Salmo 47 (46)
Tayta Dios rey kanqan
(1) Cantaqkunapa mandaqninpämi. Corépita aywaraqkuna qellqayanqan salmu.
1 (2) ¡Entëru nacionkunacho taq runakuna!
Taqllakuyllapa Tayta Diosta alabayay.
Kushikurnin llapaykikuna cantayay.
2 (3) Poderyuq Tayta Diosqa mantsariypämi.
Paymi entëru kay patsacho kaqkunapa mandaqnin rey.
3 (4) Paymi yanapamashqantsik juk nacionkunatapis vincinantsikpä.
Tsay runakunatami makintsikman churamushqa.
4 (5) Herenciantsik kananpämi taykanqantsik nacionta kikin qaramashqantsik.
Tsaymi kuyanqan Jacobpita aywaraqkuna kar kushishqa kawantsik. Selah
5 (6) Tayta Diosmi trönunman witsarqan.
Witsaptinmi runakuna kushikurnin qayaräyarqan y cornëtatapis tukayarqan.
6 (7) Tayta Diosta alabashun.
Mandamaqnintsik reyta alabashun.
7 (8) Paymi entëru patsacho kaqkunapa mandaqnin rey.
Salmuta cantar llapan shonquntsikwan payta alabashun.
8 (9) Tayta Diosmi llapan nacionkunapa mandaqnin rey.
Paymi sagrädu trönuncho jamaraykan.
9 (10a) Llapan nacionkunacho taq mandaq runakunami Tayta Dios kuyanqan runakunawan qorikäyan.
Abraham yärakunqan Tayta Diosta alabayänanpämi qorikäyan.
10 (10b) Kay patsacho llapan mandaqkunapis Tayta Diospa munayninchömi kaykäyan.
Tayta Diosqa llapanpitapis mas munayyuqmi kaykan.