Isaacpä warmita ashinqan
24
Abrahamqa awkinnami karqan. Tsaynöllami llapan ruranqankunacho Tayta Dios bendisarnin yanaparqan. 2 Abrahampami yärakunqan wätaynin karqan llapan wätayninpitapis mas awkin. Tsay wätaynin llapan imaykantapis rikaq kaptinmi qayaykatsir Abraham nirqan: “Llillïman makikita churaykura 3 kay patsatapis ciëlutapis kamaq Tayta Diospa jutincho llapan ninqäta cumplinaykipä awnimay. Kay tanqä Canaán markakunapitaqa tsurïpä warmita ama ashinkitsu. 4 Tsaypa trokinqa castäkuna täyanqan Harán markaman aywar juk jipashta ashimunki tsurïpa warminpä”.5 Tsaynö niptinmi wätaynin nirqan: “Taytay, shamuyta mana munaptinqa ¿imatatä rurashä? ¿Tsurikitatsurä pushashä warmipa markanman?”
6 Abrahamnami nirqan: “Tsurïtaqa ama pushankitsu. 7 Ciëlucho kaykaq Tayta Diosmi nimashqa kay taykanqantsik patsata tsurïkunata, willkäkunata y paykunapita aywaraqkunatapis rikatsinanpä. Paymi taytäpa wayinpita y markäpita jipimar kayman chätsimashqa.† Tsaymi angelninta kachamunqa qamwan aywananpä. Tsaynöpami tsurïpa warminpä juk jipashta pushamunki. 8 Jipash shamuyta mana munaptinqa kay parlanqantsik tsayllachönami ushakanqa. Warmipa markanmanqa tsurïta ama pushankitsu”.
9 Tsaynö niptinmi wätayninqa Abrahampa llillinta yataykur Tayta Diospa jutincho awnirqan patronnin ninqankunata cumplinanpä. 10 Nirkurnami allin kaq qaraykunata apananpä kamarikurqan. Tsay qaraykunata chunka camëllukunawan chaqnakurkurmi Abrahampa wawqin Nacor tanqan markaman aywarqan. Tsay markaqa Mesopotamiachömi karqan. 11 Rupay jeqaykaptinnami marka yaykunaman Abrahampa wätaynin chaykur camëllukunata pözu ñöpancho jamapätsirqan. Tsay hörami jipashkuna aywayaq pözupita yakuta apayänanpä.
12 Tsaychömi Tayta Diosta mañakur nirqan: “Patronnï Abraham yärakunqan Tayta Dios, patronnïta kuyaparnin kanan yanapaykallämay llapanpis alli kananpä. 13 Kay pözu ñöpallanchömi shuyaräshä jipashkuna yakuta apananpä shamuqta. 14 Mayqan jipashpis chämuq kaqtami nishä: ‘Uylluykipita yakuta qaraykallämay’. Tsaynö mañakuptï nimätsun: ‘Upurkullay. Camëlluykikunatapis yakurkatsishä’. Tsaynö nimaq kaq katsun Isaacpa warminpä akranqayki jipash. Tsaynöpami musyashä patronnïta kuyapar yanapanqaykita”.
15 Tayta Diosta mañakur manarä ushaptinmi juk jipash uyllun umrushqa pözuman charqan. Tsay jipashqa Betuelpa tsurin Rebecami karqan. Betuelnami Milcacho Nacorpa tsurin karqan. Nacornami Abrahampa wawqin karqan. 16 Rebecaqa piwanpis manarä kakushqa kuyayllapä jipashmi karqan. Paymi pözu kaqman chaykur uyllunman yakuta wiñaskir wayinpa kutikuykarqan. 17 Tsaymi Abrahampa wätaynin taripaykur nirqan: “Jipash, yakuyki qaraykallämay”.
18 Jipashnami nirqan: “Taytay, upurkullay”.
Tsaynö nirmi uyllunta tsarapararqan yakuta upunanpä. 19 Upuskiptinnami Rebeca nirqan: “Taytay, camëlluykikunatapis yakurkatsishä”.
20 Tsaynö nirmi uywakuna yakukuyänanman kutin kutin yakuta ashtarqan camëllukuna upuyänanpä. 21 Tsaymi Abrahampa wätayninqa Tayta Diosta mañakunqannö tsay jipash kanqanta o mana kanqantapis musyayta munar upällalla rikararqan. 22 Camëllunkuna yakuta upuskiyaptinnami jipashpa senqanman qori sortïjata jatitsirqan. Tsay sortïja lasarqan soqta grämunömi. Tsaynöllami makinmanpis jatitsirqan qoripita rurashqa ishkay pulcërakunata. Tsaykunaqa lasarqan juk pachak (100) grämupita masmi.
