Salmo 53 (52)
Jutsa rurayllacho runa kawanqan
(1) Cantaqkunapa mandaqninpämi. Mahalat.a David qellqanqan salmumi.
1 (2) Mana tantiyakuq runakunami shonqunkunacho yarpar niyan: “Dios manami kantsu”.
Paykunaqa llutan rurayman uman churakashqami kaykäyan.
Ruranqankunapis pasaypa penqakuypämi kaykan.
Paykunaqa mayqanpis manami allitaqa rurayantsu.†
2 (3) Tayta Diosqa ciëlupita patsami runakunata rikaykämun.
Paymi pitapis tantiyakuqta ashiykan.
Tsaynöllami pitapis payta ashiqta ashiykan.
3 (4) Tsaynö kaykaptinpis llapan runakunami jutsa rurayllacho kawayan.
Llapanpis llutantami rurayan.
Pipis manami alli ruraq kantsu.†
Ni jukllayllapis manami kantsu.
4 (5) Mana alli runakunaqa ¿manatsurä imayllapis tantiyakuyanqa?
Paykunaqa tantata mikuqnömi Tayta Dios kuyanqan runakunata ushakaykätsiyan.
Tayta Diosta manami imaypis mañakuyantsu.
5 (6) Paykunaqa imapis mana kaykaptinmi pasaypa mantsakäyanqa.
Tayta Diosmi paykunata chikir penqakuyman churanqa.
Wanuskatsirmi tullunkunatapis wakpa kaypa mashtanqa.
6 (7) ¡Ima allirä kanman Siónpita patsa Israel runakunata Tayta Dios salvaptin!
Salvaptinmi Jacobpita aywaraq Israel runakuna pasaypa kushikuyanqa.