Salmo 54 (53)†
Tayta Dios salvananpä mañakunqan
(1-2) Cantaqkunapa mandaqninpämi. Cuerdayuq instrumentuta tukar cantayanki. Zif runakuna Saúl kaqman aywaykur paykuna täyanqanlächo David pakakunqanta willaskiyaptinmi kay salmuta David qellqarqan.
1 (3) Tayta Dios, pïmaypis jutikita parlananpä salvaykallämay.
Munayyuq kaynikiwan tsapaykallämay.
2 (4) Mañakamunqäta wiyaykallämay.
Ninqäkunata wiyaykallämay.
3 (5) Jäpa runakunami conträ rikakuyashqa.
Mana alli runakunami wanutsimayta munaykäyäman.
Tsay runakunaqa manami qampitapis mantsapakuyantsu.† Selah
4 (6) Tsaynö kaptinpis mana kachaypami yanapaykämanki.
Qam yanapamaptikimi kawaykärä.
5 (7) Ñakatsiyämanqanpita chikimaqnïkunatapis ñakaykatsillay.
Awnimanqaykita cumplir tsay runakunata ushakaykatsillay.
6 (8) Llapan voluntänïwanmi sacrificiupä uywata apamushä.
Tayta Dios, allillata ruraq kanqaykipitami jutikita joqarir alabashayki.
7 (9) Tsaynö alabashayki llapan llakikuypita jipimanqaykipitami.
Kikïpa ñawïwanmi rikashä conträkunata ushakätsinqaykita.