Joel
Murukuyta chukllushkuna ushanqan
1
Tayta Dios revelanqantami Petuelpa tsurin Joel willakur nirqan:2 Mayor runakuna, kanan ninqäta shumaq wiyayämay.
Judá nacioncho taq runakunapis, kanan willanqäta wiyayämay.
Kay castïgutanöqa ¿imayllapis rikayashqaykitsurä?
Taytaykikuna kawayanqan witsan kaynö mantsaypä castïgu ¿imayllaqa karqantsurä?
3 Kay castïgu imanö kanqantapis tsurikikunata willayanki.
Tsurikikunapis tsurinkunata willayanqa.
Tsaynölla willkaykikunapis tsurinkunata willayanqa.
4 Jatusaq chukllushkuna katuyanqantapis akapa chukllushkunami ushakurkuyashqa.
Akapa chukllushkunapita qeshpiqllantapis shiwrikunami mikukurkuyashqa.
Tsaypita quëdaqkunatapis uchpa kurukunami ushakurkuyashqa.†
5 Machashqalla kakuq runakuna, tantiyakuyay.
Machashqa kayanqaykipita kachakarkur waqayay.
Chukllushkuna üvata ushaptin upyayänaykipä vïnupis manami kannatsu.
6 Yupaytapis mana atipaypä soldädukunanömi tsay chukllushkuna markantsikman yuriykayämushqa.
Kirunkunapis curmïllunkunapis leonpanörämi llawchi kaykan.†
7 Llapan üvakunatapis chakranpämi ushayashqa.
Hïgustapis pasaypami ushayashqa.
Yurantapis llimllankunatapis tullullantanami kachaykushqa.
8 Majatsakänanpä awninqan chölu wanuskiptin soltëra jipash qachqa latsapata jatikurkur waqanqannö ikikyaypa ikikyar waqayay.
9 Sacerdötikunapis waqaykäyan tsaki mikuy ofrendata ni vïnutapis Tayta Diospa templunman pipis manana apaptinmi.
10 Trïgupis manami kannatsu.
Üvapa yurankunapis tsakishqami kaykäyan.
Olïvu jachakunapis ushakashqami kaykäyan.
Llapan chakrakunapis pasaypa jäkuqllanami kaykäyan.
11 Chakracho aruqkuna, üvata cosechaqkuna, makikikuna tsoqpashqa waqayay.
Trïgutapis cebädatapis manakaqllapämi muruyashqayki.
12 Üvapa yurankunapis tsakishqanami.
Hïguskunapis ushakäyashqanami.
Granädakunapa, palmërakunapa, manzänapa yurankuna y llapan plantakunapa yurankunapis tsakishqanami kaykäyan.
Tsaymi runakunapis pasaypa mantsakashqa kaykäyan.†
13 Tayta Diosta altarcho sirviq sacerdötikuna, qachqa latsapata jatikurkur waqayay.
Tsaki mikuypis ni vïnupis Tayta Diosnintsikpa wayinman apayämunanpä mananami kannatsu.
14 Mayor runakunata y común runakunata Tayta Diosnintsikpa wayinman qorikäyänanpä qayatsiyay.
Tayta Diosta mañakur llapaykikuna ayunayay.
15 ¡Allaw noqantsik, Tayta Dios juzganan junaq chaykämunnami!
Tsay junaq chämuptin ¡allaw imanörä runakuna ñakaykuyanqa!
Tsay junaqmi llapanpä munayyuq Tayta Dios atska runakunata ushakätsinqa.†
16 Mikuynintsik ushakaptin pasaypa muchuychönami kaykantsik.
Tsaymi Tayta Diosnintsikpa templunman aywarpis kushikuntsiknatsu.
17 Murunqantsik trïgupis manami wiñamushqanatsu.
Mikuy tröjakuna wayikunachöpis wayrallanami tumaykan.
18 Maychöpis qewata mana tarirmi wäkakunapis pasaypa kuyapaypä waqaykäyan.
Tsaynöllami üshakunapis cabrakunapis wanur ushakaykäyan.
19 ¡Tayta Dios, yanapaykayällämay!
Jirkacho qewatapis y munti jachakunatapis ninami rupar ushashqa.
20 Raqrapa aywaq yakupis tsakishqami.
Tsunyaq jirkacho qewakunatapis ninami ushashqa.
Tsaymi jirka uywakunapis qamman mañakamur waqapaykäyäshunki.†