Ishkay runakuna suëñuyanqanta José tantiyatsinqan
40
Tsaypitanami vïnu ruraqkunapa y tanta ruraqkunapa mandaqninkuna mana allita rurar 2 Egipto nacionpa mandaqnin rey Faraónta rabyatsiyarqan. 3 Tsaymi wardiakunapa capitanninpa wayincho kaykaq carcelman prësu apatsirqan. Tsay carcelchömi Josépis wichqaraykarqan. 4 Wardiakunapa capitanninnami tsay ishkan runakunata Josépa munayninman churarqan. Tsay runakunami atska killa carcelcho wichqaräyarqan.5 Juk paqasmi vïnu ruraqkunapa y tanta ruraqkunapa mandaqninkuna suëñuyarqan imapis päsananpä kanqanta. 6 Tutalla paykunata watukaq aywarmi llakishqa kaykäyaqta José tarirqan. 7 Tsaymi tapurqan: “¿Imanirtä llakishqa kaykäyanki?” nir.
8 Paykunanami niyarqan: “Mana allitami suëñuyashqä. Manami pipis kantsu imapä suëñuyanqätapis tantiyatsiyämänanpä”.
Josénami nirqan: “Tsay suëñuyanqayki imapä kanqantapis Tayta Diosllami tantiyatsimäshun. Imata suëñuyanqaykitapis kanan willayämay”.
9 Tsaynö niptinmi vïnu ruraqkunapa mandaqnin willar nirqan: “Suëñuynïchömi juk üva jacha 10 kimsa raprayuq kaykaqta rikashqä. Tsay raprakuna sheqllimur tukturmi poqushqa üvakunaman tikrashqa. 11 Tsay poqushqa üvata Faraónpa väsun aptaraykanqäman qapiskirmi Faraónta makyashqä”.
12 Josénami nirqan: “Suëñuynikicho kimsa raprakunata rikanqaykiqa kimsa junaqmi kaykan. 13 Kananpita kimsa junaqtami kay carcelpita Faraón jipiskatsishurniki puntata arunqaykiman kutitsishunki. Tsaymi väsuwan vïnuta yapay sirvinki. 14 Ninqänölla arunqaykiman kutir noqatapis yarpaykallämanki. Tayta Faraónta rugakuykullanki kaypita jipimänanpä. 15 Hebreo runakuna täyanqanpitami imayka suwaqnö kay markaman apayämashqa. Jutsaynaq kaykarmi kaycho wichqaraykä”.
16 Allipä suëñunqanta willaptinmi tanta ruraqkunapa mandaqninpis Joséta willar nirqan: “Suëñuynïchömi janay janay kimsa taksha canastakunacho tantakunata umächo puriykätsinä kä. 17 Janan kaq canastachömi tukuy niraq mishkiq tantakuna Faraón mikunanpä kanä. Tsay tantakunatami pishqukuna shamur mikur ushayashqa”.
18 Tsaynö willaptinmi paytapis José nirqan: “Suëñuynikicho kimsa taksha canastakuna rikanqaykiqa kimsa junaqmi kaykan. 19 Kananpita kimsa junaqtami umaykita roquskatsir qeruman Faraón warkutsishuptiki ayaykita wiskurkuna mikuyanqa”.
20 Tsaypita kimsa junaqtami santunta Faraón rurar tsaycho mandashiqninkunata inkitarqan mikuyänanpä y upuyänanpä. Tsay junaqmi carcelpita jipitsimurqan tanta ruraqkunapa y vïnu ruraqkunapa mandaqninkunata. 21 Vïnu ruraqkunapa mandaqnintami yapay churarqan puntata arunqanman. Tsaymi väsuwan vïnuta Faraónta yapay makyarqan. 22 Tsaynö kaptinpis tanta ruraqkunapa mandaqnintami itsanqa José willanqannölla wanuskatsir ayanta qeruman warkutsirqan. 23 Vïnu ruraqkunapa mandaqninqa José rugakunqanta manami yarparqannatsu.