23 Nirkurnami tapurqan: “¿Pipa tsurintä kaykanki? ¿Taytaykipa wayincho patsakuykuyämanku?”
24 Tsaymi Rebeca nirqan: “Noqaqa Betuelpa tsurinmi kä. Awilümi Nacor y awilänami Milca. 25 Patsakunaykipä wayïpis jäkuykanmi. Päjapis qewapis camëlluykikunapä kanmi”.
26 Tsaynö niptinmi Abrahampa wätayninqa qonqurikuykur Tayta Diosta adorar nirqan: 27 “Patronnï Abraham yärakunqan Tayta Dios, alabashqa kaykullay. Patronnïta kuyaparmi imaypis kuyakuq kaynikiwan castanmanpis chätsimashqayki”.
28 Nirkurnami Rebeca cörrilla aywarqan mamanta willananpä. 29-30 Rebecapa turin Labánnami qoripita rurashqa sortïjata y pulcërata makincho panin jatiraykaqta rikarqan. Runa imata ninqantapis mamanta Rebeca willanqanta wiyaykurmi Labánqa cörrilla aywarqan pözu kaqman tsay runawan tinkunanpä. Aywarmi pözu ñöpancho camëllunkunawan kaykaqta tarirqan. 31 Tsaymi Labán nirqan: “¡Taytay, wayïman aywakushun! Qamqa Tayta Dios yanapanqan alli runami kaykanki. Manami kayllachöqa pununkimantsu. Patsakunaykipä wayi kamarishqanami kaykan. Camëlluykikunata wichqanäpäpis corral kanmi”.
32 Tsaynö niptinmi Abrahampa wätayninqa Labánpa wayinman aywarqan. Wayiman chaykurnami Labánqa camëllukunata paskaskir qewankuna qararqan. Tsaynöllami yakutapis kamariparqan Abrahampa wätayninwan wallkiq runakuna chakinkunata mayllakuyänanpä.
33 Tsaypita mikunanpä mësaman jamatsiyaptinmi Abrahampa wätaynin nirqan: “Mikunäpäpis imaq shamunqätarä willayäshayki”.
Tsaymi Labán nirqan: “¡Taytay, juklla willaykayällämay!”
34 Tsaymi tsay wätay nirqan: “Noqaqa Abrahampa wätayninmi kä. 35 Tayta Diosmi patronnï Abrahamta bendisashqa imaykayuq tikrananpä. Tsaymi üshankuna, cabrankuna, wäkankuna, camëllunkuna y ashnunkunapis atska mirashqa. Paypaqa atskami ollqupis warmipis wätayninkuna kayä. Tsaynöpis atska qoriyuq atska qellayyuqmi kaykan. 36 Patronnïpa warmin Sarapis chakwanna kaykarmi ollqu wamrata qeshyakurqan. Paypa wamranpämi llapan herencianpis kaykan. 37 Tayta Diospa jutinchömi patronnï juratsimashqa: ‘Kay tanqä Canaán markakunapitaqa tsurïpä warmita ama ashinkitsu. 38 Tsaypa trokinqa aywanki taytäpa castankuna kaqman. Paykunapita juk jipashta ashimunki tsurï Isaacwan tänanpä’.
39 “Tsaynö nimaptinmi nirqä: ‘Tsay jipash shamuyta mana munaptinqa ¿imatarä rurashä?’
40 “Tsaymi nimarqan: ‘Yärakunqä Tayta Diosmi yanapashunaykipä angelninta kachamunqa. Tsaynöpami castäkunapita juk jipashta tsurïpa warminpä apamunki. 41 Castäkunaman chaptiki tsurinta mana kachapäshuptikipis awnimanqaykitaqa cumplishqaykinami’.
42 “Tsaynö nimaptin shamurmi pözu ñöpanman kanan junaq chämushqä. Tsaychömi Tayta Diosta mañakur nirqä: ‘Patronnï Abraham yärakunqan Tayta Dios, yanapaykallämay Isaacpa warminpä kaq jipashwan tinkunäpä. 43 Kay pözu ñöpallancho shuyaraykäshä jipashkuna yakukuq shamuqta. Taytay, kamakaykatsillay, patronnïpa tsurinpä warmita tarinäpä. Tsay jipashtami uyllunpita yakuta mañakushä. 44 Tsaynö rugakuptï pay nimätsun: “Upurkullay. Camëlluykikunatapis yakurkatsishä”. Tsaynö nimaq kaqmi patronnïpa llumtsuyninpä akranqayki jipash kanqa’.
