Salmo 52 (51)
Mana alli runa allish tukunqan
(1-2) Cantaqkunapa mandaqninpämi. Doeg jutiyuq edomita runa Saúl kaqman aywaykur Ahimelecpa wayincho David kanqanta willaskiptinmi kay salmuta David qellqarqan.†
1 (3) Munayyuq kar ¿imanirtä mana allita ruranqaykipita runa tukunki?
Tayta Diosqa imaypis kuyakuqmi.
2 (4) Qamqa mana allita ruranallaykipämi yarpachakuykanki.
Runa mayikita llutalla tumpanqaykimi imayka fïlu cuchillunö kaykan.
3 (5) Allita ruranaykipa trokinqa llutantami ruraykanki.
Rasun kaqta parlanaykipa trokinqa llullakuyllatami yachanki. Selah
4 (6) Pitapis manakaqman churarmi imaypis llullakunki.
5 (7) Tsaynö kanqaykipitami wayikipita Tayta Dios qarqushunki.
Wanuskatsishurnikimi chipyaq ushakätsishunki. Selah
6 (8) Tayta Diosta cäsukuqkunaqa tsayta rikar mantsariyanqami.
Asiparmi niyanqa:
7 (9) “Tsay runata Tayta Dios castiganqanta maski rikayay.
Payqa Tayta Diosman yärakunanpa trokin imaykayuq kayninmanmi yärakurqan.
Jutsa ruraytapis manami kacharirqantsu”.
8 (10) Noqaqa imayka raprasapa olïvu jachanömi Tayta Diospa wayincho kaykä.
Paypa kuyakuyninmanmi imayyaqpis yärakü.
9 (11) Tayta Dios, allillata ruraq kanqaykipitami imaypis agradëcikushayki.
Qamman yärakamuqkunapa ñöpanchömi imaypis alabashayki.