Gerar markacho Isaac tanqan
26
Tsay witsanmi pasaypa muchuy karqan. Tsayqa Abraham kawanqan witsan kanqannömi karqan.† Tsaynö kaptinmi Gerar markaman Isaac aywakurqan. Gerarchömi filisteo runakunapa mandaqnin rey Abimelec tarqan. 2 Tsaychömi Tayta Dios yuripaskir Isaacta nirqan: “Egiptuman ama aywaytsu. Tänaykipä ninqä partillachörä 3 jäpa runanö täkuy. Noqaqa qamwanmi imaypis kaykäshä.† Tsaynöpis qamta bendisar qamta y qampita aywaraqkunata kay llapan jallqakunata y raqrakunata rikatsishä. Tsaynöpami cumplishä taytayki Abrahamta awninqäta. 4 Noqami qampita aywaraqkunata alli rikashä qoyllurkunanöpis yupayta mana atipaypä kayänanpä. Paykunatami rikatsishä kay llapan jallqakunata y raqrakunata. Paykuna kayninpami llapan nación runakunapis bendicionnïta chaskiyanqa.† 5 Tsaynö kanqa mandamientükunata, leynïkunata y yachatsinqäkunata Abraham cumplinqanpitami”.6 Tayta Dios tsaynö niptinmi Isaacqa Gerarcho tarqan.
7 Tsaycho taq runakunami Isaacta tapuyarqan Rebeca iman kanqantapis. Rebeca kuyayllapä kaptinmi Isaac yarparqan warmin raykuq runakuna wanutsiyänanpä kanqanta. Tsaymi willakurqantsu Rebeca warmin kanqanta. Rasun kaqta ninanpa trokinmi “payqa panïmi” nirqan. 8 Tsaypita unaytanami filisteo runakunapa mandaqnin rey Abimelec ventänanpa rikachakunqancho rikarqan Rebecata Isaac kuyar shullpapaykaqta. 9 Tsayta rikaykurmi Isaacta qayaykatsir Abimelec nirqan: “Payqa warmikimi ¿aw? Warmiki kaykaptinqa ¿imanirtä ‘panïmi’ nirqayki?”
Tsaymi Isaac nirqan: “Taytay, tsaynö nirqä warmï raykuq wanutsiyämänanpä kanqanta yarparmi”.
10 Tsaynö niptinmi Abimelec nirqan: “¿Imanirtä tsaynöqa llullapämashqayki? Jinachi mayqan runapis warmikiwan pununman karqan. Tsaynö llullapäyämaptiki jinachi jutsamanpis ishkiyäman karqan”.
11 Nirkurnami llapan runakuna musyayänanpä Abimelec nirqan: “Kay runata o warminta pipis wajupaq kaqqa wanutsishqami kanqa”.
12 Tsay watami Isaacqa tsaycho murukurqan. Tayta Dios bendicionninta churaptinmi qoriytapis mana atipanqanyaq mikuynin wayurqan. 13 Tsaynöpa Isaac pasaypa imaykayuq tikraptinmi imaykanpis atska karqan. 14 Üshankunapis, cabrankunapis, wäkankunapis atskamanmi mirayarqan. Chakranta arupäyänanpä wätayninkunapis atskami kayarqan. Tsaynö imaykayuq tikraptinmi filisteo runakunaqa chikir 15 Isaacpa taytan Abraham uchkutsinqan pözukunata pampayarqan.
16 Tsaypitanami Isaacta Abimelec nirqan: “Kaypita aywakuy. Noqakunapita masmi imaykayuq tikrashqayki”.
17 Tsaynö niptin Isaac aywakurmi Gerar raqra ñöpan pampachöna tarqan. 18 Tsayman chaykurmi taytan Abraham uchkutsinqan pözukunata Isaac pitsatsirqan. Tsay pözukunatami Abraham wanuskiptin filisteo runakuna pampar ushayarqan. Pitsaskatsirmi Isaacpis taytan jutitsinqannölla jutinta churaparqan.
19 Tsay pampacho mushuq pözupä uchkuykarmi Isaacpa wätayninkuna chuya yakuta tariyarqan. 20 Tsaymi Gerarcho taq üsha mitsiqkunawan Isaacpa üsha mitsiqninkuna yakuta qechunakur pelyayarqan. Tsaypitami tsay pözupa jutinta Isaac churarqan Eseka nir. 21 Tsaypitami Isaacpa wätayninkuna juk pözutana uchkuyarqan. Tsay jananpis yapaymi pelyayarqan. Tsaymi tsay pözupa jutinta Isaac churarqan Sitnab jutin kananpä. 22 Tsaynö pelyayaptin jukläpana aywakurmi tsaychöpis pözuta uchkutsirqan. Piwanpis tsay janan mana pelyarnami jutin churarqan Rehobotc jutin kananpä. Tsaymi nirqan: “Kananmi itsanqa Tayta Dios yanapaykämantsik tranquïlu kawanantsikpä. Tsaymi wamrantsikkunapis uywantsikkunapis atskaman mirayanqa”.
23 Tsaycho taykanqanpitami Beersebaman aywakurqan. 24 Tsayman chanqan paqasmi Isaacta yuripaskir Tayta Dios nirqan:
“Noqami kaykä taytayki Abraham yärakunqan Dios.
Qamwan kaykaptïqa ama mantsariytsu.
Sirvimaqnï Abrahamta awnishqa karmi bendisashayki.
Tsaynöllami qampita aywaraqkunamanpis bendicionnïta churashä atskaman mirayänanpä”.
25 Tsaychömi altarta pirqaskir Tayta Diosta Isaac adorarqan. Tsaycho taptinmi wätayninkuna juk pözuta uchkuyarqan yakuta jipiyänanpä.
Isaacwan Abimelec awninakuyanqan
26 Juk kutimi Gerar markapita Abimelec aywarqan Isaacwan parlayänanpä. Abimelecwanmi† aywarqan yätsiqnin Ahuzat y soldädunkunapa mandaqnin Ficolpis. 27 Chaykuyaptinmi Isaac nirqan: “Chikiyämar markaykipita qarqaykämarqa ¿imaqtä shayämushqayki?”
28 Tsaynö niptinmi paykuna niyarqan: “Tantiyakuyashqämi Tayta Dios imachöpis qamta yanapaykäshunqaykita. Tsaymi pactuta ruranantsikpä shayämushqä. 29 Kanan awniyämay imaypis alli kawanantsikpä. Manami qamkunata chikiyashqätsu, tsaypa trokinqa imaypis allimi kawarqantsik. Yarqakamurpis tranquïlumi aywakayämushqayki. Qamtaqa Tayta Diosmi imaykachöpis yanapaykäshunki”.
30 Tsaynö niyaptinmi Isaacqa alli allita kusinaskatsir paykunawan mikuyarqan y upuyarqan. 31 Waraynin tutanami Abimelecwan Isaac juramentuta rurayarqan alli kawayänanpä. Tsaypita Isaac despachaptinmi paykuna kushishqa aywakuyarqan.
32 Tsay junaqmi Isaacpa wätayninkuna willayarqan uchkuykäyanqan pözucho yakuta tariyanqanta. 33 Tsaymi tsay pözupa jutinta Isaac churarqan Sebad jutin kananpä. Tsaypitami kananyaqpis tsay markapa jutin kaykan Beerseba.e
Esaúpa warminkuna