Jäpa nacionman prësu aywaqkuna kutiyämunanpä ninqan
14
Jacobpita aywaraqkuna, Tayta Dios kuyapämäshunmi.Israel runakuna, yapay akramarnintsikmi nacionnintsikman qorimäshun.
Jäpa nación runakunapis noqantsikman laqakämurmi täyanqa.
2 Nacionnintsikman kutimunantsikpä maytsay runakunami yanapamäshun.
Prësu apamaqnintsik runakunatapis kikinkunatami prësu tsarirkur munaynintsikcho tsararäshun.
Babilonia nacionpa mandaqnin reypa contran niyanqan
3 Babilonia nacionpa mandaqnin rey ñakatsimanqantsikpita, llakikatsimanqantsikpita y mana jamatsiypa arutsimanqantsikpitami Tayta Dios jamatsimäshun. 4 Tsay junaqmi Babilonia nacionpa mandaqnin reypa contran shärir nishun:
“¡Munayyuq runata rikayay! ¡Allirächi runa tukuyninpis mayparä aywashqa!
5 Mana alli runakunapa munayyuq kayninta Tayta Diosmi manakaqman churashqa.
Mandaq kaynintapis qechushqami.
6 Paykunaqa mana kuyapaypami may markatapis atacar ushakätsiyaq.
May naciontapis munaynincho tsarararmi mana kuyapaypa ñakatsiyaq.
7 “Paykuna ushakäyaptinmi maytsaychöpis kushishqana kawar cantayanpis.
8 Babiloniapa mandaqnin rey ushakanqanpitami ciprespis y Líbanucho kaykaq cedrupis kushikur niyan:
‘Kananqa mutuyämänanpä pitapis manami kachamunkinatsu’.
9 “Babilonia nacionpa mandaqnin rey, wanushqakunapa almankunami rikaq rikaqlla shuyaraykäyäshunki.
Punuyanqanpita rikcharkurmi chaskiyäshunaykipä kamarikuykäyan.
Maytsaycho wanuq reykunapa almankunapis jamaraykäyanqanpitami chaskiyäshunaykipä shärikuykäyan.
10 Paykunaqa llapanmi niyäshunki:
‘Qampäpis wanuy kashqami ¿aw?
Kananqa noqakunanöllanami wanushqayki.
11 Pampaskiyäshuptiki munayyuq kaynikipis ushakashqanami.
Fiestata ruraptiki arpayki waqanqanpis ushakashqanami.
Kaychöqa qopikipis qataykipis kurullami kanqa’.
12 “Waraq lucëru, ¡imanöpatä ciëlupita shushuykamushqayki!†
Qamqa atska nacionkunatami vincirqayki.
Tsaynö kaykaptikipis kananqa kikikitami patsaman jitarpamushqayki.
13 Runa tukurmi shonqullaykicho niq kanki:
‘Ciëluyaqmi chäshä.
Diospa qoyllurninkunapita mas junaqchömi trönü kanqa.
Dioskuna qorikänan norti kaqlä jirkacho jamaykurmi mandashä.
14 Pukutay jananmanmi yarkushä.
Poderyuq Tayta Diosnömi kashä’.
15 “Tsaynö yarpaykarpis wanushqakuna kaykäyanqanmanmi chashqayki.
Patsa rurinpitapis mas rurimanrämi chashqayki.†
16 Wanushqa jitaraykaqta rikashurnikimi mantsakashqa niyanqa:
‘¿Kaychi pïmaytapis tsuktsukyätsiq karqan?
¿Kaychi llapan nacionkunatapis ushakätsiq karqan?
17 ¿Kaychi maymanpis chanqan kaqta tsunyaykaqta jaqiriq, markakunatapis ushakätsiq y prësukunatapis mana kachariq karqan?’
18 “Nacionkunapa mandaqnin reykunaqa llapanpis kuyayllapä sepultürachömi pamparäyan.
19 Qamtami itsanqa tsaynö pampayäshunkitsu, sinöqa qanratanömi jitaskiyäshunki.
Guërracho wanutsishqatanö y soldädukuna jarutakushqa ayatanömi wakin runakunapa ayantawan uchkullaman jitarpuyäshunki.
20 Nacionkunata ushakätsinqaykipita y marka mayikikunata wanutsinqaykipitami wakin reykunatanöqa pampayäshunkitsu.
Mana alli runa kanqaykipitami tsurikikunata ni imapäpis cuentayanqatsu.
21 ¡Qampa tsurikikunata llapanta wanutsiyätsun!
¡Mandaq rey ama katsuntsu!
Rey kayman yaykurqa maytsaychömi markakunata duëñu tukuyanqa”.
22 Llapanta mandaq Tayta Diosmi nin:
“Babilonia markapa contran kikï shärirmi chipyaq illakätsishä.
Manami munayyuqnatsu kanqa.
Babilonia runakunapa wamrankunatapis willkankunatapis chipyaqmi ushakätsishä.
23 Tsay partitaqa erïzukunaa täkunanman y siniga sinigamanmi tikraratsishä.
Pitsaypa pitsarmi Babiloniata pitsashä”.
Llapanta mandaq Tayta Diosmi tsaynö nin.
Asiria nación ushakashqa kananpä ninqan
24 Llapanta mandaq Tayta Diosmi nin:
“Ninqäqa ninqämi kanqa.
Yarpanqänömi llapanpis rurakanqa.
25 Israel nacionman jatikämuq Asiria runakunata chipyaqmi ushakätsishä.†
Jirkakunachöpis lanqurishämi.
Kuyanqä runakunapa matankanman yüguta churapäyanqantapis jitarishämi.
Atska qepita aparitsiyanqantapis jipirishämi.b
26 Maytsaycho kaq nacionkunapämi tsaynö yarpaykä.
Llapan nación runakunata castiganäpämi listu kaykä.
27 Llapanpä munayyuq kaykaptï ¿pirä michämanman?
Ushakätsinäpä aywaptï ¿pirä tsapämanman?”
Filistea nación imanö kananpäpis ninqan
28 Rey Acaz wanunqan watami Isaíasta revelar Tayta Dios nirqan:
29 “Filistea nación runakuna, atacashuqniki Asiria nacionpa mandaqnin rey wanunqanpita ama kushikuyaytsu.†
Paypa tsurinkunapitami mas juk runa rey kanqa.
Tsay reyqa pasaypa venënuyuq culebrapitapis mas peormi kanqa.
30 “Tsaynö kaptinpis muchuqkunataqa alli qewacho üshata mitsiqnömi rikashä.
Imaynaq runakunapis kushishqami kawayanqa.
Filisteo runakunatami itsanqa muchuywan wanutsishä.
Kawaykar quëdaq kaqkunatapis llapantami ushakätsishä.
31 “Filistea markakunapa punkunkuna, ¡waqayay!
Filistea markakuna, ¡mantsarir qayaräyay!
Llapaykikunapis filisteo runakuna, ¡mantsariywan tsuktsukyäyay!
Qoshtatarrämi norti kaqläpita soldädukuna shamuykäyan.
Fïlanpita jukpis mana yarquypami shamuykäyan”.
32 Filisteapita kachamunqan runakunatami nishun:
“Sión jirkantaqa Tayta Diosmi rikaykan.
Tsaymi imaypis ñakarqa kuyanqan runakuna tsayman amparakuyanqa”.