N
Neguev Neguevqa Israel nacionpa sur kaqläninchömi kaykan. Neguevchöqa kaykan Beerseba, Siclag, Gerar y Arad markakunami. Neguevcho shumaq mana tamyaptinmi alläpaqa murupakuyantsu. Tsaymi tsay partichöqa üshata y cabrata wätakullar täyan (Gén. 24.62; Núm. 13.17; Jos. 11.16).
nümeru, runapa jutinpa nümerun Bibliata qellqayanqan witsanqa nümerukunata qellqayänanpa trokinqa letrakunallatami qellqayaq. Tsaymi 1-ta qellqayänanpa trokinqa “a” letrata qellqayaq. 2-ta qellqayänanpäqa “b” letratana qellqayaq. Tsaynöllami wakin nümerukunatapis qellqayaq. Tsaymi cada letrapa nümerun karqan. Tsayta tantiyanaykipämi cuadrucho qellqaraykan. Manami castellänu letrankunawantsu Mushuq Testamentuta qellqayarqan, tsaypa trokinqa griego letrakunawanmi. Tsaymi cuadrucho griego letrakunawan qellqaränanpa trokinqa castellänu letrakunawan qellqaraykan. 90-pä y 900-pä griëgucho letra kaptinpis tsay letrakunapa trokin castellänu letracho manami kantsu. Tsaymi 90-pa y 900-pa cuadrunkunacho imapis mana qellqarantsu.
| 1 | A | 60 | X |
| 2 | B | 70 | O |
| 3 | G | 80 | P |
| 4 | D | 90 | |
| 5 | E | 100 | R |
| 6 | F | 200 | S |
| 7 | Z | 300 | T |
| 8 | H | 400 | Y |
| 9 | TH | 500 | PH |
| 10 | I | 600 | X |
| 20 | K | 700 | PS |
| 30 | L | 800 | Ō |
| 40 | M | 900 | |
| 50 | N | 1000 | /A |
Tsaynöpis runapa jutinpa nümerunpis karqanmi. Jutinpa nümerunta musyayänanpäqa cada letrapa nümerunta apuntarkurmi sumayaq. Tsay sumayanqanmi karqan jutinpa nümerun. Jesucristupa jutinpa nümerunqa 888-mi kaykan. Paypa jutinqa griëgucho qellqaraykan IHSOYS-mi. Tsaymi jutinpa nümerunta jipintsik kaynö: I = 10. H = 8. S = 200. O = 70. Y = 400. S = 200. Tsaymi 10+8+200+70+400+200=888. Apocalipsis 13.17-18-chömi parlaykan anticristupa jutinpa nümerunpä. Tsay nümerunqa kaykan soqta pachak soqta chunka soqtami (666).