Salmo 45 (44)
Rey majatsakaptin cantapanqan
(1) Cantaqkunapa mandaqninpämi. Liriu waytakuna niyanqan cantupa tönunwan kay salmuta cantayanki. Corépita aywaraqkuna qellqayanqan salmumi. Kuyanqanta cantapanqan.
1 (2) Kuyayllapä cantumi shonqücho kaykan.
Tsay cantutami reyta kushishqa cantapäshä.
Shumaq cantukunatami payta cantapäshä.
2 (3) Llapan runakunapitapis mas kuyayllapämi kaykanki.
Maypis wiyakuy munaypämi parlanki.
Tayta Diosmi bendicionninta qamman imaypis churamun.
3 (4) Shumaq rikakänaykipä tseqllaykiman espädaykita jatikuy.
Espädaykiwanrämi runa runa ichiranki.
4 (5) Munayyuq karmi cawalluta muntarkur vinciq vinciqllana guërraman aywanki.
Awniyämanqaykita cumplir washäyämänaykipämi yarqunki.
Qollmi shonqukunapa favornin yarqurmi mana alli runakunata imaypis vincinki.
Derëcha kaq makikiwanmi pasaypa mantsariypä kaqkunata imaypis ruranki.
5 (6) Qampa flëchaykikuna llawchi puntami kaykan.
Flëchaptikimi contraykikunapa shonqunmanpis yaykun.
Llapan contrayki nacionkunatami vincinki.
6 (7) Tayta Dios, trönuykichömi imayyaqpis mandaq kaykanki.
Qamqa llapantapis allimi mandanki.
7 (8) Pipis allita ruraptinqa kushikunkimi.
Mana allita ruraptinqa ajanankimi.
Tsaymi Tayta Dios qamta churashushqayki pïmaypitapis mas kushishqa kanaykipä.†
8 (9) Mïrra mïrra, áloe áloe y canëla canëlami latsapaykikunapis mushkun.
Kuyayllapä marfilwan adornashqami palaciuykikunapis.
Tsaycho arpakunata tukayaptinmi kushikunki.
9 (10) Palaciuykichöqa princesakunapis atskami kaykäyan.
Derëchaykichömi majatsakänaykipä kaq reina jamaraykan.
Paypa latsapanqa Ofirpita apamunqan qori püruwan adornashqami kaykan.
10 (11) Hïja, shumaq wiyamay.
Kanan yätsinqäta shumaq tantiyakuy.
Marka mayikikunapä y castaykikunapä ama yarparaynatsu.
11 (12) Kuyayllapä kaptikimi rey kuyashunki.
Runayki kaykaptinnaqa payllatana cäsukunki.
12 (13) Tiro markapita runakunapis qarayäshunaykipämi imallatapis apakurkur qamman shayämunqa.
Imaykayuq runakunapis yanapanaykipämi rugakuyäshunki.
13 (14) Majatsakänanpä kaq jipashmi kuyayllapä kaykan.
Latsapanpis qoriwan adornashqa karmi chipipiykan.
14 (15) Kuyayllapä bordashqa latsapan jatishqatami rey kaqman pushaykäyan.
Jipashkunapis qepantami aywaykäyan.
Yanasankunapis fïlayllapami aywaykäyan.
15 (16) Pasaypa kushikurmi reypa palaciunman yaykuykäyan.
16 (17) Tayta rey, tsurikikunapis unay castaykikunanömi rey kayanqa.
Paykunatami mandar yanapayäshunaykipä maytsay markakunaman churanki.
17 (18) Kay cantanqäta cantarmi runakuna imaypis yarpäyäshunki.
Entëru nacionchömi imaypis alabayäshunki.