Salmo 46 (45)
Tayta Dios tsapämaqnintsik kanqan
(1) Cantaqkunapa mandaqninpämi. Corépita aywaraqkuna qellqayanqan salmu. Kënata tukayllapa cantayanki.
1 (2) Tayta Diosmi amparakunantsik törrinö kaykan.
Paymi imapitapis tsapämantsik.
Ima ñakaycho kashqapis yanapamantsikmi.
2 (3) Patsa pasaypa kuyuptinpis ama mantsarishuntsu.
Jirkakuna lamarman jitarpukäyaptinpis ama llakikushuntsu.
3 (4) Lamar bunyaypa bunyar pulchaqyaptinpis y jirkakuna kuyuyaptinpis ama mantsarishuntsu.† Selah
4 (5) Juk mayumi kaykan Tayta Dios akranqan markacho taqkuna kushikuyänanpä.a
Tsay runakunaqa poderyuq Tayta Dios tanqan markachömi täyan.†
5 (6) Tayta Dios tsaycho kaptinmi tsay markata imaypis vinciyanqatsu.
Paymi tutapita patsa tsaycho taq runakunata yanapan.
6 (7) Yanapaptinmi juklä nación runakuna qayarar tsuktsukyäyan.
Parlamuptinmi kay patsapis rachikäkun.
7 (8) Llapanta mandaq Tayta Diosmi noqantsikwan kaykan.
Jacob sirvinqan Tayta Diosmi imaykapitapis tsapämantsik. Selah
8 (9) Espantaypä kaqkunata Tayta Dios ruranqanta rikayänaykipä shayämuy.
Paymi kay patsacho mantsariypä kaqkunata ruran.
9 (10) Mandaptinmi maytsaychöpis guërra kannatsu.
Flëchakunatapis lanzakunatapis llapanta pakirmi ushan.
Guërra carrëtakunatapis chipyaqmi rupatsir ushan.
10 (11) Tayta Diosmi nin:
“Amana llakikuyaynatsu.
Tantiyakuyay munayyuq Tayta Dios kanqäta.
Munaynïchömi maytsay nacionkunapis kaykan.
Makïchömi entëru kay patsapis kaykan”.
11 (12) Llapanta mandaq Tayta Diosmi noqantsikwan kaykan.
Jacob sirvinqan Tayta Diosmi tsapämaqnintsik kaykan. Selah