Salmo 14 (13)
Llapan runakuna jutsata rurar kawayanqan
(1a) Cantaqkunapa mandaqninpämi. David qellqanqan salmu.
1 (1b) Mana tantiyakuq runakunami shonqunkunacho yarpar niyan: “Dios manami kantsu”.
Paykunaqa llutan rurayman uman churakashqami kaykäyan.
Ruranqankunapis pasaypa penqakuypämi kaykan.
Paykunaqa mayqanpis manami allitaqa rurayantsu.†
2 Tayta Diosqa ciëlupita patsami runakunata rikaykämun.
Paymi pitapis tantiyakuqta ashiykan.
Tsaynöllami pitapis payta ashiqta ashiykan.
3 Tsaynö kaykaptinpis llapan runakunami jutsa rurayllacho kawayan.
Llapanpis llutantami rurayan.
Pipis manami alli ruraq kantsu.†
Ni jukllayllapis manami kantsu.
4 Mana alli runakunaqa manami imaypis tantiyakuyantsu.
Paykunaqa tantata mikuqnömi Tayta Dios kuyanqan runakunata ushakaykätsiyan.
Tayta Diosta manami imaypis mañakuyantsu.
5 Tsaynö kaptinpis cäsukuqkunawanmi Tayta Dios kaykan.
Tsayta rikarmi mana alli runakuna tsuktsukyayparä mantsakäyan.
6 Paykunaqa muchuq runakuna yarpäyanqanman tsapatami churapäyan.
Tayta Diosmi itsanqa muchuq runakunata yanapan.
7 ¡Ima allirä kanman Siónpita patsa Israel runakunata Tayta Dios salvaptin!
Salvaptinmi Jacobpita aywaraq Israel runakuna pasaypa kushikuyanqa.