Joséwan Potifarpa warmin punuyta munanqan
39
Ismaelita negociantikuna Egiptuman Joséta chaskatsiyaptinmi Potifar rantirqan. Potifarqa Faraónpa wardiankunapa capitanninmi karqan.2 Tayta Dios paywan kaptinmi† José ruranqankunaqa llapanpis alli karqan. Tsaynöpis patronninpa wayinchömi tarqan. 3 Tayta Dios yanapanqanta tantiyarmi 4 patronnin pasaypa kuyar Joséta churarqan wayincho mandaq kananpä y llapan imaykankunatapis rikananpä. 5 Tsay junaqpitami Potifarta Tayta Dios yanaparqan. Tsaymi imaykankunapis atskayarqan y mikuyninpis shumaq wayurqan. 6 Josépa makinman llapan imaykantapis churaykur Potifarqa manami yarpachakurqannatsu.
Joséqa kuyayllapä buen mözumi karqan. 7 Tsaymi Potifarpa warminqa Joséwan kakuyta munar nirqan: “¡Noqawan kakushun!”
8 Tsaynö niptinmi José nirqan: “Mamïta, tsaytaqa manami ruraykushwantsu. Patronnï yärakamarmi llapanta rikanäpä churamashqa. Tsaymi llapantapis shumaq rikaptï tranquïlu purikun. 9 Patronnïqa manami pitapis noqatanöqa yärakuntsu. Qamllatami warmin kaptiki makïman churamushqatsu. Tsaynö yärakaykämaptinqa ¿imanöparä Tayta Diosta ajätsir jutsata rurayküman?”
10 José tsaynö niptinpis tsay warmiqa qoyay qoyaymi qatiraq. Tsaynö qatiraptinpis Joséqa mana cäsurmi paywan kakuyta munarqantsu. 11 Juk kutichönami Joséqa rurayninkunata rurananpä wayiman yaykurqan. Tsay höra manami pipis wayicho karqantsu. 12 Tsaymi latsapanpita Joséta tsariskir Potifarpa warmin nirqan: “¡Kanan juklla punushun!”
Tsaynö tsariskiptinmi latsapanta jipiriykur qeshpir aywakurqan.
13 Latsapanta jipiriykur qeshpiskiptinmi 14 Potifarpa warmin wätayninkunata qayaykur nirqan: “¡Runä apamunqan chölu manami respitamantsiktsu! Noqa kaykanqä kaqman yaykaykamur fuerzamayta munaptinmi pasaypa qayarashqä. 15 Tsaymi latsapanta kachariykur qeshpishqa”.
16 Tsaynö willaskirmi Josépa latsapanta runan kutimunqanyaq churarqan. 17 Runan chaykuptinnami wätayninkunata willanqannölla nirqan: “Tsay rantimunqayki hebreo chölu cuartüman yaykaykamurmi fuerzamayta munashqa. 18 Llapan kallpäwan qayaraptïmi latsapanta jaqiskir qeshpishqa. 19 Llapan imaykaykita rikananpä churanqayki wätaynikimi tsaynö ruramashqa”.
Warmin tsaynö willaptinmi Potifarqa pasaypa ajanarqan. 20 Tsaymi Faraónpa wätayninkuna wichqaräyanqan carcelman Joséta wichqatsirqan.
21 Joséta Tayta Dios yanapaptinmi† cárcel cuidaqwanpis yachanänakuyarqan. 22 Tsaymi llapan prësukunata Josépa makinman carcelcho mandaq churarqan. Josérämi prësukuna imata rurayänanpäpis mandaq. 23 Tayta Dios yanapaptinmi José ruranqan llapanpis alli karqan. Tsaymi cárcel cuidaq runaqa Josépa makincho kaq prësukunapä yarpachakuqnatsu.