Salmo 48 (47)
Sión jirkancho Tayta Dios tanqan
(1) Cantanapä. Corépita aywaraqkuna qellqayanqan salmu.
1 (2) Tayta Diosnintsikqa munayyuqmi.
Täkunqan markacho payta imaypis alabashun.
Sagrädu jirkancho payta imaypis adorashun.
2 (3) Sión jirkanqa kuyayllapämi kaykan.
Tsay jirkanta rikarmi kay entëru patsacho runakuna kushikuyan.
Norti kaqlächömi tsay jirkan kaykan.
Llapanpä munayyuq Reymia tsaycho taykan.†
3 (4) Tayta Diosmi rikachakuna törrikunapita Jerusalén markata cuidaykan.
Paymi Jerusaléncho taqkunata imapitapis tsapan.
4 (5) Reykuna qorikaykurmi Jerusalénta atacayänanpä aywayarqan.
5 (6) Tayta Dios cuidaykanqanta rikaykurmi pasaypa mantsakäyarqan.
Ima ruraytapis mana kamäpakurmi jinan höra qeshpir aywakuyarqan.
6 (7) Warmita qeshyakunanpä nanay tsarinqannömi paykunata pasaypa mantsariy tsarirqan.
7 (8) Tarsispita shamuq büquikunata shukukuy wayra pasaypa ushakätsinqannömi tsay runakunata ushakätsishqayki.
8 (9) Llapanta mandaq Tayta Diosnintsik tanqan markacho tsaynö päsanqantami rikashqantsik.
Tsaynöllami unay päsanqantapis willamashqantsik.
Tayta Diosmi Jerusalénta imaypis rikanqa. Selah
9 (10) Tayta Dios, templuykiman qorikarmi kuyakuq kanqaykita yarpäyä.
10 (11) Munayyuq kanqaykita musyarmi entëru kay patsachöpis alabaykäyäshunki.
Munayyuq karmi imaypis allillata ruranki.
11 (12) Sión jirkanchöpis kushikuyätsun.
Judá markakunachöpis kushikuyätsun.
Runakunata mana jananpaypa juzganqaykipita kushikuyätsun.
12 (13) Sión jirkanta tumapäyay.
Ayka törrikuna kayanqantapis yupayay.
13 (14) Marka murällatapis y amparakuna wayinkunatapis shumaq rikayay.
Waray warantin qepa yuriqkunatapis imanö kanqanta willayänaykipä rikayay.
14 (15) Tayta Diosqa imaypis Diosnintsikmi kaykan.
Wanunqantsikyaqpis paymi rikaykämantsik.