Babilonia nación imanö kananpä kanqantapis willakunqan
13
Kaychömi qellqaraykan Amóspa tsurin Isaíasta Tayta Dios revelanqan. Tsay revelacionchömi rikatsirqan shamuq watakunacho Babilonia nación imanö kananpä kanqantapis.†2 “¡Jäkuq jirkaman señalta jawiyay!
¡Atacayänanpä soldädukunata qayayay!
¡Reykuna yaykuyänan punkukunapa yaykuyänanpä sëñasta rurar qemllakuyay!
3 Rabyanätsimaq runakunata castigayänanpämi juk nación runakunata kachashqä.
Paykunata atacayänanpämi ordenashqä.
Tsay runakunaqa pelyay yachaq valienti runakunami kaykäyan.
Paykunami conträkunata vinciptï kushikuyan”.
4 Atska nación runakuna qorikar qayakuyanqanmi jirkakunapita wiyakaykämun.
Llapanta mandaq Tayta Diosmi qoriykan guërraman aywayänanpä kamarikushqa soldädunkunata.
5 Karu nacionpitami shamuykäyan.
Llapan patsapa kuchunpitami shamuykäyan.
Tayta Dios rabyashqa karmi tsay shamuykaq soldädukunawan Babilonia nacionta chipyaq ushakätsinqa.
6 ¡Llapayki waqayay!
Llapanpä munayyuq Tayta Dios castigashunaykipä junaq chaykämunnami.
Castigashurnikimi llapan nacionnikita ushakätsinqa.†
7 Tsay hörami runakunapa rikrankunapis warkukaskinqa.
Llapanmi kallpaynaq rikakuyanqa.
8 Pasaypa mantsariyllawanmi tsuktsukyäyanqa.
Wachay nanaywan warmi ñakaqnömi pasaypa mantsarir qequykachäyanqa.
Jukninpis jukninpis mantsakashqami rikapänakuyanqa.
Pasaypa mantsakaywanmi qaqllankunapis almatakanqarä.
9 Tayta Dios castiganan junaq chaykämunnami.
Tsay junaq pasaypa mantsariypämi kanqa.
Pasaypa rabyar castigarmi kay patsata tsunyaykaqta kachaykunqa.
Llapan jutsa ruraqkunatami ushakätsinqa.
10 Qoyllurkunapis manami atsikyanqanatsu.
Rupaypis yarqaskamullarmi tsakaskinqa.
Killapis mananami atsikyanqanatsu.†
11 Tayta Diosmi nin:
“Maycho täyaptinpis mana alli ruraq runakunata y jutsa ruraq runakunata castigashämi.
Mana respitakuqkunatapis penqakuymanmi churashä.
Runa tukuqkunatapis tsoqpakatsishämi.
12 Castigar ushakätsiptïmi Ofirpita kaq qori wallkalla kanqannö runakunapis wallkaqllana kayanqa.
13 Tsay hörami ciëlupis tsuktsukyanqa.
Kay patsapis juklämanmi witikunqa.
Pasaypa rabyar castiganqä junaqmi tsaynö kanqa.
14 “Tsay junaqmi runakuna mantsakar markankunamanna kutikuyta munayanqa.
Qatikachäyaptin lluytsu qeshpiqnömi qeshpiyanqa.
Mitsiqniynaq üshakuna mantsakar qeshpiqnömi aywakuyanqa.†
15 “Tsaynö kaptinpis tinkuyanqan kaqtaqa pitapis soldädukunami wanutsiyanqa.
Tsariyanqan kaqtaqa pitapis espädawanmi tuksiyanqa.
16 Maman taytan rikaraykäyaptinmi wamrankunatapis tsapir ushayanqa.
Qechurmi wayikunapita imaykankunatapis apakuyanqa.
Warmikunatapis tsariykurmi munayanqanta rurayanqa.
17 “Babilonia runakunata atacayänanpämi Media nación runakunata qayatsimushä.
Mana atacayänanpä qellayta qorita pägayaptinpis tsay runakunaqa manami chaskiyanqatsu.
18 Tsaypa trokinmi atacarnin chölukunatapis flëchawan wanutsiyanqa.
Llullu wamrakunatapis y pishi wamrakunatapis mana kuyapaypami wanutsiyanqa.
19 “Babilonia nacionqa kuyayllapä perlasnörämi wakin nación runakunapä kaykan.
Tsaycho taq caldeo runakunaqaa pasaypa chaniyuq ruminömi kayan.
Tsaynö kaykarpis Tayta Dios ushakätsiptinmi Sodoma y Gomorra markakunanö ushakäyanqa.†
20 Manami imaypis tsaychöqa täyanqanatsu.
Tsaychöqa Arabia runakunapis manami patsakuyanqanatsu ni üshayuqkunapis manami mitsikuyanqanatsu.
21 “Jirkacho taq chucaru uywakuna y avestruzkunallanami tsaycho täyanqa.
Wayikunachöpis tukukunallanami täyanqa.
Munti cabrakunallami tsaycho pañayanqa.
22 Palaciukunachöpis hiena uywakunallanami aullar täyanqa.
Allinnin wayikunachöpis chacalkunallami täyanqa.
Babilonia nación ushakänanpä junaq chaykämunnami.
Wallkallanami pishiykan”.†