Tayta Diosta Abraham cäsukunqan
22
Tsaypita atska wata päsaskiptinnami Tayta Dios musyayta munarqan Abraham cäsukuq kanqanta o mana cäsukuq kanqanta. Tsaymi qayar nirqan: “¡Abraham!”Niptinmi Abraham nirqan: “¿Imallatä, Taytay?”
2 Tsaymi Tayta Dios nirqan: “Japallan kuyay tsuriki Isaacta pushakurkur Moriah partiman ayway. Tsaychömi juk jirkata rikatsishayki. Tsay jirkachömi sacrificiupä tsurikita rupatsinki”.
3 Abrahamnami tsaka tsakalla shärikuskir yantata tseqtaskir ashnunman chaqnakurqan. Nirkurnami ishkay wätayninkunata y tsurin Isaacta pushakurkur aywayarqan. 4 Kimsa junaqna aywaykarmi Abraham rikarqan tsay jirka karucho kaykämuqta. 5 Tsaymi pushanqan wätayninkunata nirqan: “Wamräwan noqallana taqay jirkaman aywayäshä Tayta Diosta adorayänäpä. Kutiyämunqäyaq kayllacho ashnuntsikta mitsipaykäyay”.
6 Tsaynö nirmi Abrahamqa sacrificiuta rupatsinanpä tsurin Isaacta yantata aparitsirqan. Nirkurnami ninata y cuchilluta apakurkur tsurinwan aywayarqan.
7 Aywaykäyanqanchömi Isaacqa taytanta nirqan: “¡Papä!”
Abrahamnami nirqan: “¿Imatä, hïju?”
Isaacnami nirqan: “Ninata y yantatapis apaykantsikmi. Sacrificiuta rupatsinantsikpä ¿maychötä carnishqa kaykan?”
8 Tsaynö tapuptinmi taytan nirqan: “Hïju, Tayta Diosmi carnishtaqa kamarimunqa”.
Tsaynö parlarmi aywayarqan.
9 Tayta Dios rikatsinqan jirkaman chaykurmi altarta Abraham pirqarqan. Tsay altar jananmanmi yantata churarqan. Nirkurnami tsurin Isaacta pankaskir yanta jananman churarqan.† 10 Cuchilluta aptarkur tsurinta wanutsinanpäna kaykaptinmi 11 Tayta Diospa angelnin ciëlupita nimurqan: “¡Abraham! ¡Abraham!”
Tsaymi Abraham nirqan: “Taytay, kaychömi kaykä”.
12 Angelnami nirqan: “Tsurikita ama wanutsiytsu. Kananqa musyämi Tayta Diospita mantsapakunqaykita. Japallan kuyay tsuriki kaykaptinpis manami ñëgamashqaykitsu”.
13 Tsaypita tikranqanchömi Abraham rikaskirqan juk carnëru shirakacho tsarikashqa kaykaqta. Tsay carnërutami tsurinpa trokin sacrificiupä rupatsirqan.† 14 Tsaynöpami Abrahamqa tsay jirkapa jutinta churar nirqan: “Tayta Dios kamaripan”.a Tsaypitami kananyaqpis runakuna niyan: “Jirkachömi Tayta Dios kamaripämäshun”.
15 Tsaypitanami Tayta Diospa angelnin ciëlupita Abrahamta yapay qayar nirqan: 16 “Tayta Diosmi nin: ‘Ninqäta cäsumarmi japallan kuyay tsurikitapis ñëgamashqaykitsu. Tsaymi kikïpa jutïcho jurar nï: 17 Rasunpaypami bendicionnïta qamman churamushä. Tsaynöpis atskaman mirayänanpämi qampita aywaraqkunata alli rikashä. Qoyllurkuna y lamar kuchuncho aqushakunapis yupayta mana atipaypä kanqannömi qampita aywaraqkuna atskaman mirayanqa.† Paykunaqa chikiqninkunatapis llapantami vinciyanqa. 18 Qampita aywaraqpitami kay patsacho pïmaypis bendicionta chaskiyanqa.† Tsaynö kanqa ninqäta cäsukamanqaykipitami’ ”.
19 Abrahamnami wätayninkunata jaqinqan sitiuman kutirqan. Nirkurnami Beersebaman wätayninkunawan kutikuyarqan.
Nacorpa tsurinkuna
20 Tsaykuna päsaskiptinnami Abrahamta willayarqan wawqin Nacorpa tsurinkuna warmin Milcacho kayanqanta. 21 Nacorpa mayor tsurinpa jutinmi karqan Uz. Uzpa qepa kaq wawqinmi karqan Buz. Buzpa qepan kaqmannami karqan Kemuel. Kemuelnami karqan Arampa taytan. 22 Nacorpa wakin tsurinkunami kayarqan Quesed, Hazo, Pildas, Jidlaf y Betuel. 23 Betuelqa karqan Rebecapa taytanmi. Tsay puwaq tsurinkunami kayarqan Nacorpa warmin Milcacho.
24 Tsaynöllami concubïnan Reúmachöpis Nacorpa tsurinkuna kayarqan Teba, Gaham, Tahas y Maaca.