8
Estebanta wanutsiyaptin Saulupis kushikurqanmi.Jesúsman yärakuqkunata Saulo qatikachanqan
Tsay junaqpitanami Jesúsman yärakuqkunata Jerusaléncho qatikachar qallaykuyarqan. Judeapa y Samariapa qeshpir aywakuyaptinmi apostolkunallana Jerusaléncho quëdayarqan. 2 Tayta Dios munanqannö kawaqkunami Estebanpa ayanta pasaypa llakikur pampayarqan. 3 Saulunami Jesúsman yärakuqkunata wayin wayin ashir tarinqan kaqta warmitapis ollqutapis carcelman wichqatsirqan.†
Samariacho Felipe willakunqan
4 Jerusalénpita qeshpiqkunami maytsaychöpis alli willakuyta willakuyarqan. 5 Tsaynöllami Felipipis Samaria markaman chaykur Jesús salvamaqnintsik Cristo kanqanta willakurqan. 6 Tsaychömi milagrukunata ruranqanta rikar y parlanqanta wiyar llapan runakuna kushikuyarqan. 7 Runakunapita supaykunata qarquptinmi qayararrä yarquyarqan. Tsaynöllami atskaq weqrukunatapis y puriyta mana puëdiq runakunatapis alliyätsirqan. 8 Tsaynö ruraptinmi tsay markacho taqkuna pasaypa kushikuyarqan.
9 Tsay markachömi Simón jutiyuq juk brüju karqan. Paymi “noqaqa yachaqmi kä” nir Samaria runakunata unaypitana criyitsirqan. 10 Simón ninqankunata wiyarmi muchuqkunapis imaykayuqkunapis niyaq: “¡Kay runataqa Tayta Diosmi yanapaykan!”
11 Simónqa brüju karmi unaypita patsa mägicawan runakunata engañaq.
12 Tsaynö kaptinpis Tayta Diospa mandakuyninpa alli willakuyninpä y Jesucristupä Felipe willakuptinnami ollqupis warmipis criyir bautizakuyarqan. 13 Tsaymi kikin Simónpis criyikur bautizakuskir Felipe maypa aywaptinpis paywan purirqan. Señalkunataa y milagrukunata ruranqanta rikarmi Simón pasaypa espantakurqan.
14 Samariacho Diospa willakuyninta runakuna chaskiyanqanta musyarmi Jerusaléncho kaykaq apostolkuna Pedrutawan Juanta tsayman kachayarqan. 15 Chaykurmi Samaria runakunapis Espíritu Santuta chaskiyänanpä Tayta Diosta mañakuyarqan. 16 Jesúspa jutincho bautizakushqa kaykarpis Espíritu Santuta manarämi mayqanpis chaskishqarätsu kayarqan. 17 Tsaymi paykunapa umankunaman makinkunata churaykur mañakuyaptin Espíritu Santuta chaskiyarqan.
18 Tsayta rikarmi Simónqa apostolkunata pägayta munar 19 nirqan: “Tsay munaynikikunata rantikaykamay noqapis runakunapa umanman makïta churaptï Espíritu Santuta chaskiyänanpä”.
20 Tsaynö niptinmi Pedro nirqan: “¿Imanirtä Tayta Dios qaranqan Espíritu Santu rantina kanqanta yarpaykanki? ¡Tsaynö yarpanqaykipitami qellayniki infiernuman apashunki! 21 Qamqa shonquykicho mana allitami yarpaykanki. Tsaynö kaykarqa manami noqakuna rurayanqäman jatikämunkimantsu. 22 Llutan yarpanqaykikunata kacharir perdonashunaykipä Tayta Diosta mañakuy. Mañakuptiki capaz perdonashunkimanpis. 23 Jutsa ruraypa munaynincho kanqayki y envidiösu kanqaykimi reqishqa kaykan”.
24 Tsaynö niptinmi Simón rugakur nirqan: “Ninqaykikuna mana päsamänanpä Tayta Diosta mañakuykuyällay”.
25 Tayta Diospa willakuyninta tsaycho willakuskirnami Pedruwan Juan Jerusalénman kutir Samariacho kaykaq wakin markakunachöpis willakuyarqan.
Etiopía runa Jesúsman criyinqan
26 Tsaypitanami Tayta Diospa angelnin Felipita nirqan: “Sur kaqläpa yarqur Jerusalénpita Gaza markaman aywaq nänipa ayway. Tsay nänimi tsunyaq jirkapa päsaykan”.
27 Tsaymi Felipiqa tsay nänipa aywar Etiopía nacionpita juk eunucu runata rikarqan. Paymi Etiopía nacioncho reina Candacipa tesorërun karqan. Tayta Diosta adoraq Jerusalénman aywanqanpita 28 kutirmi carrëtanman jamaykur profëta Isaías qellqanqan libruta liyiraykar aywarqan. 29 Tsaymi Felipita Espíritu Santu nirqan: “Taqay carrëtawan aywaykaq runaman witipay”.
30 Ninqannö witirmi profëta Isaías qellqanqan libruta liyiykaqta wiyarqan. Tsaymi tapurqan: “Tsay liyiykanqaykita ¿tantiyankiku?”
31 Etiopía runanami nirqan: “Pipis mana tantiyatsimaptinqa ¿imanöparä tantiyashä?”
Nirkurmi Felipita rugakurqan carrëtaman witsarkur ñöpanman jamananpä.
32 Tayta Diospa palabranta liyiykanqanmi nirqan:
“Üshata pishtananpä apaqnömi payta apayarqan.
Millwanta rutuyaptin üsha wiyaräkunqannömi upällalla wiyaräkurqan.
Tsaynö upälla kakurmi ni juk shimillapis parlakurqantsu.
33 Manakaqman churayaptinpis manami janan pipis shärirqantsu.
Payta wanutsiyaptin tsurinpis manami karqantsu”.†
34 Eunucunami Felipita nirqan: “Taytay, tantiyaykatsillämay. Profëta Isaías ¿pipätä kayta qellqarqan? ¿Kikinpäku o jukpäku?”
35 Tsaymi liyinqanta tantiyatsir Jesúspa alli willakuyninta Felipe willarqan. 36 Tsaypita aywaykäyanqancho yaku kaqman chaykurmi tsay eunucu nirqan: “Kaycho yaku kaykaptinqa ¿manatsurä bautizaykamankiman?”
37 [Felipinami nirqan: “Llapan shonquykiwan criyiptikiqa bautizashayki”.
Tsaymi nirqan: “Jesucristo Tayta Diospa Tsurin kanqanta rasunpaypami criyï”.]
38 Tsaymi carrëtanta ichiykatsir yakuman uräyarqan. Tsaychömi eunucuta Felipe bautizarqan. 39 Yakupita yarqaskayämuptinmi Señor Jesucristupa Espïritun Felipita jukläpa aparqan. Payta mana rikarpis eunucuqa kushishqami aywakurqan. 40 Felipinami Azoto markachöna rikakuskir Jesúspa alli willakuyninta willakur markan markan purirqan. Tsaynö willakurmi Cesarea markamanpis charqan.