Tamar qeshyakunqan
38
Tsay witsanmi wawqinkunawan taykanqanpita Hirapa wayinman Judá aywakurqan. Hiraqa Adulam markapitami karqan. 2 Tsaycho tarmi Súa jutiyuq cananeo runapa tsurin jipashwan reqinakuskir täkurqan. 3 Tsay jipash qeshyaq rikakurmi ollqu wamrata qeshyakurqan. Wawanpa jutintami churarqan Er jutin kananpä. 4 Tsaypita yapay ollqu wamrata qeshyakurmi jutinta churarqan Onán jutin kananpä. 5 Tsaypita yapaypis juk ollqu wamrata qeshyakurmi jutinta churarqan Sela jutin kananpä. Quezibcho Judá taykaptinmi tsay tsurinkuna yuriyarqan.6 Mayor tsurin Ertami Judá tätsirqan Tamar jutiyuq jipashwan. 7 Erqa mana alli runa karmi Tayta Dios munanqannötsu kawarqan. Tsaynö mana cäsukunqanpitami Tayta Dios wanutsirqan.
8 Tsaymi qepa kaq tsurin Onánta Judá nirqan: “Hïju, wawqikipa viüdanwan täkuy paycho tsuriki yuriptin wawqikipa tsurinnö kananpä”.†
9 Onánqa musyarqan tsurin yurirpis wawqinpa tsurinnö kananpä kanqantami. Tsaymi llumtsuynin viüdawan pununqan höra ruraykanqancho jipiskir jukläman juturatsiq. Tsaynö rurarqan wawqinpa tsurinnö kananta mana munarmi. 10 Tsaynö Onán ruraptinmi Tayta Dios pasaypa rabyarnin paytapis wanutsirqan.
11 Ishkan tsurinkuna tsaynö wanuskiyaptinnami Judáqa yarparqan tsurin Selapis Tamarwan tarnin wanunanpä kanqanta. Tsaymi Tamarta nirqan: “Tsurï Sela chöluyanqanyaq taytaykipa wayincho viüdalla täkuy”.
Tsaynö niptinmi taytanpa wayinman Tamar kutikurqan.
12 Tsaypita atska wata päsaskiptinnami Judápa warmin wanurqan. Tsay warmiqa Súapa tsurinmi karqan. Warminta lütur cumpliskirnami Timnatcho üshankunapa millwanta rutuykäyanqan kaqman Judá aywarqan. Paytami Adulam markapita reqinakunqan Hira wallkirqan.
13 Timnatman millwa rutuq suegrun aywaykanqantami Tamar musyaskirqan. 14 Tsaymi lütunqan latsapata trukakuskir pipis mana reqinanpä vëluwan tsapakuskir Enaim marka yaykunaman jamakuykurqan. Tsayqa Timnatman aywana nänichömi karqan. Tamarqa tsaynö rurarqan Sela chöluna kaykaptinpis suegrun mana tätsiptinmi.
15 Qaqllan tsapashqa warmi jamaraykaqta rikaykurmi Judá yarparqan prostitüta warmi kanqanta. 16 Tsaymi nänipa aywaykar parlapänanpä yaqarqan. Llumtsuynin kanqanta mana musyarmi nirqan: “¿Manatsurä punurkushwan, mamïta?”
Niptinnami nirqan: “Punushqaqa ¿imatatä pägamanki?”
17 Judánami nirqan: “Juk malta cabratami apatsimushä”.
Warminami nirqan: “Rasunpaypa apatsimänayki kaptinqa imallaykitapis prendata jaqipämay”.
18 Tsaynö niptinnami Judá nirqan: “¿Imata jaqipänätatä munanki?”
Warminami nirqan: “Watuntin sëlluykita y aptaraykanqayki tukruykita jaqipämay”.
Tsaynö niptinmi prendata jaqipaykur paywan punurqan. Tsaypitami Tamarqa qeshyaq rikakurqan. 19 Nirkurnami wayinman Tamar kutiykur jatiranqan vëlunta jipikuskir qachqa latsapanta yapay jatikurqan.
20 Judánami amïgun Hirawan malta cabrata apatsirqan prenda jaqimunqankunata qorimunanpä. Cabrata apakurkur aywar tsay warmita manami tarirqannatsu. 21 Tsaymi tsay markacho taq runakunata tapukur nirqan: “Taytakuna, tapukulläshayki. Kay Enaim markaman yaykunacho jamaraq prostitüta warmita ¿manaku rikayällashqayki?”
Tsaynö tapukuptinmi tsaycho taq runakuna niyarqan: “Kaychöqa manami ima prostitütatapis rikayashqätsu”.
22 Runakuna tsaynö niyaptinmi Judá kaqman kutiykur willarqan: “Manami tsay warmita tarishqätsu. Tsaycho taq runakunami niyämashqa imaypis prostitüta warmi tsaycho mana kanqanta”.
23 Tsaymi Judá nirqan: “Mana tarishqa kaykaptikiqa imanäshuntä. Yapay ashishqaqa runakunami asipämäshun. Prenda jaqipamunqäkunata jina apakutsunpis”.
24 Tsaypita kimsa killa päsaskiptinnami runakuna shamur Judáta willayarqan: “¡Llumtsuyniki Tamarqa piwanpis kakushqami kanqa! ¡Tsaymi kanan qeshyaq kaykan!”
Judánami pasaypa rabyar nirqan: “¡Tsay niraq warmitaqa wayinpita jipiskir rupatsiyay!”
25 Wanutsiyänanpä apaykäyaptinmi suegrun Judáman Tamar willakatsir nirqan: “Kay prenda jaqipämaq runapatami qeshyaq kaykä. Reqiyay watuntin sëllu y tukru pipa kanqantapis”.
26 Tsayta rikaykurmi kikinpa kanqanta reqiskir Judá nirqan: “Payqa manami jutsayuqtsu. Noqami jutsayuq kaykä tsurï Selawan mana tätsinqäpita”.
Tsay junaqpitaqa Judá mananami llumtsuyninwan imaypis punuyarqannatsu.
27 Killan tinkuskiptinnami Tamar qeshyakurqan millishta. 28 Qeshyakur ñakaykaptinmi jukaq wamrapa makin yarqamurqan. Tsaynö yarqamuptinmi partëraqa puka jïluwan wataskir nirqan: “Kay kaqmi mayor kaykan”.
29 Tsaynö kaptinpis jinan hörami makinta kutiskatsirqan. Tsaypita wawqin puntata yuriskiptinnami partëra nirqan: “¿Kayqa imanöparä jukaqta llallimushqa?”