3 Judánami nirqan: “Egiptucho trïguta rantikuq runami niyämarqan: ‘Tapshi wawqikita mana pushamurqa ama ni rikanämanpis yuriyämunkitsu’. 4 Wawqï Benjamín noqakunawan aywaptinqa trïgu rantiq aywayäshämi. 5 Mana kachapäyämaptikiqa wallällami aywayäshä. Ninqänöpis tsay mandaq runami niyämarqan: ‘Tapshi wawqikita mana pushamurqa ñöpämanpis ama shayämunkitsu’ ”.

6 Tsaymi Israel^a nirqan: “Llakikuyman churamarnin ¿imanirtä tsay runata willayarqayki tapshi wawqikikuna kanqanta?”

7 Paykunanami niyarqan: “Tsay runaqa mayqan casta kanqantsiktapis musyayta munarmi tapuyämarqan: ‘¿Taytaykikuna kawanräku? ¿Maspis wawqiki kanräku?’ Tsaynö tapuyämaptinmi noqakunaqa rasun kaqta willayarqä. ¿Imanöparä musyayäman karqan ‘wawqikita pushamuy’ niyämänanpä kanqanta?”

8 Tsaymi taytanta Judá nirqan: “Papä, mallaqaypita mana wanunantsikpä noqakunawan Benjamín aywatsun. Noqami imapitapis payta cuidashä. Aywananpä awniptikiqa jukllami aywayäshä. Tsaynöpami wamrantsikkunapis ni noqantsikpis mallaqaypita wanushuntsu. 9 Wamraykita imapis päsaptinqa noqami cuentayuq kashä. Payta mana kutitsimuptïqa wanunqäyaqpis ama perdonamankitsu. 10 Egiptupita chaykamur wamraykita pushayänäpä willayanqäpita awniptikiqa maynami ishkay kutipis kutiyämüman karqan”.

11 Tsaynö niptinmi taytan nirqan: “Tsaynö kaptinqa ¿imatanatä rurashunpis, hïju? Egiptucho mandaqta qarayänaykipä wallka wallkallatapis allinnin kaqkunata apayay: balsamuta, abëjapa mishkinta, perfümita, mïrrata, nueciskunata y almendraskunata. 12 Qellaytapis ñöpata kutitsiyämushunqaykitawan yapay apayay. Chaykullar kutitsiyämunqayki qellayta entregayanki. Capazchi pantar costalnikikunaman wiñayämurqan. 13 Qepa wawqikita pushakurkur tsay mandaq runa kaqman juklla aywayay. 14 Dios El-Shaddai^b tsay mandaq runata tantiyaykatsitsun kuyapäyäshurniki Simeónta y Benjamínta kachapaykayämushunaykipä. Llapan tsurïkunata oqranäpä kaptinqa jina tsaynöchi kanqa”.

15 Jacob yätsiptinmi mandaq runata qarayänanpä kamarikuyarqan. Nirkurnami qellayta apakurkur y wawqin Benjamínta pushakurkur Egiptuman aywayarqan. Chaykurnami Josépa despächunman yaykuyarqan. 16 Benjamínta wawqinkunawan kaykaqta rikaykurmi wayincho mas yärakunqan sirvientinta José nirqan: “Kay runakunata wayïman pushay. Paykunawan mikuyänäpä wäkata pishtay”.

17 Tsaynö niptinmi wätaynin Josépa wayinman pusharqan. 18 Tsaynö pushaptinmi pasaypa mantsakar kikinkunapura parlar niyarqan: “Punta shamunqantsikcho qellaynintsikta kutitsimanqantsikpitami yachayllapa pushaykämantsik. Kananqa maqa maqarkurchi wätaynin kanantsikpä ashnuntinta tsararämäshun”.

19 Josépa wayinman chaykurmi sirvientita rugakur niyarqan: 20 “Taytay, musyanqaykinöpis ñöpatami trïgu rantiq shayämurqä. 21 Kaypita kutir patsakuyanqächo cargäkunata paskapakurmi costalnïkunapa shimincho pägayanqä qellaynïkunata tariyashqä. Trïgupita pägayanqä qellaymi llapan kaykänä. Tsay qellaytami entregayänäpä kutitsiyämushqä. 22 Tsay jananmanmi qellayta apayämushqä trïguta yapay rantiyänäpä. Manami musyayätsu punta kaq qellayta costalnïkunaman pï wiñapäyämanqantapis”.

23 Tsaynö niyaptinmi sirvienti nirqan: “Tsaypita ama llakikuyaytsu ni mantsakäyaytsu. Taytayki yärakunqan y qamkuna yärakuyanqayki Diosmi costalnikikunaman tsay qellayta churashqa kanqa. Pägayämanqayki qellaytaqa llapantami chaskirqä”.

Nirkurnami Simeónta carcelpita jipiskamur tsay sirvienti runa wawqinkuna kaqman pusharqan. 24 Josépa wayinman chaykatsirnami chakinkunata mayllakuyänanpä yakuta makyarqan. Tsaynöllami ashnunkunatapis qewata qararqan. 25 Tsaypitanami Josépa wawqinkuna musyayarqan paykunawan José almorzananpä kanqanta. Tsaymi apayanqankunata qarayänanpä kamarikuyarqan.

26 Wayinman José chaykuptinnami paypä apayanqanta entregar qonqurikuyarqan urkunkunapis patsaman töpanqanyaq. 27 Tsaymi imanö kaykäyanqanta tapur José nirqan: “Ñöpata shamurmi willayämarqayki taytaykikuna awkinna kanqanta. ¿Imanötä payqa kaykan? ¿Kawaykanräku?”

28 Tsaynö tapuptinmi llapan qonqurikuykur niyarqan: “Taytay, taytäkunaqa allillami kaykan. Payqa kawaykanrämi”.

29 Paykunata rikapaykanqanchömi José rikaskirqan wawqin Benjamínta. Benjamínwan Joséqa tsay mamallapita y tsay taytallapitami kayarqan. Wawqinkunata tapurmi nirqan: “¿Payku kaykan ‘tapshi wawqï kanmi’ niyämanqayki?”

Tsaynö tapuskirnami Benjamínta José nirqan: “¡Hïju, Tayta Dios yanapaykulläshuy!”

30 Wawqinta rikaskir shonqun ishkiptinmi cuartunman aywaykur José waqarqan. 31 Waqayta ushaskir qaqllanta awikuskirnami yarqamurqan. Nirkurnami wätayninkunata nirqan: “Mikuyta qarakayämuyna”.

32 Tsaymi juk mësaman Joséta qarayarqan, juk mësaman wawqinkunata y juk mësamanna tsaycho mikuq Egipto runakunata. Paykunata tsaynö qarayarqan Egipto runakunawan hebreo runakuna juntu mikur penqakuyaptinmi. 33 Mikuyänanpänami wawqinkunata José jamatsirqan mayorpita qallaykur qepayaq. Tsaynö jamatsiptinmi paykuna rikapänakurnin ni imanö kaytapis kamäpakuyarqantsu. 34 Joséqa kikinpä qarayanqan mikuytami wawqinkuna mikuyänanpä yapaparqan. Wakin wawqinkunata qaranqanpita mastami Benjamínta qararqan. Tsay junaqmi kushishqa llapan wawqinkunawan José mikurqan y upurqan.