45 “Tayta Diosta mañakuyta manarä usharmi rikarqä uyllun umrushqa Rebeca yakukuq shamuykaqta. Pözupita yakuta jipiskiptinnami mañakur nirqä: ‘Yakuyki qaraykallämay’. 46 Tsaymi uyllunta marqarkur nimarqan: ‘Taytay, upurkullay. Camëlluykikunatapis yakurkatsishä’. Tsaynö nimaptinmi upushqä. Tsaynöllami camëllükunatapis yakutsishqa. 47 Nirkurnami tapurqä: ‘¿Pipa tsurintä kaykanki?’ nir. Tsaymi nimarqan: ‘Noqaqa Betuelpa tsurinmi kaykä. Awilümi Nacor y awilänami Milca’. Tsaynö nimaptinmi juk sortïjata senqanman churapurqä. Tsaynöllami ishkan makinman pulcërakunata jatitsirqä.
48 “Tsaymi qonqurikuykur Tayta Diosta adorar nishqä: ‘Patronnï Abrahampa Diosnin, qam alli nänipami pushamashqayki patronnïpa castanpita jipashta tarinäpä’. 49 Tsaynö nirmi Tayta Diosta mañakushqä. Kananqa niyämay patronnïpa llumtsuyninpä tsurikita awninqaykita o mana awninqaykitapis. Mana awnimaptikiqa alfin imanashätä”.
50 Tsaymi Labánpis Betuelpis niyämarqan: “Kayman chämunaykipä Tayta Diosmi rasunpaypa yanapashushqayki. Tsaynö kaykaptinqa ¡imanirrä awnïmantsu! 51 Tayta Dios tsaynö kananpä destinashqa kaykaptinqa patronnikipa tsurinpa warmin kananpä Rebecata entregashayki”.
52 Tsaynö niyaptinmi Abrahampa wätayninqa Tayta Diosta agradëcikurnin urkunpis patsaman töpanqanyaq qonqurikuykurqan. 53 Nirkurnami qoripita qellaypita alhäjakunata y fïnu latsapakunata jipiskir Rebecata qararqan. Tsaynöllami turintapis mamantapis qararqan. 54 Nirkurnami Abrahampa wätayninqa wallkiqninkunawan mikuskir y upuskir tsaycho punuyarqan. Patsa waraskiptin shärikuskirnami nirqan: “Taytay, kananqa patronnï kaqman kutikuyänäpä despachaykayällämay”.
55 Tsaynö niptinmi Rebecapa turinwan maman niyarqan: “Chunka junaqllapis Rebecawan kaskiyäshärä. Nirkurmi itsanqa despachayäshayki”.
56 Tsaynö niptinnami Abrahampa wätaynin nirqan: “Kayman shamuptï llapantapis Tayta Dios kamakaykätsiptinqa patronnïpa wayinman kutikuyänäpä juklla despachaykayällämay”.
57 Tsaymi paykuna niyarqan: “Jipashtarä tapushun. Mä, ¿ima ninqashi?”
58 Tsaynö nirmi Rebecata qayaykur tapuyarqan: “¿Kay runawan aywayta munankiku?” nir.
Tsaynö tapuyaptinmi nirqan: “Awmi”.
59 Tsaynö niptinmi ichikninpita wätaqnin warmitawan despachayarqan. Tsaymi Abrahampa wätayninwan y paywan shamuq runakunawan aywakuyarqan. 60 Castankunami Rebecata bendisarnin niyarqan: “Wamraykikuna, willkaykikuna y paykunapita aywaraqkunapis atskaman mirar waranqanpa waranqanpa kaykullätsun. Tsaynölla qampita aywaraqkuna llapan contrankunata vincir munaynincho katsiyätsun”.
61 Nirkurnami Rebecaqa wätaynin warmikunawan camëllukunata muntakurkur aywakurqan Abrahampa wätaynin pushanqanpa. Tsaymi Abrahampa wätayninqa Rebecata pushakurkur kutikurqan.
62 Paykuna chäyänanpämi Isaacqa Lahai-Roí ninqan pözu kaqpita kutishqana kaykänä. Payqa Neguevchömi tarqan. 63 Patsa tsakaykaptinnami Isaacqa aywarqan rikachakuq. Rikachakuykanqanchömi camëllukuna shamuykaqta rikarqan. 64 Tsaynöllami Rebecapis Isaacta rikaykur muntaranqan camëllupita yarpurqan. 65 Abrahampa wätaynintanami tapurqan: “¿Pitä taqay shamuykaq runa?”
Tsaymi nirqan: “Paymi patronnï”.
Tsaynö niptinmi Rebecaqa vëlunwan qaqllanta tsapakurqan.