Tayta Dios juzganan junaq mantsariypä kanqan
2
Tayta Dios juzganan junaq chaykämunnami.Judácho taqkuna, llapayki mantsarirnin tsuktsukyäyay.
Pïmaypis musyananpä sagrädu Sión jirkancho cornëtata tukayay.
2 Tsay junaq patsapis tsakanqami.
Yanaypami pukutaypis tsapaskinqa.
Patsa waraptin jirkakunapa rupay ñawïmunqannömi atska soldädukuna shayämunqa.
Tsaynöqa manami imaypis kashqatsu ni imaypis kanqatsu.
3 Imatapis tarinqan kaqta nina ushanqannömi llapantapis ushayanqa.
Atacayänanpä manarä chämuptin Edén huertanömi llapanpis kuyayllapä kanqa.
Päsaskiyaptinqa tsunyaykarmi quëdanqa.
Manami imapis tsay soldädukunapita qeshpinqatsu.
4 Guërra cawallukunanömi mantsaypä kayanqa.
Cawalluta muntarkur cörriq soldädukunanömi cörriyanqa.
5 Guërra carrëtakuna illaqpita puntapa tumamur büllata rurayanqannömi pasaypa büllata rurayanqa.
Usya tiempucho muntita nina lunyaypa lunyar ushaqnömi qayaräyanqa.
Guërraman atska soldädukuna atacayänanpä kamarikushqa aywayanqannömi aywayanqa.†
6 Tsayta rikaykurmi runakuna pasaypa mantsarirnin qaqllankunapis almatakashqa rikakuyanqa.
7 Atacaqkunaqa alli chölu karmi mana mantsariypa cörrir marka murälla jananman witsäyanqa.
Tsaynöpis fïlayllapa y maypapis mana yaqayllapami aywayanqa.
8 Mana tanqanakuypami aywayanqallanpa llapanpis aywayanqa.
Paykunata flëchayaptinpis mana qeshpiypami yaykuyanqa.
9 Markakunamanpis mana mantsaypami yaykuyanqa.
Murälla jananpami cörriyanqa.
Achpaypami wayikunamanpis yarkuyanqa.
Ventänapapis suwakunanömi yaykuyanqa.
10 Kay patsapis pasaypami mantsakanqa.
Ciëlupis tsuktsukyanqami.
Rupaypis y killapis tsakanqami.
Qoyllurkunapis manami atsikyäyanqanatsu.†
11 Tsay atacaqkunapa puntantami Tayta Dios aywanqa.
Atacayänanpä mandaptin maqakuynörämi wiyakanqa.
Ninqanta ruraqkunaqa yupaytapis mana atipaypämi kayanqa.
Paykunaqa ishniyparämi aywayanqa.
Tayta Dios juzganan junaq pasaypa mantsariypämi kanqa.
Tsaytaqa manami pipis awantanqatsu.†
Jutsankunata kachariyänanpä ninqan
12 Tayta Diosmi nin:
“Llapan shonquykikunawan perdonta mañakamarnin noqaman kutiyämuy.
Jutsayuq kayanqaykipita llakikurnin ayunar waqayay”.†
13 Jutsaykikunapita llakikur latsapaykikunata rachiyänaykipa trokinqa jutsaykikunata kachariyay.
Llapan shonquykikunawan kuyashuqniki Tayta Diosnintsik munanqannö kawayay.
Payqa kuyapäkuq y perdonakuqmi.
Imapitapis manami ras ajanantsu.†
Perdonarqa manami castigayäshunkinatsu.
14 Capazchi castigayäshunaykipa trokinqa bendicionta qarayäshunkiman.
Tsaynöpami Tayta Diosnintsikta agradëcikur tsaki mikuy ofrendatapis vïnutapis apayanki.
15 Sión jirkancho cornëtata tukayay.
Llapaykikuna willanakuyay qorikaykur ayunayänaykipä.
16 Purificakuyänaykipä llapaykikuna qorikäyay.
Awkinpis wamrapis llapaykikuna aywayay.
