Warminwan Oseas amistanqan
3
Tayta Diosmi yapay nimarqan: “Warmiki juk runawan qanrataykäshuptikipis paywan amistay. Tsaynöpami Israel runakuna tantiyakuyanqa runanta qanrataq warminö kayaptinpis paykunata imaypis kuyanqäta. Paykunataqa juk dioskunata adorar päsasyuq biscöchuta kushishqa mikuyaptinpis kuyämi”.2 Tsaynö nimaptinmi warmïta qorinäpä pägarqä chunka pitsqa siclo qellayta† y kimsa pachak kimsa chunka (330) kïlu cebädata. 3 Qoriskirnami nirqä: “Kananpitaqa noqallapanami warmï kanki. Juk runawanqa mananami kakunkinatsu. Noqawan amistashqa karpis manami oqllanakushunrätsu, atska junaq päsaskiptinrämi punushun”.
4 Tsaynömi Israel runakunapapis atska watayaq kanqatsu mandaqnin rey ni autoridäninkunapis. Manami Tayta Diospä sacrificiutapis rupatsiyanqatsu ni juk diosta adorar wankatapis ichïtsiyanqatsu. Manami ni sacerdötikunapis ni wayinkunacho ïdulunkunapis kanqanatsu. 5 Tsaypitarämi Israel runakuna perdonta mañakur Tayta Diosta ashiyanqa. Tsaynöllami David casta mandaqnin reyta cäsukuyanqa. Shamuq watakunachömi Tayta Diospita mantsapakur bendicionninkunata kushishqa chaskiyanqa.