Faraón suëñunqanta José willanqan
41
Tsaypita ishkay wata päsaskiptinnami suëñuynincho Faraón Nilo mayu kuchuncho ichiraykänä. 2 Tsaychöshi kuyayllapä qanchis wera wäkakuna mayupita yarqaskamur ututu chawpincho qewata mikuykäyaqta rikanä. 3 Tsay wäkakunapa qepantanashi yarqayämunä melanaypä qanchis uyu wäkakuna. Tsay wäkakunashi mayu kuchuncho kuyayllapä wäkakunapa ñöpanman ichiskiyänä. 4 Melanaypä uyu wäkakunashi qanchis kuyayllapä wera wäkakunata mikuskiyänä. Tsayta suëñuykanqanchöshi Faraón rikchaskinä.5 Tsaypita yapay punukaskirnashi suëñuynincho rikanä juk yurallapita qanchis espïga trïgukuna wiñaykämuqta. Tsay espïgakunashi kuyayllapä atska gränuyuq kayänä. 6 Alli espïgakuna wiñayämunqan qepantanashi juk yurallapita qanchis espïgayuq trïgukuna wiñayämunä. Tsay trïgukunashi rupay yarqamunan kaqläpita shamuq wayra rupaptin pasha pashalla kayänä. 7 Tsay qarwashtashqa espïgakunashi qanchis kuyayllapä jatusaq espïgayuq trïgukunata mikuskiyänä. Tsayta suëñuykar Faraón rikchaskamunanpäqa tsay llapan rikanqankuna suëñuylla kanä.
8 Suëñunqan tutami pasaypa yarpachakur entëru Egiptucho llapan suerti qatiqkunata y yachaqkunata Faraón qayatsimurqan. Qayatsinqan runakuna chaykuyaptinmi willarqan imata suëñunqankunatapis. Tsaynö willaptinpis manami mayqanpis tantiyayarqantsu suëñunqankuna imapä kanqantapis.
9 Pipis tantiyatsiyta mana kamäpakuptinmi vïnu ruraqkunapa mandaqnin nirqan: “Tayta Faraón, juk runa rugakamanqantami tsayrä yarpashqä. 10 Pasaypa rabyarmi noqata y tanta ruraqkunapa mandaqninta wichqatsiyämarqayki capitanpa wayincho carcelman. 11 Tsaychömi tanta ruraqkunapa mandaqnin y noqapis ima päsayämänanpä kaqtapis tsay paqas suëñuyarqä. 12 Tsay carcelchömi juk hebreo chöluwan juntu wichqaräyarqä. Paymi wardiakunapa capitanninpa wätaynin karqan. Suëñuyanqäta willayaptïmi imapä kanqantapis tantiyatsiyämarqan. 13 Tsay chölu niyämanqannöllami llapanpis kashqa. Noqatami yapay arunäpä kutitsimashqayki y tanta ruraqkunapa mandaqnintami wanuskatsir qeruman warkutsishqayki”.
14 Tsaynö willaptinmi Faraónqa carcelpita Joséta jinan höra jipiyämunanpä mandarqan. Carcelpita jipiskiyaptinnami Joséqa aqtsanta rutukuskir y shapranta jichkakuskir alli latsapata jatikuskir Faraón kaqman aywarqan. 15 Chaykuptinnami Faraón nirqan: “Manami pipis tantiyayta kamäpakuntsu suëñunqä imapä kanqantapis. Qampämi wiyashqä suëñukuna imapä kanqantapis tantiyanqaykita”.
16 Tsaynö niptinmi José nirqan: “Noqaqa manami kikilläpitatsu tantiyä runapa suëñunkuna imapä kanqanta. Tayta Dios tantiyatsimaptinrämi suëñunqayki imapä kanqantapis willashayki”.
17 Josétanami Faraón nirqan: “Suëñuynïchömi Nilo mayu kuchuncho ichiraykashqä. 18 Tsaycho kaykaptïmi qanchis kuyayllapä wera wäkakuna mayupita yarqaskamur ututukuna chawpincho qewata mikuykäyashqa. 19 Tsaypa qepantanami melanaypä qanchis uyu wäkakuna yarqayämushqa. Tsay niraq wäkakunataqa imaypis manami kay Egiptucho rikashqätsu. 20 Tsay melanaypä uyu wäkakunami ñöpata yarqamuq kuyayllapä wera wäkakunata mikuyashqa. 21 Wera wäkakunata mikurpis manami uyu wäkakuna werayäyashqatsu. Tsayta suëñuykanqächömi rikchaskamurqä.
22 “Tsaypita yapay punukaskirmi suëñushqä juk yurallapita qanchis espïga trïgukuna wiñaykämuqta. Tsay espïgakunami kuyayllapä gränuyuq kayashqa. 23 Qepantanami wiñayämushqa pasha pashalla espïgayuq trïgukuna. Tsaynö kashqa rupay yarqamunan kaqläpita shamuq wayra rupashqa kaptinmi. 24 Tsay pasha pashalla espïgakunami ñöpata alli wiñamuq trïgu espïgakunata mikuyashqa. Tsay suëñunqäkunatami willashqä llapan suerti qatiqkunata. Manami mayqanpis tantiyantsu suëñuynï imapä kanqantapis”.
