Llapan nación runakunata Tayta Dios juzgananpä ninqan
3
(4.1) Tayta Diosmi nin:“Tsay junaq chämuptinmi Judá runakunatapis y Jerusalén runakunatapis alli kawayänanpä yanapashä.
2 (4.2) Llapan nación runakunata qoriskirmi Josafat Pampamana apashä.
Tsaychömi paykunata juzgashä kuyanqä Israel runakunapa contran kayanqanpita.
Rikatsinqä nacionninpitami Israel runakunata tsay contrankuna maytsay nacionkunaman qarquyashqa.
Israel nación kikïpa kaykaptinpis kikinkunapämi rakipänakuyashqa.
3 (4.3) Suertita jitaypami kuyanqä runakunata rakipänakuyashqa.
Wamrakunata ollqutapis warmitapis rantikurmi ushayashqa.
Tsay qellaywanmi upyayashqa y prostitüta warmikunawan kakuyashqa.
4 (4.4) “¡Tiro y Sidón markacho taq runakuna!†
¡Filistea nacioncho taq runakuna!†
¿Imanirtä ajanätsiyämanki?
¿Imanirtä conträ shäriyanki?
Ichikllanami pishiykan qamkunata castiganäpä.
5 (4.5) Qamkunaqa suwapaskamarmi qellaynïtapis, qorïtapis tesörükunatapis templuykikunaman apakuyashqayki.
6 (4.6) Qamkunaqa Judá runakunatapis y Jerusalén runakunatapis karuman apaykurmi griego runakunapa wätayninkuna kayänanpä rantikuyashqayki.
7 (4.7) Karuman rantikushqa kayaptikipis kikïmi qorimushä.
Paykunata rantikuyanqaykinöllami qamkunatapis rantikuyäshayki.
8 (4.8) Ollqutapis warmitapis tsurikikunata Judá runakunamanmi rantikushä.
Paykunanami karucho taq sabeo runakunaman rantikuyanqa.
Noqa Tayta Diosmi tsaynö nï”.
9 (4.9) Maytsay nacionkunacho willakuyay:
“¡Guërraman aywayänaykipä kamarikuyay!
¡Alli chölunnin kaq soldädukunata qoriyay!
¡Geniu kaqkunaqa llapaykikuna guërraman aywayay!
10 (4.10) Lampaykikunapita espädaykikunata rurayay.
Ösikikunapita lanzaykikunata rurayay.†
Kallpaynaq karpis ‘¡alli chölumi kä!’ niyay.
11 (4.11) Israelpa ñöpancho kaykaq nacionkuna, llapaykikuna ras qorikäyämuy”.
Tayta Dios, soldäduykikunata pushaykallämuy.
12 (4.12) “Llapan nación runakuna kamarikuskir Josafat Pampaman aywayätsun.
Tsaychömi Israelpa ñöpancho kaykaq nacionkunata juzgashä.
13 (4.13) Paykunapa jutsankunaqa pasaypa poqushqanami kaykan.
Poquraykaq trïguta ösiwan achuyanqannö wanutsiyay.†
Vïnuta ruraqkuna üvata jaruyanqannö ushakätsiyay.
Tsaynö rurayay juzgar castiganäpä kaq tiempu chämushqana kaptin”.†
14 (4.14) Juzgana Pampachöqa waranqanpa waranqapami runakuna qorikashqa kaykäyan.
Paykunata Tayta Dios juzganan junaq chämunqanami.
15 (4.15) Tsay junaqqa rupaypis killapis tsakanqami.
Qoyllurkunapis manami atsikyäyanqanatsu.
16 (4.16) Tayta Diosmi Sión jirkanpita patsa leonnöpis qayarämunqa.
Jerusalénpita patsa qayakamunqanmi maqakuynörä wiyakämunqa.†
Tsaymi ciëlupis y kay patsapis tsuktsukyäyanqa.
Kuyanqan Israel runakunatami itsanqa castïgupita tsapanqa.
Judá runakunaman bendicionta churananpä kanqan
17 (4.17) Tayta Diosmi nin:
“Tsay junaq chämuptinmi musyayanki Tayta Diosnikikuna kanqäta.
Noqaqa santu Sión jirkanchömi täkü.
Jerusalénqa santu markämi kanqa.
Tsaymi jäpa nación runakuna imaypis vinciyanqanatsu.
18 (4.18) Tsay witsanmi jirkakunacho y jirkankunacho vïnupis y lichipis yakunörä atska kanqa.
Judá nacioncho raqrakunapapis mana tsakiypami yaku aywanqa.†
Templü rurinpita yaku pashtamurmi Sitim Pampatapis† qarpanqa.b
19 (4.19) “Egipto nacionpis raqällami rikakunqa.
Edom nacionpis pasaypa tsunyaqmi tikranqa.
Tsaynö ushakäyanqa Judá nacionta atacar jutsaynaqkunata wanutsir ushayanqanpitami.
20 (4.20) Judácho y Jerusalénchömi itsanqa imaypis runakuna täyanqa.
21 (4.21) Kikïpis Sión jirkanchömi täshä.
Runakunata tsaycho wanutsiyanqanpitami mana perdonaypa llapanta juzgashä”.