Salmo 44 (43)
Tayta Dios yanapaykunanpä mañakunqan
(1) Cantaqkunapa mandaqninpämi. Corépita aywaraqkuna qellqayanqan salmumi.
1 (2) Tayta Dios, awilükunami willayämashqa mantsakaypä kaqkunata rurar unay castäkunata imanö yanapanqaykitapis.
2 (3) Kay nacioncho täyänanpämi unay runakunata qarqur ushakätsirqayki.
3 (4) Manami kikinkunapa kallpankunawantsu kay nacionta qechuyarqan.
Ni espädankunawantsu kaycho taq runakunata vinciyarqan.
Tsaypa rantinqa kikikimi derëcha kaq makikiwan vincirqayki.†
Unay castäkunata kuyarmi yanaparqayki.
4 (5) Tayta Dios, qammi mandamaqnï rey kaykanki.
Qammi yanapayämashqayki conträkunata vinciyänäpä.
5 (6) Yanapayämaptikimi conträkunata vinciykäyä.
Qampa jutikichömi atacamaqkunata ushakätsiyä.†
6 (7) Vinciyänäpäqa manami flëchakunämantsu yärakuyä.
Manami espädäkunatsu salvayäman.
7 (8) Qam yanapayämaptikimi conträkunata vinciyashqä.
Qammi chikimaqnïkunata penqakuyman churashqayki.
8 (9) Qamtami imaypis kushishqa agradëcikuyäshayki.
Jutikita joqarirmi imaypis alabayäshayki. Selah
9 (10) ¿Imatä päsashqa jaqiriykayämänaykipä?
Kachariyämaptikimi pasaypa penqakushqa puriykäyä.
Soldädükunatapis mananami yanapaykankinatsu.†
10 (11) Atacayämänanpä conträkunata yanapaptikimi qeshpir aywakuyashqä.
Tsaymi paykunaqa yaykaskamur imäkunatapis munanqan kaqta apakuyashqa.
11 (12) Pishtananpä kaykaq üshatanömi conträkunapa makinman churayämashqayki.
Juklä nacionkunacho mashtakashqa kayänäpämi qarqariykayämashqayki.
12 (13) Kuyanqayki runakuna kaykäyaptïpis wallka chaninllachömi rantikayämashqayki.
Rantikayämanqaykiwan imatapis manami jipishqaykitsu.
13 (14) Pïmaypis ashlliyämänanpämi jaqiriykayämashqayki.
Juklä nacionkuna wajupäyämarninmi manakaqman churayäman.
14 (15) Tsay nación runakuna manakaqman churayämänanpämi jaqiriykayämashqayki.
Rikaskayämarmi umankunatapis awipäyäman.
15 (16) Tsaymi imay hörapis pasaypa penqakushqa kayä.
Qaqlläkunapis pasaypa pukayashqami kaykan.
16 (17) Tsaynö rikakuyä conträkuna chikiyämaptin y ashlliyämaptinmi.
17 (18) Tsaykuna päsaykäyäman pactu ruranqantsikta cumpliykäyaptïmi.
18 (19) Ninqaykikunataqa imaypis mana qonqaypami cumpliyashqä.
19 (20) Tsaynö kaykäyaptïmi imapis mana kanqanman qaykariykayämashqayki.
Pasaypa mantsariypä tsakaychönö kayänäpämi kachariykayämashqayki.
20 (21) Qamta adorayänäpa trokin juk diosta adorayaptïqa
21 (22) musyaskinkimanmi karqan.
Tayta Dios, qamqa llapantami musyanki.
22 (23) Munanqaykinö kawayaptïmi chikiyämar imaypis wanutsiyäman.
Pishtayänanpä üshanömi kaykäyä.†
23 (24) ¡Rikchay, Tayta Dios!
¿Imanirtä punukunki?
¡Amana jaqiriyämaynatsu!
24 (25) ¿Imanirtä noqakunapita pakakunki?
¿Imanirtä qonqaskayämashqayki?
¡Imanö ñakatsiyämanqantapis rikaykullay!
25 (26) Vinciyämaptinmi ima ruraytapis kamäpakuyänatsu.
Penqakuyllawanmi umpukashqa puriykäyä.
26 (27) Taytay, yanapaykayällämay.
Kuyapäyämar salvaykayällämay.