Salmo 51 (50)
Jutsanpita perdonananpä mañakunqan
(1-2) Cantaqkunapa mandaqninpämi. Betsabéwan David adulteriu jutsata ruranqanpitami profëta Natán ollqutuparqan. Tsaymi jutsa ruranqanpita arrepentikur kay salmuta David qellqarqan.†
1 (3) Kuyapäkuq Tayta Dios, perdonaykallämay.
Kuyapäkuq kaynikiwan jutsäta qonqaykullay.
2 (4) Mana allikunata ruranqäpita mayllaykallämay.
Jutsäpita perdonaykallämay.
3 (5) Musyämi mana wiyakuq kanqäta.
Jutsätaqa imaypis yarparaykämi.
4 (6) Jutsata rurar qampa contraykimi shärishqä.†
Qamta mana cäsukurmi ajanätsishqä.
Tsaymi rasun kaqcho juzgaykämanki.
Imanö tsapäkuytapis manami kamäpakütsu.†
5 (7) Yurinqä junaqpita patsami jutsasapa kaykä.
Jutsayuqtami mamäpis wachamashqa.
6 (8) Jutsa ruranqanta reconöcikuqtaqa kuyankimi.
Jutsayuq kanqäta qammi shonqücho tantiyatsimanki.
7 (9) Hisöpu jachawan purificamaptikiqa limpiumi kashä.†
Mayllamaptikiqa rashtapitapis mas yuraqmi kashä.†
8 (10) Kushikuyta shonqüman churaykallämuy.
Llakikuyman churamashqa karpis yapay kushikaykatsillämay.
9 (11) Jutsäpita perdonaykallämay.
Llutan ruranqäta ama yarparaykullaytsu.
10 (12) Tayta Dios, munanqaykinö kawanäpä limpiu shonquta qaraykallämay.
Nimanqaykita imaypis cäsukunäpä yanapaykallämay.†
11 (13) Ñöpaykipita ama qarqaykallämaytsu.
Espíritu Santuykitapis ama qechuykallämaytsu.
12 (14) Salvamanqaykipita yapay kushishqa kawanäpä yanapaykallämay.
Cäsukuq kanäpä tantiyaykatsillämay.
13 (15) Tsaynöpami mana cäsukuqkunata cäsukuyäshunaykipä willashä.
Jutsa rurayninkunata kacharirmi qamtana cäsukuyäshunki.
14 (16) Salvamaqnï Tayta Dios, runa mayïta wanutsinqäpita perdonaykallämay.
Perdonamanqaykipitami kushishqa cantarnin imaypis alabashayki.
15 (17) Llapan shonqüwan alabanäpä yanapaykallämay.
16 (18) Sacrificiuta apamunäta manami munankitsu.
Apamunäta munaptikiqa apamümanmi.†
17 (19) Sacrificiuta apamunäpa trokinqa jutsata kacharir llapan shonqüwan humillakunätami munanki.
Tayta Dios, jutsata ruranqanpita llakikuqkunataqa kuyapankimi.†
18 (20) Siónta kuyapaykullay.
Jerusalénpa murällanta allitsaykullay.
19 (21) Tsaymi ninqaykinö sacrificiukunata rupatsiyäshä.
Torïtukunatapis altarnikichömi rupatsiyäshä.