3 Tsaynö niptinmi Josépa chunka wawqinkuna Egiptuman trïgu rantiq aywayarqan. 4 Tsaymi Josépa wawqin Benjamín aywananta taytan mana munar nirqan: “Tsurïtaqa imapis päsaykunmanchi”.

5 Tsaynöpami Israelpa^a tsurinkuna trïgu rantiqkunawan wallkinakur Egiptuman chäyarqan. Llapan Canaánchömi pasaypa muchuy karqan.

6 Egipto nacionpa gobernadornin karmi llapan nacionpita trïgu rantiq aywaqkunata José rantikuq. Tsaymi Josépa wawqinkuna trïgu rantiq chaykur urkunkunapis patsaman töpanqanyaq ñöpanman qonqurikuyarqan. 7 Wawqinkunata rikaykurmi José reqiskirqan. Reqiykarpis mana reqiq tukurmi ajashqa parlapar nirqan: “¿Maypitatä shayämushqayki?”

Tsaynö tapuptinmi niyarqan: “Taytay, noqakunaqa Canaánpitami trïgu rantiq shayämushqä”.

8 José reqiptinpis wawqinkunaqa manami reqiyarqantsu. 9 Tsay hörami José yarpaskirqan paykunapä imanö suëñunqantapis.^† Tsaymi nirqan: “Qamkunaqa kay nacionman maypa yaykayämunaykipä kaqtapis rikapakuqmi shayämushqayki”.

10 Tsaynami niyarqan: “¡Manami, taytay! Noqakunaqa trïgu rantiqllami shayämushqä. 11 Noqakunaqa llapäpis juk taytallapitami kaykäyä. Manami imaypis runapa markanta rikapakur puriyätsu”.

12 Tsaynö niyaptinmi José nirqan: “Qamkunaqa llullakuykäyankimi. Rasunpaypami kay nación imanö kanqantapis rikapakuq shayämushqayki”.

13 Tsaymi paykuna niyarqan: “Noqakunaqa chunka ishkay wawqimi juk taytallapita kayä. Llapäkunapis Canaánchömi taykäyä. Qepa kaq wawqillämi taytäwan quëdamushqa y jukaq wawqïnami illakashqa”.

14 Tsaynö niyaptinnami José nirqan: “Ninqänöpis qamkunaqa rasunpaypami marka imanö kanqantapis rikapakuq shayämushqayki. 15 Kananmi musyashä rasun kaqta parlayanqaykita o llullakuyanqaykita. Faraónpa jutincho jurarmi nï: ‘Manami mayqaykipis kaypita aywayankitsu tapshi wawqikita kayman manarä pushamurqa. 16 Mayqaykikunapis kutiyay tapshi wawqikita pushayämunaykipä. Wakikinami prësu quëdayanki. Qepa wawqikita mana chätsimurqa rasunpaypami marka rikapakuq kaykäyanki’. Faraónpa jutincho jurarmi nï”.

17 Tsaynö nirmi carcelcho kimsa junaq paykunata José wichqarätsirqan.

18 Kimsa junaqtanami José nirqan: “Tayta Diospitami mantsapakü. Tsaymi mandanqäkunata rurayaptikiqa wanutsiyäshaykitsu. 19 Rasunpaypa mana rikapakuq karqa juk wawqikikunata prësu jaqiykur castaykikuna mikuyänanpä trïguta apakurkur aywakuyay. 20 Nirkur tapshi wawqikita pushakurkur kutiyämunki. Tsaynöpami musyashä niyanqayki rasunpaypa kanqanta. Mana chätsimurqa wanuyankimi”.

José tsaynö niptinmi paykuna awniyarqan.

21 Nirkurnami kikinkunapura parlar ninakuyarqan: “Wawqintsikta mana kuyapanqantsikpitami ñakaykantsik. Kachaykunapä rugakaykämashqapis manami kuyaparqantsiktsu”.

