Israel runakuna jutsata rurayanqanpita Tayta Dios ajananqan
4
Israel runakuna, Tayta Dios niyäshunqaykita wiyakuyay.Paymi jutsata rurayanqaykipita acusaykäyäshunki.
Tsaymi niyäshunki: “Qamkunaqa awniyämanqaykita manami cumpliykäyankitsu, kuyanakuyankitsu ni reqiyämankitsu.
2 Jutïcho awnirkurpis manami cumpliykäyankitsu.
Tsaynöpis llullakuykäyanki, runa mayikikunata wanuykätsiyanki, suwakuykäyanki y jukpa warminwanpis punuykäyankimi.
Wanutsinakurpis manami ajayäyankitsu.
3 Tsaynö kayaptikimi Israelcho taqkuna pasaypa llakikurnin ima ruraytapis kamäpakuyantsu.
Jirka uywakunapis, pishqukunapis y pescädukunapis wanurmi ushakaykäyan”.
Sacerdötikuna jutsata rurayanqan
4 Sacerdötikunatami Tayta Dios nin:
“Qamkunami jutsayuq kaykäyanki Israel runakuna llutan rurayman uman churakashqa kayänanpä.
Tsaynö kaykarqa pitapis ama jitapäyaytsu.
5 Jutsayuq kayanqaykipitaqa imay hörapis illaqpitami castigashayki.
Qamkunatanölla llullakuq profëtakunatapis castigarmi nacionnikikunata ushakätsishä.
6 Yachatsikuq kaykar mandamientükunata mana yachatsiyanqaykipitami† kuyanqä runakuna ushakäyanqa.
Kikikikunapis manami yachatsikuynïkunata chaskikuyankitsu.
Mana chaskikuyanqaykipitami sacerdöti kaykäyanqaykipita qarquyäshayki.
Leynïkunata mana cumpliyanqaykipitami qamkunapita aywaraqkunatapis yanapashänatsu.
7 “Qamkuna atskaqman mirayaptikipis runakunaqa masmi jutsata ruraykäyan.
Tsaymi respitashqa kayänaykipä churashqa kaykarpis pasaypa penqakuyman churayäshayki.
8 Jutsata rurayanqanpita uywata sacrificiupä apayämuptinmi kushikuykäyanki.
Sacrificiu aytsata chaskiyänaykipä kanqanta musyarmi runakuna mas jutsata rurayänanta munaykäyanki.†
9 Wakin runakuna jutsata rurayanqannöllami qamkunapis jutsata ruraykäyanki.
Tsaymi qamkunatapis wakin runakunatanölla castigayäshayki.
10 Mana cäsukayämanqaykipitami mikuyänaykipä tariyaptikipis pacha junta mikuyänaykipä aypanqatsu.
Juk dioskunaman yärakurpis manami ima bendiciontapis tariyankitsu”.
Israel runakuna ïdulukunata adorayanqan
11 “Prostitüta warmiwan kakur y upyaman churakarmi juiciuntapis runakuna oqrayan.
12 ¡Tsaymi qerupita rurashqa ïdulukunata tapukuykäyan!
¡Taksha qeruwanmi suertita rikar tapukuykäyan!
Ïdulukunaman umankuna churakashqa karmi llutanta rurar kawaykäyan.
Warminta runa jaqirir juk warmiwan tanqannömi noqatapis mana cäsukamar juk dioskunaman yärakuykäyan.
13 Jirkancho kaykaq altarkunacho sacrificiutapis rupatsirmi juk dioskunata inciensiuwan qoshniykätsiyan.
Roble, álamo y encina jachakuna chakincho llantuy alli kaptinmi tsay jachakuna kaqcho tsaynö ruraykäyan.
“Israel runakuna, ïdulukunata adorayänanpä warmi tsurikikuna y llumtsuynikikuna qamkunapitami yachakuykäyan.
Ïdulukunata adorarmi altarkuna kanqancho runanta qanratar jutsata ruraykäyan.a
14 Qamkunapis tsaynöllami juk dioskunapä sacrificiuta rupatsir altarkunacho jukwan jukwan kakuq warmikunawan kakuykäyanki.
Warmi tsurikikunata y llumtsuynikikunata tsaynö kayänanpä churayanqaykipita paykunata castiganäpa trokinqa qamkunatami castigayäshayki.
Mana tantiyakuq kayanqaykipitami llapayki ushakäyanki.†
15 “Judá runakuna, paqtä qamkunapis Israel runakunanö mana cäsukamar ïdulukunata adorayankiman.
Tsaynö karqa Gilgalmanpis ni Bet-avénmanpisb adoraq ama aywayaytsu.
Ïdulukunaman yärakuykarqa jutïtapis ama joqariyaytsu.†
16 “Israel runakunaqa chucaru wäkanö mana cäsukuqmi kaykäyan.
Tsaynö kaykäyaptinqa ¿imanörä washki üshata alli qewacho mitsiqnö bendicionnïta paykunaman churäman?
17 Efraín runakunaqac ïdulukunatami adoraykäyan.
Tsaynölla karqa ¡imanöpis kakuyätsun!
18 Paykunaqa upyallaman churakashqami kaykäyan.
Altarkunacho kaykaq prostitüta warmikunamanmi imaypis aywaykäyan.
Autoridäninkunapis jutsata rurarmi penqakuypä kaykäyan.
19 Tsaynö kayanqanpitami päjata shukukuy apaqnö castigar maytsaymanpis qarqushä.
Juk dioskunaman yärakuyanqanpis wallällami kanqa”.