2
(3) Tsaymi ollqu kaqkunata niyanki: ‘Tayta Diospami’.Warmi kaqkunatanami niyanki: ‘Tayta Dios kuyapanqankuna’ ”.
Israel nación runakunata prostitütaman tinkutsinqan
2 (4) Tayta Diosmi Israel runakunata nin:
“Mamaykikunata mana kuyapaypa qayapäyay.
Kananpitaqa manami warmïnatsu kanqa.
Noqapis manami runannatsu kashä.
Noqawan amistayta munarqa prostitüta kayninta kacharitsun.
Makallaranqan waynantapis jaqiritsun.a
3 (5) “Mana jaqiriptinqa penqakunanpämi qarapachaskir mama wachayllata jaqirishä.†
Pasaypa tsunyaqmanmi tikratsishä.
Usyawan castigaptïmi yakunaypita wanunqa.
4 (6) Qamkunatapis wachapakuy kayaptikimib kuyayäshaykinatsu.
5 (7) Mamaykiqa penqakuypä prostitüta karmi nirqan:
‘Waynäkunaman aywashä.
Paykunapitami tarï mikuyta, yakuta, millwata, lïnuta, aceitita y upyanäpä kaqkunatapis’.†
6 (8) “Mamayki tsaynö kanqanpitami purinan nänikunatapis kashakunawan tsapashä.c
Nänipis mana aywaränanpämi tumaypa qenchashä.
7 (9) Pasaypa löcayayparämi waynankunata ashinqa.
Mana tariykurmi yarpachakur ninqa:
‘Amistakushä punta kaq runäwan.d
Paywanqa allimi kawakurqä’.
8 (10) “Tsaynö nikarpis mamaykiqa manami cuentata qokuntsu trïguta, vïnuta y aceititapis kamaripanqäta.
Noqami qellaytapis qoritapis kamariparqä.
Tsaynö kaptinpis tsay qellaytawan qoritami aparqan Baalta adorar.
9 (11) Tsaymi kananqa trïgu achuypäna kaykaptinpis qorikushä.
Tsayrä rurashqa vïnutapis kutitsikushä.
Latsapanta rurananpä kamaripanqä millwatapis lïnutapis qorikushä.
10 (12) “Kananqa waynankuna rikaykaptinmi penqakuypä qarapachashä.
Makïpitaqa manami imanöpapis qeshpinqatsu.
11 (13) Fiestankunata rurar kushikuyanqanpis ushakanqami.
Manami llullu killa fiestatapis ni jamay junaqtapis ni wakin fiestakunatapis ruranqanatsu.†
12 (14) Payqa nikan üva chakrankunata y hïgus jachankunata waynankuna qarayanqantami.
Tsay üva chakrankunata y hïgus jachankunata ushakätsishämi.
Pasaypa muntiyaptinmi munti uywakuna tsaycho mikuyanqa.
13 (15) Tsaynö rurashä Baal diosninkunata inciensiuwan qoshnitsinqanpitami.
Payqa qonqaskamarmi wallqankunata y sortïjankunata jatikuskir waynankunaman aywaykan”.
Tayta Diosmi tsaynö nin.
Israel runakunata qorinanpä Tayta Dios ninqan
14 (16) “Tsaynö kaptinpis noqawan yapay kuyanakunanpämi tsunyaq jirkaman pushaykur alli shimilläpa parlapäshä.
15 (17) Üva chakrankunatapis kutitsishämi.
Acor Pampata† bendición punku kananpämi tikratsishä.e
Tsaymi yapay cäsukamanqa jipash kar Egiptupita jipimunqä junaq cäsukamanqannö”.
16 (18) Tayta Diosmi nin: “Tsay witsanmi ‘Tayta Baal’ nimänaykipa trokinqa ‘qammi majä kanki’ nimanki.f
17 (19) Baalpa jutinkunata mananami imaypis joqarinkinatsu.
18 (20) Tsay witsanmi mana atacashunaykipä pactuta rurashä chucaru uywakunawan, pajaqkunawan y qarachaypa y lätaypa puriqkunawanpis.
Espädapis, flëchapis ni guërrapis qam kaqcho manami kanqanatsu.
Añawnami punukunki.
19 (21) Noqapa warmïnami imayyaqpis kanki.
Qamwan majatsakarmi imaypis kuyashayki.
Manami yapapakuyllä warmïtsu kaykanki, tsaypa trokinqa legïtimu kaq warmïmi.
20 (22) Warmï kaptikimi imaypis jaqishaykitsu.
Kuyapäkuq Tayta Dios kanqäta tantiyarmi kuyamanki”.
21 (23) Tayta Diosmi nin: “Tsay witsanmi tamyamunanpä mañakayämaptiki ciëluta mandashä tamyatsimunanpä.
22 (24) Tamyaptinmi trïgu, üva y olïvupis alli wayunqa.
Tsaynöpami Jezreelpäg bendición kanqa.
23 (25) Muruta muruqnöpis nacionnikimanmi kutitsiyämushayki noqallatana adorayämänaykipä.
Lo-ruhamah jutiki kananpä nishqa karpis kananqa kuyayäshaykimi.
Lo-ammii jutiki kananpä nishqa karpis kananqa ‘noqapanami kayanki’ niyäshaykimi.†
Qamkunanami niyämanki: ‘Japallaykimi Diosnï kaykanki’ ”.