuna shamur Siria runakunata prësu apayanqa Kir partiman”.†
Tayta Diosmi tsaynö nin.
Filisteo runakunata Tayta Dios juzgananpä ninqan
6 Tayta Diosmi nin:
“Gaza markacho taq runakunapa jutsankunaqa poqushqanami kaykan.
Paykunami juk marka entëruta edomita runakunaman runakunata rantikuyarqan.
Tsaynö rurayanqanpitami mana kuyapaypa castigashä.
7 Tsaymi imaykatapis nina rupar ushanqannö Gaza markapa murällanta y palaciunkunatapis chipyaq ushakätsishä.
8 Asdod markacho y Ascalón markacho reykunatapis ushakätsishämi.
Mana kuyapaypami Ecrón markacho taq runakunatapis ushakätsishä.
Tsaynöpami filisteo runakunab llapanpis wanuyanqa”.†
Tayta Diosmi tsaynö nin.
Tiro runakunata Tayta Dios juzgananpä ninqan
9 Tayta Diosmi nin:
“Tiro markacho taq runakunapa jutsankunaqa poqushqanami kaykan.†
Paykunami castankunawan shumaq kawayänanpä pactuta rurashqa kaykarpis juk marka entëruta edomita runakunaman tsay castan runakunata rantikuyarqan.
Tsaynö rurayanqanpitami mana kuyapaypa castigashä.
10 Tsaymi imaykatapis nina rupar ushanqannö Tiro markapa murällanta y palaciunkunatapis chipyaq ushakätsishä”.
Edomita runakunata Tayta Dios juzgananpä ninqan
11 Tayta Diosmi nin:
“Edom nacioncho taq runakunapa jutsankunaqa poqushqanami kaykan.†
Paykunaqa pasaypa ajarmi castankuna kaykaptin Israel runakunata mana kuyapaypa espädawan wanutsiyarqan.
Tsaynö rurayanqanpitami mana kuyapaypa castigashä.
12 Tsaymi imaykatapis nina rupar ushanqannö Temán markata y Bosracho palaciukunatapis chipyaq ushakätsishä”.
Amón nación runakunata Tayta Dios juzgananpä ninqan
13 Tayta Diosmi nin:
“Amón nacioncho taq runakunapa jutsankunaqa poqushqanami kaykan.†
Paykunaqa chakrankunata qechuyänanpämi Galaadcho taq qeshyaq warmikunata espädawan pachanta qashar wanutsiyarqan.
Tsaynö rurayanqanpitami mana kuyapaypa castigashä.
14 Tsaymi imaykatapis nina rupar ushanqannö Rabá markapa murällanta y palaciunkunatapis chipyaq ushakätsishä.
Pasaypa qayararrä mangäda tamyanörämi tsay markata ushayanqa.
15 Mandaqnin reytapis mandashiqninkunatapis juklä nacionmanmi prësu apakuyanqa”.
Tayta Diosmi tsaynö nin.