Israel runakunata castigananpä ninqan
5
“Sacerdötikuna, ninqäta shumaq wiyakuyay.Israel mayor runakuna, ninqäta shumaq tantiyakuyay.
Mandaq rey, qampis castaykikunapis ninqäta shumaq cäsukuyay.
Mana cäsukayämanqaykipitami juzgashayki.
Runakunata ishkitsiyänaykipä waskata churapaqnömi Mizpacho kayashqayki.
Tabor jirkachöpis mällanömi kayashqayki.
2 Sitim partichöpis runakunata imayka pözuman jitarpuqnömi kaykäyanki.
Tsaynö kayanqaykipitami llapaykita castigayäshayki.
3 Israel runakuna, musyämi imanö kayanqaykitapis.
Runanta warmi jaqirir jukwan kakuqnömi qamkunapis juk dioskunamanna yärakuykäyanki.
Tsaynöpami pasaypa penqakuypä kaykäyanki.
4 Llutankunaman umayki churakashqa karmi perdonta mañakamaytapis yarpäyankitsu.
Manami ichikllapis reqiyämankitsu”.
5 Israel runakuna runa tukuyanqanqa willakuykan mana alli kayanqantami.
Paykuna jutsayuq karmi castigashqa kayanqa.
Judá runakunapis tsaynöllami jutsata rurayanqanpita ushakäyanqa.
6 Üshankunata y wäkankunata sacrificiupä rupatsir Tayta Diosta ashirpis manami tariyanqatsu.
Tayta Diosqa paykunapita witikushqanami.
7 Tayta Diosllaman imaypis yärakuyänanpä awnirpis manami cumpliykäyantsu.
Tsurinkunapis jäpa dioskunamannami yärakuykäyan.
Jutsayuq kayanqanpitami juk killallacho ushakäyanqa.
Herenciankunatapis jäpa runakunami duëñu tukuyanqa.
8 Guërra qallaykunanpä Gabaacho waqrata tukayay.
Ramáchöpis kamarikuyänanpä cornëtata tukayay.
Bet-avénchöpis maya mayalla kayänanpä willakuyay.
Benjamín trïbu runakunatapis maya mayalla kayänanpä musyatsiyay.
9 Tayta Dios castiganan junaqmi Efraín runakuna ushakätsishqa kayanqa.a
Rasunpa tsaynö päsananpä kanqantaqa llapan trïbu Israel runakunatami willaykä.
10 Tayta Diosmi nin:
“Judá runakunapa autoridäninkunaqa jukpa lindërunta qechuqnömi kaykäyan.†
Tsaynö kayanqanpita ajarmi jakashqa mayunö paykunata ushakätsishä.
11 Efraín runakunaqa ïdulukunata adorayanqanpita pasaypami ñakayanqa.
12 Millwata puyu ushanqannömi Efraín runakunata ushakätsishä.
Judá runakunatapis qeruta puyu ushaqnömi ushakätsishä.
13 “Efraín runakunaqa qeshyaykaq runanömi kaykäyan.
Judá runakunapis pasaypa maqashqa runanömi kaykäyan.
Tsaynö kaykäyanqanta tantiyaskirmi Asiria nacionpa mandaqnin reyman aywaykur Efraín runakuna mañakuyashqa yanapananpä.†
Mañakuyaptinpis tsay reyqa qeshyaqta alliyätsiyta ni jampiyta mana puëdiqnömi yanapayta kamäpakushqatsu.
14 Ima uywatapis tsariskir león ushanqannömi Efraín runakunata y Judá runakunata ushakätsishä.
Ushakätsiptï manami pipis salvanqatsu.
Tsaynö ushakaskatsirmi aywakushä.
15 Tänäman kutiskirmi täkushä jutsayuq kayanqanta tantiyakur perdonta mañakayämanqanyaq.
Paykunaqa pasaypa llakikurrämi ashiyämanqa”.