Sarata pampananpä chakrata Abraham rantinqan
23
Juk pachak ishkay chunka qanchis (127) watayuq kanqanyaqmi Sara kawarqan. 2 Quiriat-arbacho kaykarmi Sara wanurqan. Quiriat-arbapa jukaq jutinmi kaykan Hebrón. Tsayqa kaykan Canaánchömi. Sara wanuskiptinmi Abraham pasaypa waqar lüturqan. 3 Warmin sutaraykaptinmi Abraham aywarqan heteo runakunawan parlananpä. Chaykurnami nirqan: 4 “Musyayanqaykinöpis jäpa runa karmi† juk sepultürata rantikayämänaykipä shamushqä tsayman warmïta pampanäpä”.†5 Tsaynö niptinmi heteo runakuna niyarqan: 6 “Taytay, qamqa noqakunacho kanki Tayta Dios akranqan runami. Warmikitaqa mas allinnin kaq sepultüraman pampay. Noqakunaqa manami mayqäpis michäyäshaykitsu mayman pampaptikipis”.
7 Tsaynö niyaptinmi heteo runakunapa ñöpanman Abraham qonqurikuykur 8 nirqan: “Warmïta pampanäpä rasunpaypa awniyämarqa Zoharpa tsurin Efrónta rugapaykayällämay 9 Macpela chakran kuchuncho kaykaq machayta rantikamänanpä. Aykata mañamaptinpis pägalläshämi. Tsaynö rantiptïrämi kikïpäpis sepultürä kanqa”.
10 Marka mayinkuna y tsaypa päsaqkunapis wiyayänanpämi markaman yaykuna punkucho Abrahamta Efrón nirqan: 11 “Taytay, rantikunäpa trokinqa chakrantinta tsay machayta sepultüraykipä qaraykushayki. Marka mayïkunapa ñöpanchömi qaraykü. Tsay machayman warmikita pampay”.
12 Tsaynö niptinmi runakunapa ñöpancho Abrahamqa yapay qonqurikurqan. 13 Tsaypitanami llapanpis wiyayänanpä Efrónta nirqan: “Taytay, rugakunqäta wiyaykallämay. Tsay machaypa chaninta chaskimaptikirämi warmïta tsayman pampashä”.
14 Tsaymi Abrahamta Efrón nirqan: 15 “Taytay, wiyaykallämay. Tsay chakrapa chaninqa chusku pachak (400) siclo qellaymi.a Tsayllapäqa ¿imapänatä parlashunpis? Tsayman warmikita pampay”.
16 Tsaymi Abrahamqa chakrapa chaninta mañanqannölla heteo runakunapa ñöpancho qellayta pësaypa chusku pachak sicluta Efrónta pägarqan. 17 Tsaynöpami Efrónpa chakran y tsaycho kaykaq machaypis y muntikunapis Abrahampana karqan. Tsay chakraqa Mamripa chakranpita rupay yarqamunan kaqläpami kaykan. 18 Abraham rantinqantaqa rikayarqanmi tsaycho kaykaq heteo runakuna y marka punkupa päsaq runakunapis.
19 Tsaynö rantiskirnami warmin Sarata Macpelacho machayman Abraham pamparqan. Tsay chakraqa kaykan Mamripa chakranpita rupay yarqamunan kaqläpami. Tsay partipa jukaq jutinmi Hebrón. Tsayqa kaykan Canaánchömi. 20 Tsaynöpami chakrapis machaynintin Abrahampana karqan. Tsay chakrataqa heteo runakunami rantikuyarqan Abrahampis y castankunapis tsaycho pampakuyänanpä.