José ninqannöllami tsay sirvienti llapantapis rurarqan.

3 Patsa waraskiptinnami wawqinkunata José despacharqan. Tsaymi ashnunkunaman chaqnakur aywakuyarqan. 4 Manarä karuta aywayaptinmi mas yärakunqan sirvientinta kachar José nirqan: “Ayway tsay trïgu rantiq runakunapa qepanta. Taripaykur ninki: ‘Patronnï qamkunawan alli kaykaptin ¿imanirtä qellaypita rurashqa cöpanta suwayämushqayki? 5 Tsay cöpaqa kaykan patronnï upunanpä y adivinananpämi. Tsayta suwamur mana allitami rurayashqayki’ ”.

6 Patronnin ninqannölla aywar runakunata taripaykur niptinmi 7 paykuna niyarqan: “¿Imanirtä tsaynö tumpayämanki? Tsaytaqa manami ruraykuyämantsu. 8 Costalnïkunapa shimincho tariyanqä qellaytapis Canaánpita kutiykätsimurqa ¿imanöpatä patronnikipa wayinpita qellayninta ni qorintapis suwayämüman karqan? 9 Mayqäkunapa costalnïkunachöpis cöpata tariptikiqa wanutsishqa katsun. Wakinnïpis patronnikipa wätayninmi kayäshä”.

10 Tsaymi mas yärakunqan sirvienti nirqan: “Niyanqaykinö katsun. Mayqaykipis cöpa tsararaq kaqllami wätaynï kananpä quëdanqa. Wakinnikiqa markaykikunamanmi kutikuyanki”.

11 Tsaynö niptinmi jinan höra chaqnakuyninkunata paskaskir jukninpis jukninpis costalninkunapa shiminta kichayarqan. 12 Mayor kaqpa costalninpita tapshi kaqpa costalninyaq ashirmi Benjamínpa costalnincho cöpata tarirqan. 13 Tsaymi pasaypa mantsakar latsapankunatapis rachiyarqan. Tsayllapitanami jinan höra ashnunkunata chaqnakurkur José kaykanqan markaman kutiyarqan. 14 Wawqinkunawan Judá kutirmi Joséta wayillanchörä tariskir pasaypa mantsakashqa ñöpanman lätakaykuyarqan.

15 Paykunatami José nirqan: “¿Imanirtä suwakuyashqayki? ¿Manaku musyayanki adivïnu kar imatapis musyanqäta?”

16 Tsaymi Judá nirqan: “Taytay, manami ima niytapis kamäpakuyätsu. Jutsata rurayanqätami^a Tayta Dios rikayämashqa. Kananqa cöpaykita tsararaqnintin llapäkunachi wätayniki kayäshä”.

17 Josénami nirqan: “Llapaykiqa manami wätaynï kayankimantsu. Cöpata suwaq kaqllami wätaynï kanqa. Wakinnikiqa taytayki kaqman kutikuyay”.

18 Tsaynö niptinmi Josépa ñöpanman witiykur Judá nirqan: “Taytay, qamqa kikin Faraónnö mandaqmi kaykanki. Rugakuptï mana rabyakuyllapa wiyaykallämay. 19 Ñöpata shayämuptïmi tapuyämarqayki taytä kawanqanta y maspis wawqï kanqanta. 20 Tsaynö tapuyämaptikimi willayarqä taytä kawanqanta y awkinna kaykaptin tsurin yuriqpis chölullarä kanqanta. Tsaynöpis willayarqä tsay mamapita jukaq wawqï wanushqana kanqanta y tapshi kaqllana kawaptin taytä pasaypa kuyanqanta. 21 Qammi niyämarqayki tapshi wawqïkunata reqinaykipä pushayämunäpä. 22 Tsaymi niyarqä tsay tsurinta apayämuptïqa taytä llakikuypita wanunanpä kanqanta. 23 Tsaynö willayaptïmi niyämarqayki: ‘Payta mana pushayämuptikiqa manami chaskiyäshaykitsu’.

24 “Tsaymi taytä kaqman kutiykur llapan niyämanqaykita willayarqä. 25 Tsaypitanami taytä yapay niyämarqan trïgu rantiq kutiyämunäpä. 26 Noqakunanami niyarqä: ‘Manami kutiyäshätsu tapshi kaq wawqïta mana pusharqa. Payta mana pushayaptïqa tsay mandaq runa manami chaskiyämanqatsu’. 27 Tsaynö niyaptïmi taytä niyämarqan: ‘Qamkuna musyayankimi tsay mamapita ishkay tsurï kayanqanta. 28 Jukaq tsurï yarqunqanpita manami rikänatsu. Rasunpaypami chucaru uywakuna mikushqa kanqa. 29 Tapshi tsurïta pushayaptiki imapis päsaptinqa qamkunami jutsayuq kayanki llakikuypita wanunäpä’ ”.

30 Tsaynö niskirmi Judá nirqan: “Kay tsurintami taytä pasaypa kuyan. Payta mana kutitsiyaptïqa 31 llakikuyllapitami wanunqa. Tsaynö wanunanpä noqakunami jutsayuq kayäshä. 32 Noqami taytäta awnirqä imaykanöpapis tsurinta kutitsinäpä. Tsaynöllami nirqä payta mana kutitsirqa wanunqäyaqpis jutsayuq kanäpä kanqanta. 33 Taytay, tsaymi rugakü tapshi wawqïpa trokin wätayniki quëdakunäpä. Payqa wawqïkunawan taytä kaqman kutikutsun. 34 Tapshi wawqï mana kutiptinqa ¿imanörä taytä kaqman kutïman? Taytä kuyapaypä llakikunanta manami munätsu”.