Salmo 50 (49)
Tayta Dios llapanta juzgaq kanqan
(1a) Asaf qellqanqan salmu.
1 (1b) Munayyuq Tayta Diosmi kay patsacho taqkunata qayaykätsin.
Rupay yarqamunan kaqlächo taq runakunatapis y rupay jeqanan kaqlächo taq runakunatapis llapantami qayaykätsin.
2 Tayta Diosqa Sión jirkanpita patsami chipipïmun.
Tsay jirkanqa llapanpitapis mas kuyayllapämi.
3 Tayta Diosnintsikqa shamuykannami.
Shamunqanqa wiyakaykämunnami.
Ñöpantami shamuykan imaykatapis rupar ushaq nina.
Ñöpankunachömi mangäda tamyapis y maqakuypis kaykan.
4 Israel runakunata juzgarmi ciëlutapis y kay patsatapis qayan testïgu kayänanpä.
5 Paymi nin: “Sacrificiuta rurar noqawan pactu ruraqkunata† qoriyämuy”.
6 Ciëlupis willakun Tayta Dios alli juzgaq kanqantami.
Paymi pïmaytapis juzgan. Selah
7 Tayta Diosmi nin:
“Kuyanqä Israel runakuna, kanan ninqäta shumaq wiyayämay.
¡Noqami Dios kä!
¡Noqallami Diosniki kaykä!
Tsaymi jutsata rurayanqaykipita juzgar shimpiyäshayki.
8 “Sacrificiukunata noqapä rupatsiyanqaykiqa allimi kaykan.
Ñöpächo imaypis rupatsiyaptikimi kushikü.
9 Tsaynö kaptinpis torïtukunata corralnikipita manami munätsu.
Cabrakunatapis qenchaykipita manami mañakütsu.
10 Noqapami kaykan munticho kaq uywakunapis y maytsay jirkakunacho kaq wäkakunapis.
11 Llapan casta pishqukunatapis reqïmi.
Imayka niraq uywakunapis noqapami kaykan.
12 Kay patsapis y kay patsacho kaqkunapis noqapa kaykaptinqa mallaqarpis manami qamkunatarätsu mañaküman.
13 Törupa aytsanta mikurtsu ni chïvupa yawarninta upurtsu kawä.
14 “Apayämunqayki sacrificiumi kanman llapan shonquykikunawan agradëcikayämanqayki.
Tsaynöpis llapan awniyämanqaykita cumpliyay.
15 Ñakaykuna shamuptin mañakayämay.
Mañakayämaptikiqa yanapayäshaykimi.
Yanapanqäta tantiyakurmi alabayämanki”.
16 Mana alli runatami Tayta Dios nin:
“Qamqa ¿imanirtä leynïkunata willakur puriykanki?
Runakunawan pactu ruranqäpitapis ¿imanirtä parlar puriykanki?
17 Qamqa manami corrigiptïpis chaskikunkitsu.
Yätsinqäkunatapis manami cäsukunkitsu.
18 Suwakunawanpis tsay yarpayllami kaykanki.
Majanta qanrataqkunawanpis takukaykankimi.
19 Shimikiman chämunqantami llutankunata parlaykanki.
Llullakunaykipäqa juiciuykipis kanmi.
20 Wawqikitapis manakaqtami tumpaykanki.
Tsay mamallapita kaykarmi ashlliykanki.
21 Tsaykunata ruraptikipis manami imatapis parlakurqätsu.
¿Mana parlakuptïku qamnö kanqäta yarpanki?
Kananqa shumaq ichiykatsirmi shimpishayki.
Llapan ruranqaykitami jipipäshayki.
22 “Mana cäsukamaqkuna, ninqäkunata shumaq tantiyakuyay.
Illaqpita shamur ushakätsiptï manami pipis salvayäshunkitsu.
23 Agradëcikayämanqaykiqa rasunpa kaq sacrificiumi.
Tsaynö agradëcikayämarmi respitayämanki.
Munanqänö kawaqkunataqa salvashämi”.