Moab nación imanö kananpäpis ninqan
15
Kaychömi qellqaraykan Moab nación imanö kananpä Tayta Dios revelanqan.†Moab nacioncho kaykaq Ar markataqa juk paqasllachömi illakätsiyanqa.
Moab nacioncho kaykaq Kir markatapis juk tsakayllachömi ushakätsiyanqa.
2 Tsaynö kaptinmi Dibón markacho taq runakuna pasaypa llakikuyanqa.
Templunman y altarkunamanmi aywayanqa pasaypa llakikur waqayänanpä.
Nebo y Medeba markakunatapis ushakätsiyanqami.
Chipyaq ushakaskatsiyaptinmi moabita runakuna pasaypa llakikur waqayanqa.
Tsaynö llakikurmi aqtsantapis shaprantapis rutukuyanqa.
3 Qachqa latsapan jatishqami cällikunapapis puriyanqa.
Wayin janankunachöpisa y pläzankunachöpis llapanmi llakikur waqayanqa.
4 Hesbóncho y Elealicho taqkuna ausiliuta mañakurmi qayaräyanqa.
Qayaräyanqanqa Jahaza markayaqmi wiyakanqa.
Atacayaptinmi moabita soldädukunapis mantsariyanqa.
Mas valienti soldädukunapis pasaypa mantsarirmi tsuktsukyäyanqa.
5 Moabita runakuna tsaynö ñakayänanpä kaptinmi shonqü pasaypa llakinan.
Paykunami Zoaryaq y Eglat-selesiyáyaq qeshpir aywakuyanqa.
Luhitman witsänan cuestapami waqaraykar witsäyanqa.
Horonaimman aywaq nänipa aywarmi pasaypa waqayanqa.
6 Nimrimcho yaku pözukunapis y qewakunapis tsakinqami.
Llapan sheqllimuq jachakunapis wanupanqami.
Manami ima jachakunapis verdiranqanatsu.
7 Tsaymi imayka qoriyanqantapis Sauci Raqraman apayanqa.
8 Tsaycho waqayanqanqa entëru Moab nacionchömi wiyakanqa.
Eglaimyaq y Beer-elimyaqmi wiyakanqa.
9 Atskaq wanuyaptinmi Dimóncho yakukunamanpis yawar tallukanqa.
Leonkunatapis Dimónmanmi Tayta Dios kachamunqa.
Tsay leonkunami Moabpita qeshpiqkunata mikur ushayanqa.