efod Efodqa sacerdöti jatikunan mandilmi karqan. Tsaytaqa Israelcho mas mandaq sacerdötimi latsapan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas juk niraq efodta jatikuyaqmi. Tsay runakuna kayarqan Samuel (1Sam. 2.18), David (2Sam. 6.14), Nobpita kaq sacerdötikuna (1Sam. 22.18) y Micaía (Jue. 17.5).

Efraín Efraínqa karqan Josépa tsurin y Jacobpa willkanmi (Gén. 41.52; 48.5). Bendicionninta Jacob churanqanpitami Efraínpita aywaraqkunapis Canaáncho herencianta chaskiyarqan (Gén. 48.6). Tsaypita mas qepatanami norti kaqläman rakikaq Israel runakunapa nacionninta Efraín nación kanqanta niyarqan. Tsay norti kaq naciontaqa aybësis “Samaria” niyarqan (2Rey. 17.24; 23.18; Ose. 7.1), aybësis “Efraín” niyarqan (2Crón. 25.7; Ose. 4.17) y aybësis “Israel” niyarqan.

Epicúreo Epicúreo runakunaqa kayarqan Epicúreo jutiyuq runapa yachatsikuyninta chaskikuqkunami. Epicúreumi yachatsir nirqan: “Alli kawanantsikpä alli amïguntsikkuna kayätsun, mana alli runakunapita witikushun. Tsaynöpis Tayta Diospä y wanur mayman chänantsikpä kanqantapis ama yarpachakushuntsu”. Apóstol Pablumi Atenas markacho Epicúreo runakunata Jesucristupa alli willakuyninta willaparqan (Hech. 17.18).

Estoico Estoico runakunaqa kayarqan Zenón jutiyuq runapa yachatsikuyninta chaskikuqkunami. Zenónmi yachatsir nirqan: “Alli kawanantsikpä allillata rurashun, shumaq tantiyakushun y imanö ñakarpis pacienciakushun. Tayta Diosman yärakunantsikpa trokinqa kikintsik tantiyakunqantsikman y wakin yachaqkuna niyanqankunaman yärakushun”. Apóstol Pablumi Atenas markacho Estoico runakunata Jesucristupa alli willakuyninta willaparqan (Hech. 17.18).

eunucu Eunucu runakunaqa capashqa runakunami kaykäyan. Tsay witsanmi runakunata akraykur reykuna capatsiyaq warmikunata mana munapäyänanpä. Nirkurnami tsay capashqa runakunata churayaq reypa warminkunata cuidayänanpäpis o mandashiyänanpäpis (Est. 2.3, 14; Hech. 8.27).