Llullukunatapis apayay.
Tsayrä majatsakashqakunapis punukuyänaykipita yarqur ayunaq aywayay.
17 Tayta Diosta sirviq sacerdötikuna, altar kaqcho waqayay.
Tayta Diosta mañakur niyay:
“Taytay, kuyanqayki runakunata perdonaykullay.
Ama munaykullaytsu jäpa nación runakuna munaynincho katsiyämar manakaqman churayämänanta.
Ama munaykullaytsu qamman mana yärakamuq runakuna asipäyämar ‘¿maychötä Diosninkuna kaykan?’ niyämänanta”.†
18 Tsaynö mañakushqaqa kuyapäkuq karmi Tayta Dios perdonamäshun.
19 Tsaymi nimäshun:
“Pacha junta kayänaykipämi trïgutapis, vïnutapis y aceititapis kamaripäyäshayki.
Mana yärakamaqkuna manakaqman churayäshunaykipä manami kachapäshänatsu.
20 Norti kaqläpita shamuqkunataqa tsunyaq jirkamanmi qarqushä.
Puntanta aywaqkunatami Kachi Lamarman jitarpushä.
Qepanta aywaqkunatanami Mediterráneo Lamarman jitarpushä.
Tsaychömi llapanpis ismur pasaypa asyäyanqa.
Tsaynö ruraptï mantsariypämi kanqa.
21 “Israel runakuna, ama mantsakäyaytsu.
Janayki shärinäpä kaykaptinqa kushikuyay.
22 Jirka uywakuna, ama mantsariyaytsu.
Qewapis lloqlluyparämi wiñamunqa.
Früta jachakunapis wayunqami.
Hïguspis üvapis champirayparämi wayunqa.
23 Sióncho taqkuna, noqaman yärakamurnin kushikuyay.
Unaynömi punta tamyata y qepa tamyatapis tiempullancho tamyatsimushä.
24 Tsaymi trïgutapis atskata cosechayanki.
Vïnupis aceitipis atskami kanqa.
25 “Kachamunqä chukllushkuna wata wata ushayanqanpitawanmi aruyanqaykiman bendicionnïta churamushä.
26 Mikuynikikunapis pasaypa atskami kanqa.
Qamkunata yanaparnikimi kushikuypä kaqkunata rurashä.
Tsaymi llapan shonquykikunawan kushishqa alabayämanki.
Manami imaypis penqakuyman churayäshaykinatsu.
27 Tsaymi tantiyayanki qamkunawan kaykanqäta.
Tsaynöpis tantiyayanki Tayta Diosnikikuna kanqäta.
Noqapita masqa manami juk Dios kantsu.
Kanan kayanqaykinöqa manami penqakuycho yapay kayankinatsu”.†
Espíritu Santuta Tayta Dios kachamunanpä kanqan
28 (3.1) “Tsaypitanami Espïritüta llapan runakunaman kachamushä.†
Tsaymi ollqu tsurikikuna y warmi tsurikikunapis willakuynïta willakuyanqa.
Awkinkunatapis suëñuyninkunachömi musyatsishä.
Chölukunapis revelaciontami rikayanqa.
29 (3.2) Tsay junaqkunami ollqu y warmi sirvimaqnïkunamanpis Espïritüta kachamushä.
30 (3.3) Imaypis mana rikayanqaykikunatami ciëlucho y kay patsachöpis rikakätsimushä.
Yawartapis, ninatapis y ichiraykaq qoshnitapis rikayankimi.
31 (3.4) Rupaypis tsakanqami.
Killapis yawarmanmi tikranqa.†
Tsaykuna kanqa juzganä junaq manarä chämuptinmi.
Tsay junaqqa mantsariypämi kanqa.
32 (3.5) Tsaynö kaptinpis noqata mañakamaq kaqtaqa pïmaytapis salvashämi.†
Awninqänöllami Sión jirkancho kaykaq Jerusaléncho runakunata salvashä.
Qayanqä kaqkunataqa llapantami salvashä”.