25 Faraón tsaynö willaptinmi José nirqan: “Taytay, suëñuynikicho rikanqaykiqa ishkanpis tsay yarpayllami. Tayta Diosmi imata rurananpä kaqtapis rikatsishushqayki. 26 Qanchis wera wäkakuna y qanchis kuyayllapä wiñamuq trïgu espïgakunami qanchis watakuna kaykäyan. Ishkanpis tsay yarpayllami kayan. 27 Tsaynöllami wera wäkakunapa qepanta yarqamuq melanaypä uyu wäkakuna y wayrawan pasha pashalla wiñamuq trïgukunapis qanchis watakuna kaykäyan. Tsaykunata suëñushqayki qanchis watakuna muchuy kananpämi. 28 Ninqänöllami llapanpis kanqa. Tayta Diosmi suëñuynikicho musyatsishushqayki cosëchachöpis muchuychöpis kanantsikpä kanqanta.
29 “Qanchis watami kay Egiptucho qoriytapis mana atipaypä mikuy wayunqa. 30 Tsaypita qanchis watami pasaypa muchuy kanqa. Tsaymi alli cosëcha kananpä kanqanta manana yarpar muchuywan runakuna ñakayanqa. 31 Tsaytsika mikuyta qoriyanqanpis chipyaqmi ushakanqa. 32 Tayta Dios tsaynö rurananpä wallkallanami pishiykan. Tsayta rasunpaypa cumplinanpämi ishkay kuti suëñuynikicho revelashushqayki.
33 “Tayta Faraón, tsaynö kananpä kaykaptinqa tantiyakuq y yachaq runata churay kay nacioncho trïguta qoritsinanpä. 34 Tsaynölla gobernadorkunata churay kay nacioncho maytsay markamanpis trïgu qoriq aywayänanpä. Paykuna qoritsiyämutsun pitsqa arröbapita juk arröbata churatsiyänanpä. Qanchis wata alli cosëcha kanqanyaq tsaynölla qoritsiyätsun. 35 Markakunacho tsaynö qoritsitsun qampa munaynikichöna kananpä. Tsaymi muchuy witsan runakuna mikuyänanpä kanqa. 36 Tsaynöpami qanchis wata muchuy kaptin kay Egiptucho trïgu kanqa runakuna mallaqaypita mana wanuyänanpä”.
Gobernador kananpä Joséta churanqan
37 José yätsinqantami Faraón y mandashiqninkunapis cäsukuyarqan. 38 Faraónnami nirqan: “¿Mayllachöqa tarishuntsurä kay chölutanö Tayta Dios yanapaptin alli yarpayyuqta?”
39 Tsaynö nirmi Joséta nirqan: “Tayta Diosmi tantiyatsishushqayki suëñunqäkuna imapä kanqantapis. Manami pipis kantsu qampita mas tantiyakuq y yachaq runaqa. 40 Kananpitaqa qampa makikichömi llapan palaciüpis kanqa.† Ninqaykikunatami kay nacioncho llapan runakuna rurayanqa. Noqallami rey kar qampita mas munayyuq kaykä. 41 Qamtami churä llapan Egipto nacionpa gobernadornin kanaykipä”.
42 Tsaynö nirmi Faraónqa sëlluyuq sortïjanta makinpita jipiskir Joséta jatitsirqan. Yanapaqninkunatanami mandarqan lïnupita rurashqa fïnu latsapata jatirkatsir qoripita rurashqa wallqata wallqatsiyänanpä. 43 Tsaypitanami Joséta witsätsirqan Faraónpa qepanta aywaq carrëtaman.a Tsaynöllami yanapaqninkunata mandarqan puntanta aywar niyänanpä: “¡Qonqurikuyay! ¡Gobernadornintsikmi shamuykan!”
Tsaynöpami Egiptucho gobernador kananpä Joséta churarqan. 44 Nirkurnami Joséta Faraón nirqan: “Egiptucho noqalla mandaq kaptïpis qam mana niptikiqa manami pipis imatapis ruranqatsu”.
45 Nirkurnami Josépa jutinta Faraón trukatsirqan Zafnat-panea nir. Tsaypitanami On markapa sacerdötin Potiferapa tsurin Asenatwan tätsirqan. Tsaynöpami Joséqa Egiptucho gobernador karqan. 46 Kimsa chunka (30) watayuq kaykaptinmi Joséta Faraón kaqman apayarqan. Tsaypitanami entëru Egiptupa Joséqa markan markan purirqan runakuna kamarikuyänanpä yätsirnin.
47 Qanchis watami entëru Egiptucho qoriytapis mana atipayanqanyaq trïgu wayurqan. 48 Tsaymi qanchis wata maytsay markakunacho trïguta José qoritsirqan. Qoritsinqan trïgutami cada markacho churatsirqan. 49 Lamar kuchuncho aqushatanörämi tsaytsika trïguta José qoritsirqan. Alläpa atska kaptinmi tupuyarqannatsu.
50 Manarä muchuy qallaptinmi Josépa ishkay tsurinkuna warmin Asenatcho yurirqan. 51 Mayor tsurin yuriptinmi José nirqan: “Castäkunata y llapan ñakanqäkunata mana yarparänäpämi Tayta Dios yanapamashqa”. Tsaymi jutinta churarqan Manasésb kananpä.
52 Tapshi tsurin yuriptinmi José nirqan: “Alläpa ñakanqä nacioncho kaykaptïpis tsurïkuna kayänanpämi Tayta Dios kamakätsishqa”. Tsaymi jutinta churarqan Efraínc kananpä.
53 Qanchis watami qoriytapis mana atipaypä Egiptucho mikuy wayurqan. 54 Tsaypitanami José ninqannölla maytsay nacionchöpis muchuy qallaykurqan.† Egiptuchömi itsanqa runakuna rantiyänanpä José churatsinqan tsaytsika mikuy karqan. 55 Egiptucho runakunapa mikuyninkuna ushakaptinmi Faraónman trïguta mañakuq aywayarqan. Tsaynö aywayaptinmi Faraón nirqan: “Trïguta munarqa Joséman aywar pay niyäshunqaykita rurayay”.