Warmin Ceturacho Abrahampa tsurinkuna yuriyanqan
25
Abrahampa juk warminpa jutinmi karqan Ceturaa. 2 Tsay warmichömi Abrahampa tsurinkuna kayarqan Zimram, Jocsán, Medán, Madián, Isbac y Súa. 3 Jocsánpa tsurinkunami kayarqan Seba y Dedán. Dedánpita aywaraqkunapitami kayarqan Asur, Letus y Leum runakuna. 4 Madiánpa tsurinkunanami kayarqan Efa, Efer, Hanoc, Abidawan Elda. Paykunami Cetura warmipita aywaraqkuna kayarqan.5 Abrahampa llapan imaykanpis tsurin Isaacllapämi karqan. 6 Concubïna warminkunachob kaq tsurinkunataqa wallka wallkallami imaykankunatapis rakipurqan. Manarä wanukurmi rakipar paykunata despacharqan rupay yarqamunan kaqläman. Tsaynöpami Isaacpita karucho täyarqan.
Abraham wanunqan
7 Abrahamqa kawarqan juk pachak qanchis chunka pitsqa (175) watayuq kanqanyaqmi. 8 Payqa awkinna kaykar wanukurmi unay castankunawan tinkuq aywakurqan. 9 Wanuskiptinnami tsurinkuna Isaacwan Ismael Macpela machayman pampayarqan. Tsayqa kaykan Mamripita rupay yarqamunan kaqlächömi y Zoarpa tsurin Efrónpa chakranchömi. Efrón casta runakunaqa heteo runakunami kayarqan. 10 Tsay chakraqa karqan heteo runakunapita Abraham rantinqanmi.† Tsaymanmi Abrahamta pampayarqan warmin Sara pamparaykanqan ñöpanman. 11 Abraham wanuskiptinnami tsurin Isaactana Tayta Dios bendisarqan. Payqa tarqan Lahai-Roí ninqan pözu ñöpanchömi.†
Ismaelpita aywaraqkuna
12 Kaychömi qellqaraykan Abrahampa tsurin Ismaelpa tsurinkunapä y paykunapita aywaraqkunapäpis.
Ismaelpa maman Agarqa Egiptupitami karqan. Payqa karqan Sarapa wätaynin warmimi. 13 Ismaelpa tsurinkunami mayorpita qepayaq kayarqan Nebaiot, Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis y Cedema. 16 Ismaelpa tsurinkunaqa chunka ishkaymi kayarqan. Paykuna atskaman mirarmi chunka ishkay trïbu kayarqan. Tsay tsurinkunapa jutinkuna kanqannöllami trïbunkunapa y markankunapa jutinkuna karqan. Paykunami cada ünun trïbunkunacho mandaq kayarqan.
17 Ismaelqa juk pachak kimsa chunka qanchis (137) watami kawarqan. Wanuskirnami unay castankunawan tinkuq aywakurqan. 18 Ismaelpita aywaraqkunami mashtakashqa täyarqan Havilapita Shuryaq. Tsayqa Egipto nación ñöpanpami kaykan. Tsaypami Asurman näni päsaykan. Kikinpura chikinakuykarpis tsaychömi paykunaqa täyarqan. †
Jacobwan Esaú yuriyanqan
19 Kaychömi qellqaraykan Isaacpa tsurinkunapä y paykunapita aywaraqkunapäpis. Isaacqa Abrahampa tsurinmi karqan.
20 Chusku chunka (40) watayuq kaykarmi Isaacqa Rebecawan majatsakarqan. Rebecaqa karqan Betuelpa tsurin y Labánpa paninmi. Paykunaqa Padan-aramcho taq arameo runakunami kayarqan. 21 Warmin Rebeca qolluq kaptinmi qeshyaq kananpä Tayta Diosta Isaac mañakurqan. Mañakunqanta Tayta Dios wiyaptinmi Rebecaqa qeshyaq rikakurqan. 22 Millishta qeshyaq kaptinmi mamanpa pachancho pelyar pasaypa nanätsiyarqan. Tsaymi Rebecaqa yarpachakur nirqan: “Tsaynö kaykaptinqa jina wanukümanpis”.
Tsaymi imanir tsaynö ñakanqantapis Tayta Diosta mañakur tapukurqan. 23 Tsaynö mañakuptinmi Tayta Dios nirqan:
“Pachaykicho wamraykikuna atskaman mirarmi ishkay nacionkuna kayanqa.
Pachallaykichönami chikinakur pelyaykäyan.
Punta yuriq kaqmi qepa yuriq kaqpa munaynincho kanqa”.†
24 Rebecapa killan tinkuptinnami qeshyakurqan millishta. 25 Punta yuriq kaqpa aqtsanmi karqan puka y entëru cuerpunnami shapra. Paypa jutintami churayarqan Esaúc jutin kananpä. 26 Esaúpa ankun aptashqami qepanta wawqin yurirqan. Tsaynö yurinqanpitami jutinta churarqan Jacobd jutin kananpä. Rebeca qeshyakunqan witsan Isaacqa soqta chunka (60) watayuqnami kaykarqan.
Mayor kay derëchunta Esaú rantikunqan
27 Tsaypitanami Esaúwan Jacob chöluna kayarqan. Esaúqa jirkapa purirmi uywakunata wanutsiyta yachakurqan. Jacobmi itsanqa maypapis mana yarquypa täkuq. 28 Tsarimunqan uywakunapa aytsanta mikurmi Isaacqa tsurin Esaúta mas kuyarqan. Rebecami itsanqa Jacobta mas kuyarqan.
29 Juk junaq Jacob kusinakuykaptinmi Esaúqa jirkapa aywanqanpita pasaypa pishipashqa charqan. 30 Tsaymi wawqinta nirqan: “Tsay pukay pukay kusinakuykanqayki mikuyta mañakushayki. Mallaqaypitami wanuykäna”.
(Pukay pukay mikuyta munapanqanpitami Esaúta reqiyarqan Edom jutiwan.e)
31 Jacobnami nirqan: “Mikuyta qaranä kaptinqa mayor kay derëchuykita kanan höra qoykamay”.
32 Jacob tsaynö niptinmi Esaú nirqan: “Mallaqaypita wanunaykaptïqa ¿imapänatä mayor kay derëchüpis välin?”
33 Esaú tsaynö niptinmi Jacob nirqan: “Diospa jutincho jurar awnimay mayor kay derëchuykita trukanantsikpä”.