Salmo 49 (48)
Riquëzakunaman mana yärakunantsikpä kanqan
(1) Cantaqkunapa mandaqninpämi. Corépita aywaraqkuna qellqayanqan salmu.
1 (2) Maytsaychöpis taq runakuna, kay ninqäta shumaq wiyakuyay.
2 (3) Imaykayuqkuna, muchuqkuna, mandaqkuna y común runakunapis, kay ninqäta wiyakuyay.
3 (4) Shumaq yarpachakuykurmi kanan parlapäyäshayki.
Shonqücho yarpachakunqätami kanan niyäshayki.
4 (5) Shumaq yachatsikuytami yachatsiyäshayki.
Arpata tukaqnöllami ima yarpanqätapis tantiyatsiyäshayki.
5 (6) Ama mantsarishuntsu ima desgracia päsamashqapis.
Ama mantsarishuntsu chikimaqnintsikkuna contrantsik shäriptinpis.
6 (7) Paykunaqa riquëzankunamanmi yärakuyan.
Imaykayuq kayanqanpitami alabakuyan.
7 (8) Tsaynö karpis wanuypita manami salvakuyanqatsu.
Manami pipis Tayta Diosta pägantsu wanuypita salvananpä.
8 (9) Imaykayuq kaptinpis qellaynin manami aypantsu kawayninta rantinanpä.
9 (10) Manami pipis mana wanuqqa kantsu.
Runaqa ushakaqllami kaykan.
10 (11) Yachaq runapis upa runapis wanunmi.
Qorinqan riquëzanqa jukpänami quëdan.
11 (12) Atska chakrayuq kaptinpis sepultürallami wayin kanqa.
Mana yarqamuypami imayyaqpis pamparanqa.
12 (13) Runaqa mayjina imaykayuq karpis manami mana ushakaypaqa kawantsu.
Uywakunanöllami wanur ushakan.
13 (14) Tsaynöllami ushakäyanqa kallpankunallaman yärakuqkuna.
Tsaynöllami ushakäyanqa runa tukuqkuna. Selah
14 (15) Pishtananpä üshata qatiyanqannömi tsay runakunata wanuy qatiraykan.
Wanuqkuna kaykäyanqan kaqmanmi apaykan tsaycho ushakäyänanpä.
Paykunapa wayinqa sepultürallami kanqa.
Wanuskiyaptinqa alli runakuna kushikuyanqami.
15 (16) Noqami itsanqa pamparanqallächöqa ushakäshätsu.
Tayta Diosmi ñöpanman pushakamanqa. Selah
16 (17) Pipis imaykayuq rikakuptin y wayincho imaykanpis kaptin ama chikiyaytsu.
17 (18) Wanurqa manami imatapis apanqatsu.†
Jinayllami aywakunqa.
18 (19) Kawanqanyaq kushishqa karpis y imaykayuq kanqanpita runakuna alabayaptinpis 19 (20) paypäpis wanuy chämunqami.
Tsaypitaqa manami atsikyay patsata rikanqanatsu.
20 (21) Runaqa mayjina imaykayuq karpis manami mana ushakaqtsu kaykan.
Uywakunanöllami wanur ushakan.