Salmo 55 (54)
Qatikachaptin Tayta Diosta mañakunqan
(1) Cantaqkunapa mandaqninpämi. Cuerdayuq instrumentuta tukar kay salmuta cantayanki. David qellqanqan.
1 (2) Tayta Dios, mañakamunqäta wiyaykallämay.
Rugakamunqäta chaskiykallämay.
2 (3) Qayakamuptï wiyaykallämay.
Pasaypa llakikuymi tsariman.
3 (4) Conträkuna jurapäyämaptinmi pasaypa mantsarï.
Jutsa ruraqkuna ñakatsiyämaptinmi llakishqa kaykä.
Paykunaqa imayka problëmamanmi jitarpayäman.
Pasaypa ajarmi conträ shäriyan.
4 (5) Wanuyparämi mantsariy tsariman.
Shonqüpis pasaypami tiktikyaykan.
5 (6) Mantsakaywanmi tsuktsukyaykä.
Pasaypa mantsariymi tsarimashqa.
6 (7) Tsaymi yarpachakur nï:
“¡Ay, imanöllarä palumapanö äläkuna yuriskinman!
Äläkuna kaptinqa karupa aywaskirchi añaw kaküman.
7 (8) Karupami pajarnin aywaküman.
Tsunyaqchöqa añawmi täkümanpis. Selah
8 (9) Mayna ras aywaküman.
Shukukuy wayrapita y mangäda tamyapita pakakuqnömi pakaräküman”.
9 (10) Conträkunatapis kikinpura rimanakuykaqta y pelyaykaqtami rikaykä.
Tayta Dios, paykunata ushakaykatsillay.
Willanakurpis amana tantiyanakuyätsuntsu.
10 (11) Paykunaqa paqaspapis junaqpapis markata tumaparmi puriykäyan.
Llapanpis jutsa rurayllachömi kawaykäyan.
11 (12) Cällikunachöpis wanutsinakullar y llullapänakullarmi kaykäyan.
12 (13) Conträ wajupämaptinqa manami cäsupämantsu.
Chikimaqnï qatikachämaptinqa qeshpirmi aywaküman.
13 (14) Kuyanqä y yärakunqä amïgü kaykar conträ shäriptinmi itsanqa pasaypa llakikü.
14 (15) Paywan juntumi Tayta Diospa wayinmanpis aywayaq kä.
Tsaychömi kushi kushi parlar juntu puriyaq kä.
15 (16) Chikimaqnïkunaqa illaqpita wanuyätsun.
Paykunataqa kawaykaqta pampayätsun.
Jutsa rurayllapämi shonqunkunachöpis yarparaykäyan.
16 (17) Noqami itsanqa Tayta Diosta mañakushä.
Paymi conträkunapa makinpita salvamanqa.
17 (18) Tutapapis, tardipapis y paqaspapis Tayta Diostami waqar mañakushä.
Payqa mañakunqäta wiyamanqami.
18 (19) Conträ shäriyaptinpis paymi tsapämanqa.
Chikimaqnïkuna atskaq kayaptinpis paymi salvamanqa.
19 (20) Conträ runakunaqa jutsa rurayninkunata manami kachariyantsu.
Tayta Diospitapis manami mantsapakuyantsu.
Tsaynö kaykäyaptinmi mañakunqäta wiyamar penqakuyman Tayta Dios churanqa.
Tayta Diosqa imayyaqpis reymi kaykan. Selah
20 (21) Conträ shäriqkunaqa amïgunkunatapis maqayanmi.
Kuyanakuyänanpä awnirkurpis manami cumpliyantsu.
21 (22) Paykunaqa alli shimillanpa parlaparpis shonqunkunachöqa amïgunta nanaparaykanmi.
Mishki mishkilla parlapanqanpis imayka afilashqa cuchillunörämi.
22 (23) Llapan llakikuynikikunata Tayta Diospa munayninman churaykuyay.†
Paymi imachöpis yanapashunki.
Cäsukuqkunataqa manami imaypis qonqaykuntsu.
23 (24) Tayta Dios, runa mayinta wanutsiqkuna y llullakuqkunaqa wallka watalla kawayätsun.
Chölullarä kaykar wanuyätsun.
Noqaqa qamllamanmi imaypis yärakamushä.