Dagón Dagónqa karqan filisteo runakuna adorayanqan diosmi. Mikuyninkuna alli wayunanpä kanqanta yarparmi tsay diosta adorayaq. Dios kanqanta yarpäyaptinpis manami rasunpaypatsu dios karqan (Jue. 16.23; 1Sam. 5.1-7).

Davidpa Markan Davidpa Markanqa manami David yurinqan Belén markatsu karqan, sinöqa Sión jirkancho kaykaq Jerusalén markami. Tsaynö jutin karqan jebuseo runakunata tsaypita David qarqushqa kaptinmi (2Sam. 5.6-7). Tsaychömi reypa palaciunta y templuta shäritsiyarqan. Jerusalén marka jatun kaptinpis Sión jirkancho kaykaq partillatami Davidpa Markan kanqanta niyan.

Davidpa Tsurin Davidpa Tsurin nirqa Tayta Dios kachamunqan Cristupämi niyarqan. Tsaynö niyarqan rey Davidpita aywaraqkunapita Cristo yurinanpä Tayta Dios awnishqa kaptinmi (2Sam. 7.10-16; Sal. 89.1-4, 19-37; 132.11-12; Isa. 11.1-10). Jesucristo salvakuq Cristo kanqanta tantiyarmi Davidpa Tsurin kanqanta niyarqan (Mat. 9.27; 12.23; 21.9; 22.41-46).

diäcunu; diacunïsa Diäcunu ninanqa iglesiacho yanapäkuq ninanmi. Diäcunukunaqa manami yachatsikuqtsu kaykäyan, sinöqa patsätsikuq, iglesiata allitsatsiq, mikuyta, latsapata y jampita qoriskir waktsakunata aypuq y qeshyaykaqkunata watukaqmi kaykäyan. Mas wakin ruraykunatapis rurayanmi. Diäcunukunaqa Tayta Dios munanqannö kawaq runakunami kayanman (1Tim. 3.8-13). Diäcunukuna yanapäkuq kayaptinpis wakin wawqikuna panikunapis yanapäkuqmi kayanman (2Cor. 8.7). Diacunïsakunapis kayanmi (Rom. 16.1).

diezmu Diezmuqa cada chunkapita jukta Tayta Diospä rakinqanmi kaykan. Tsaytaqa rakiyan qellaypita, uywakunapita y mikuykunapitami (Gén. 14.17-20; Deut. 14.22; Mat. 23.23).

discïpulu Discïpuluqa yachaq runawan purir yachakuq runami kaykan. Mushuq Testamentuchöqa Jesucristupa, Bautizaq Juanpa y fariseukunapa discïpulunkunapämi parlan. Jesucristupa discïpulunkunaqa atskami kayarqan (Luc. 6.17; 19.37). Tsay discïpulunkunapitami chunka ishkayta akrarqan apostolninkuna kayänanpä (Mat. 5.1; Mar. 2.18).