22 Tsaynö niyaptinmi Rubén nirqan: “Noqaqa nirqämi tsay wawqintsikta imatapis mana rurayänaykipä.^† Tsaynö nikaptïpis qamkunaqa manami cäsukayämarqaykitsu. Kananqa paypa maldicionninwanmi noqantsikpis ñakaykantsik”.

23 Egipto runakunapa idiömancho José parlapaptinmi juk runarä wawqinkunata tantiyatsirqan. Tsaymi musyayarqantsu paykuna parlayanqanta José tantiyaykanqanta. 24 Josénami wawqinkunapita jukläman aywaykur waqarqan. Waqanqanpita kutiykurnami yapay parlaparqan. Simeónta akraskirnami paykunapa ñöpancho watatsirqan.

25 Tsaypitanami wätayninta mandarqan costalninkunaman trïguta wiñapänanpä. Tsaynöllami mandarqan trïgupa chanin qellayta costalninkunaman wiñapänanpä y mirkapatapis qepipänanpä. José ninqannöllami llapanta rurarqan. 26 Tsaymi ashnunkunaman trïguta chaqnakurkur aywakuyarqan.

27 Kutiykäyanqancho tsakäpakuskirmi patsakuyanqancho ashnunkunata trïguta qarayänanpä costalta juknin kichaskir qellaynin kaykaqta tarirqan. 28 Tsaymi wawqinkunata nirqan: “¡Kayrächi kayllaqa! ¿Imatarä rurashä? ¡Päganqä qellaytami costalnïman jatipaykamashqa!”

Tsaynö niptinmi llapan mantsakar tsuktsukyarrä jukninpis jukninpis niyarqan: “¿Imaykamannatä Tayta Dios jitarpamashqantsik?”

29 Canaánman chaykurnami Egiptucho ima päsanqantapis taytanta willar niyarqan: 30 “Egipto nacionpa mandaqninmi ollqutupäyämashqa tsay nación imanö kanqanta rikapakuq aywayanqäta yarpar. 31 Tsaynö niyämaptinmi noqakuna niyashqä alli runa kayanqäta y imaypis mana rikapakuq kayanqäta. 32 Tsaynöllami willayashqä chunka ishkay wawqi juk taytallapita kayanqäta y juk wawqïkuna illakashqa kanqanta y tapshi kaqna qamwan quëdanqanta.

33 “Tsaymi niyämashqa: ‘Rasun kaqta parlayanqaykita musyanäpä juk wawqikita prësu jaqiykur castaykikuna mikuyänanpä trïguta apakurkur wakinnikikuna kutiyay. 34 Qepa wawqikita chätsiyämuptikirämi musyashä rikapakuq mana kayanqaykita. Tsayrämi wawqikita prësu tsararanqäpita kachäshä. Tsaynöpami kay nacionman kutiyämuptikipis ni ima niyäshunkinatsu’ ”.

35 Tsaynö willaskir trïguta jäkatsipakuykarmi tariyarqan cada costalcho pägayanqan qellayninkuna bolsacho kaykaqta. Tsaynö tariykurmi kikinkunapis taytanpis pasaypa mantsakäyarqan. 36 Jacobnami nirqan: “Qamkunaqa tsurïkunata ushaskiyankinachä. Kananqa Josépis ni Simeónpis manami kannatsu. Kananqa ¿Benjamíntanaku pushayta munaykäyanki? Tsaynö kaptin noqapäqa vïdapis vïdanatäku”.

37 Tsaynö niptinmi Rubén nirqan: “Papä, Benjamínta pusharqa kikïmi kutitsimushä. Payta mana kutitsimuptïqa ishkan tsurïkunata wanuratsinki”.

38 Jacobnami nirqan: “Tsurïta manami kachapäyäshaykitsu. Wawqin José wanukushqa kaptinmi japallanna tsay mamapita kaykan. Aywaykäyaptiki imapis päsaptin ¿imatarä rurayanki? Tsaynö kaptinqa qamkunapa cuentaykipämi llakikuypita wanushä”.