16
Moabita runakunami Judá nacionpa mandaqnin rey yanapananpä rugakur üshakunata apatsiyanqa.Tsunyaq jirkacho kaq Sela markapita patsami Sión jirkanman apatsikuyanqa.
2 Moabpita qeshpiq warmikunami Arnón mayu pläyacho qorikaykur shuyaräyanqa.
Tsay warmikunaqa imapis mantsakätsiptin qeshunpita aywakuq pishqunömi kayanqa.
3 Jerusalén runakunata rugakurmi niyanqa:
“¡Kuyapäyämarnin yanapaykayällämay!
¡Conträkunapita tsapaykayällämay!
¡Qeshpiyämuptï paykunapa makinkunaman ama kutiykatsiyällämaytsu!
4 ¡Qamkuna kaqman amparakayämuptï pakaykayällämay!
¡Ushakätsiyämayta munaqkunapita tsapaykayällämay!”
Moabita runakuna, chikishuqnikikuna imaypis ushakäyanqami.
Ushakätsishuqnikikuna wanuyanqami.
Wanutsishuqnikikuna aywakuyanqami.
5 Davidpita aywaraqmi itsanqa rey kanqa.
Payqa kanqa kuyapäkuqmi.
Payqa kanqa mana chaskipakuq juezmi.
Mana shuyarätsiyllapami pitapis alli arreglanqa.
6 Musyantsikmi moabita runakuna pasaypa runa tukuyanqanta.
Paykunaqa wakinpita masmi munayyuq tukuyan.
Pitapis manami respitayantsu.
Imatapis rasuntanörämi parlayan.
7 Tsaymi moabita runakuna pasaypa waqayanqa.
Kir-haresetcho rurayanqan päsasyuq biscöchukunapis ushakaptinmi pasaypa llakikur waqayanqa.
8 Hesbóncho y Sibmacho kaq üvakuna qarwashtäyanqami.
Nacionkunapa mandaqninkuna atacarmi alli wayuq üvakunata jarutakur ushayanqa.
Jazeryaq y tsunyaq jirkayaqmi tsay üvakuna plantaraykäyan.
Tsaynöllami Kachi Lamar tsimpanchöpis wayuyan.
9 Sibmacho üvakuna ushakaptin Jazercho waqayanqannömi noqapis pasaypa waqashä.
Hesbón y Eleale markakunatapis weqïwanmi qarpashä.
Üva cosëcha witsan cosechayänanpa trokinqa atacaqnin soldädukunawan pelyarmi qayaräyanqa.
10 Tsaymi alli wayuq chakrakunacho kushikuypis kanqanatsu.
Üva chakrakunachöpis manami cantayanqanatsu.
Üva jarukuyänankunachöpis mananami vïnupä üvata jaruyanqanatsu.
Manami kushikur qayaykachäyanqanatsu.
11 Tsaymi Moab nacionpä y Kir-hareset markapä llakikü.
Arpapa cuerdannörämi shonqüpis pasaypa llakikur tiktikyan.
12 Moabita runakuna wallällami altarninkunamanpis ajayäyanqanyaq aywayanqa.
Manakaqllapänami templunmanpis mañakuq aywayanqa.
13 Moab nación tsaynö ushakänanpämi unaypita patsana Tayta Dios nirqan. 14 Kananqa Tayta Diosmi nin: “Kananpita kimsa watatami Moab nación runakuna atska kayanqanpita wallkaqllana kawaykar quëdayanqa. Kimsa wata arunanpä conträtu ruraq runa cada junaqta yuparanqannömi tsay kimsa wata yupashqalla kanqa”.