37
Taytan tanqan Canaánllachömi Jacob tarqan.José suëñunqankuna
2 Kaychömi qellqaraykan Jacobpä y tsurinkunapäpis. Chunka qanchis watayuq José kaykarmi taytanpa üshanta y cabranta mitsirqan Bilhapa y Zilpapa wawan kaq wawqinkunawan. Bilhawan Zilpaqa taytanpa wätay warminkunami kayarqan. Joséqa taytantami imaypis willaq wawqinkuna mana allikunata rurayanqanta.
3 Awkinyaynincho tsurin José yurishqa kaptinmi Israelqaa wakin tsurinkunapitapis payta mas kuyarqan. Tsaymi kuyayllapä allinnin tünicata ruraparqan. 4 Joséta taytan mas kuyaptinmi wawqinkuna pasaypa chikirnin ajashqalla parlapäyaqpis.
5 Juk kutichömi wawqinkunata suëñunqanta José willarqan. Tsaymi wawqinkuna masrä chikiyarqan. 6 Willarmi nirqan: “Suëñunqäta willayäshayki. 7 Suëñuynïchömi chakracho trïguta liyakuykashqantsik. Liyakuykanqä tersumi kikillan ichikurkushqa. Qamkunapa tersuykikunami ichiraykaq tersüman tumaypa witiykur imayka adoraqnö umpuraykäyashqa”.
8 Tsaynö suëñunqanta willaptinmi wawqinkuna masrä chikir niyarqan: “Tsaynö nirqa ¿mandayämaq kaytaku yarpaykanki? ¿Munaynikicho tsararäyämänaykipä kanqantaku yarpaykanki?”
9 Tsaypita yapay suëñunqanta wawqinkunata willarmi José nirqan: “Suëñuynïchömi rikashqä rupaypis, killapis y chunka juk qoyllurkunapis noqaman umpuraykäyämuqta”.
10 Tsay suëñunqanta taytanta y wawqinkunata willaptinmi Joséta taytan ollqutupar nirqan: “¿Imata yarpartä tsaynö willayämanki? ¿Noqapis mamaykipis wawqikikunapis qamman qonqurikayämunäpä kanqantaku yarpanki?”
11 Tsaynö willaptinmi wawqinkunaqa masrä chikiyarqan.† Taytannami yarpachakur nirqan: “¿Imapärä tsurï tsaynö suëñushqa?”
Joséta wawqinkuna rantikuyanqan
12 Juk kutimi Josépa wawqinkuna Siquem partiman aywayarqan taytanpa üshankunata y cabrankunata mitsiyänanpä. 13 Tsaymi Joséta taytan Israel nirqan: “Siquemchömi üshantsikta wawqikikuna mitsiykäyämun. Imanö kaykäyanqantapis musyanäpä aywar watukaskamuy”.
Tsaynö niptinmi José nirqan: “Aywä, papä”.
14 Tsaymi taytan nirqan: “Wawqikikuna y uywantsikkuna imanö kaykäyanqantapis shumaq rikapakaskamur ras kutimunki willamänaykipä”.
Tsaynö nirmi Hebrón pampapita Israelqa Joséta kacharqan Siquem jirkakunaman. 15 Tsaymi Siquem partiman chaykur wawqinkunata ashir pantakashqa purirqan. Tsaynö puriykarmi juk runawan tinkuskirqan. Tsaymi Joséta tapurqan: “¿Imatatä ashiykanki?” nir.
16 Tsaynö tapuptinmi José nirqan: “Wawqïkunatami ashiykä. ¿Manaku rikallashqayki maycho mitsikuykäyaqtapis?”
17 Tsaymi nirqan: “Paykunaqa kaypita aywakuyashqanami. ‘Dotánläpa aywakushun’ nir willanakuykaqtami wiyashqä”.
Tsaypita José aywarmi wawqinkunata Dotáncho tarirqan.
18 Karullatarä José aywaykämuqta rikaskirmi wanutsiyänanpä wawqinkuna willanakuyarqan. 19 Tsaymi jukninpis jukninpis niyarqan: “¡Taqä suëñupäkuq chölu shamuykan! 20 Juklla wanuskatsir pözuman jitarpushun. Nirkur taytantsikta nishun: ‘Josétaqa chucaru uywakunami mikuyashqa’. Tsaynö ruraskishqa mä suëñunqannökush kanqa”.
21 Tsaynö willanakuyanqanta wiyaykurmi wawqin Rubénqa imanöpapis salvayta munar nirqan: “Ama wanutsishuntsu. 22 Wawqintsikpa yawarninta jichanantsikpa trokinqa kay tsunyaq jirkacho kaykaq pözuman jitarpushun. Ama kikintsikqa wanutsishuntsu”.
Rubénqa tsaynö nirqan Joséta imaykanöpapis kawaykaqta taytanman kutitsiyta munarmi.
23 Wawqinkuna kaqman José chaykuptinnami kuyayllapä tünicanta jipiskatsir 24 tsaki pözuman jitarpuyarqan. 25 Nirkurnami mikuyänanpä jamaskiyarqan. Mikuykäyanqanchönami rikaskiyarqan atskaq ismaelita runakuna shamuykäyaqta. Paykunami Egiptucho rantikuyänanpä camëllunkunawan Galaadpita apaykäyarqan perfümikunata, balsamuta y mïrrata.
26 Tsaymi wawqinkunata Judá nirqan: “Wawqintsikta wanuskatsir mana musyaq tukunqantsikwan ¿imatatä jipishun? 27 Wanutsinantsikpa trokinqa taqay ismaelita negociantikunata rantikuskishun. Jinapis payqa wawqintsik karmi yawarnintsik kaykan”.
Judá tsaynö niptinmi wawqinkuna “allimi kanman” niyarqan.
28 Madiánpita ismaelita negociantikuna päsaqkunatami pözupita Joséta jipiskamur ishkay chunka (20) siclob qellaycho rantikuyarqan.† Tsaynöpami Joséta Egiptuman apakuyarqan.
29 Pözuman Rubén kutir Joséta mana tarirmi pasaypa llakikurnin latsapantapis rachirirqan. 30 Tsaypitami wawqinkuna kaqman aywaykur nirqan: “¡Pözuman jitarpunqantsik chölu manami kannatsu! Kanan ¿imatatä rurashä?”
31 Tsaymi cabrata pishtaskir Josépa tünicanta yawarwan pichuskir 32 taytanman apatsiyarqan. Apaqtami yätsiyarqan willar ninanpä: “Tsunyaq jirkachömi kay tünicata tariyashqä. Papä, tsurikipa tünican kanqanta o mana kanqantapis shumaq reqiy”.
33 Chaykur willaptinmi tsurinpa tünicanta reqiskir Jacob nirqan: “¡Kayqa tsurïpa tünicanmi! ¡Jirkacho chucaru uywakunachi Josétaqa mikuyashqa!”
34 Tsaymi llakikurnin latsapanta rachir qachqa latsapatana jatikurqan. Tsurin wanunqanta mana qonqarmi pasaypa waqar purirqan. 35 Tsurinkuna warmipis ollqupis shoqayaptinmi masrä waqar nirqan: “Wanur paywan tinkunqäyaqmi tsurïtaqa lütushä”.
36 Madianita negociantikuna Egiptuman Joséta chaykatsirmi Faraónpa wardiankunapa capitannin Potifarman rantikuyarqan.