Damasco marka imanö kananpäpis ninqan
17
Kaychömi qellqaraykan Damasco marka imanö kananpä Tayta Dios revelanqan.†Damasco marka chipyaq ushakarmi raqällana rikakunqa.
2 Aroer particho kaykaq markakunacho manami täyanqanatsu.
Qewallana junta kaptinmi pipis mana qarqushqa uywakuna kayanqa.
3 Efraín runakunaa täyanqancho corralashqa markakunapis manami kanqanatsu.
Damasco markachöpis rey manami kanqanatsu.
Siria nacionchob quëdaq runakunapis Israel nacioncho wallkaqlla kayanqannömi kayanqa.
Llapanta mandaq Tayta Diosmi tsaynö nin.
Israel nación castigashqa kananpä willakunqan
4 Tsay witsanmi Israel nacionpis munayniynaq kanqa.
Uyu runanöllami tsay nación kanqa.
5 Refaim pampacho trïguta segaskiptin raströjullana quëdanqannömi tikranqa.
6 Olïvu jachata tapsir wayuyninta qoriskiyaptin juk ishkayllana yurancho quëdanqannömi quëdanqa.
Mas llimllasapa kaqkunacho kimsa chuskulla quëdanqannömi quëdanqa.
Israel runakunata kuyaq Tayta Diosmi tsaynö nin.
7 Tsay witsanmi kamaqnin Tayta Diosta rugakuyanqa.
Israel runakunapa santu Diosninmanmi yärakuyanqa.
8 Juk dioskunata mañakuyänanpä pirqayanqan altarkunaman manami aywayanqanatsu.
Manami kikinkuna rurayanqan Asera diösamanpis yärakuyanqanatsu
ni altarkunacho diosninkunaman inciensiuwan qoshnitsiyanqanatsu.
9 Tsay witsanqa Israelcho kaykaq corralashqa markakunachöpis manami täyanqanatsu. Heveo runakunata y amorreo runakunata Israel runakuna ushakätsiyanqannö ushakätsiyaptinmi pasaypa raqällana tikranqa.
10 Tsaynö kayanki imaykapitapis salvashuqniki Tayta Diosta qonqaykuyanqaykipitami.
Imapitapis tsapäshuqniki Tayta Diostami qonqaykuyarqayki.
Tsaymi juklä nacionpita apaykatsimur ras poquq mikuykunata muruyaptikipis
11 y muruyanqayki junaqlla jeqaskamur warayllan waytaptinpis ima cosëchapis kanqatsu.
Tsay junaqqa pasaypa ñakar waqayaptikimi shonquykikunapis pasaypa nananqa.
12 Lamar bunyaqnörämi contrantsik nacionkuna ollqüyanqan wiyakaykämun.
Ollqutupar qayaykachäyanqanpis mayu atskayar bunyaypa bunyar aywaqnörämi wiyakaykämun.
13 Tsaynö qayarar shayämuptinpis Tayta Dios ollqutupaykuptinqa karupami qeshpir aywakuyanqa.
Jirkacho oqshata wayra apakunqannö y polvuta shukukuy apakunqannömi aywakuyanqa.
14 Tsay runakunaqa patsa tsakarkuptin pasaypa mantsariypämi kaykäyan.
Patsa waraptinnaqa manami kayannatsu.
Tsaynömi illakäyanqa imantsiktapis apakuqkuna y markantsiktapis ushakätsiqkuna.