7
y mana alli kawayanqanpita jampiyta munarpisEfraín y Samaria runakunaa jutsata rurayanqallantami rikä.
Llapankunapis llullakur yachakashqami kaykäyan.
Suwakuyänanpä yachakashqa karmi wayikunatapis suwakuykäyan.
Cällikunachöpis runakunapa imantapis qechuykäyan.
2 Manami tantiyayantsu jutsankunatapis yarparaykanqäta.
Imaypis jutsata ruraykaqllatami rikaykä”.
Reykunata yanapaqninkuna wanutsiyanqan
3 “Jutsata rurayaptinpis reyqa kushikunmi.
Llullakuyaptinpis reypa yanapaqninkuna asikuyanmi.
4 Tsay yanapaqninkunaqa imayka mäsa jakanqanyaq wayllash jornu achanqannömi kaykäyan.
Tsaynö achachäpakurmi warminkunata qanratar llapanpis chïnäkur puriykäyan.
5 “Fiestata rey ruraptinmi autoridäkunaqa reytapis machanqanyaq upyatsiyan.
Machaskirmi reyqa tsay machätsiq runakunata churan yanapaqninkuna kayänanpä.
6 Nirkurmi tsay yanapaqninkuna shonqunkunacho yarpachakuyan reypa contran shäriyänanpä.
Tsaymi reypa contran willanakur waraskiyanpis.
7 Paykunaqa jornucho nina imatapis rupar ushaqnömi mandaqnin reykunatapis wanutsir ushaykäyan.
Tsaynöpami reykuna qatinayllaman wanur ushakaykäyan.
Tsaynö kaptinpis manami pipis mañakamantsu yanapanäpä”.
Tayta Diosta mana cäsukur Israel runakuna imanö kayanqanpis
8 “Efraín runakunaqa mana yärakamaq nación runakunawanmi takukaykäyan.
Jukaq waqtanpa chawashqa tikrapanni tantanömi kaykäyan.
9 Tsaymi alli kawayänanpä kallpankunapis kannatsu.
Kallpankuna ushakanqantapis manami cuentata qokuyantsu.
Soquyäyanqantapis manami tantiyayantsu.b
10 “Runa tukuyanqanqa willakuykan mana alli kayanqantami.
Tayta Diosnin kaykaptïpis noqaman manami kutiyämuntsu ni ashiyämantsu.
11 Tsaymi Egipto runakuna y Asiria runakuna yanapayänanta munar mañakuykäyan.
Tsay nacionkunaman mañakuq aywar imayka paluma wakläpa kayläpa pajaqnömi kaykäyan.
12 Tsaynö aywaykaqtami mälläwan tsarishä.
Pishqukunata trampawan tsariqnömi tsarirkur jutsata rurayanqanpita castigashä.
13 “¡Allaw paykuna!
Noqapita witikushqa kaptinmi paykunata ushakätsishä.
Paykunaqa conträ shärir manami cäsukayämantsu.
Mana ushakätsinäpä perdonayta munaptïpis paykunaqa ‘cäsukushaykimi’ niskamar llullapaykäyämanmi.
14 Cämancho pasaypa waqar mañakamarpis manami llapan shonqunkunawantsu mañakayäman.
Trïguta y vïnuta kamaripänäta munar qaranta roquypa roqukur† mañakamarpis ninqäta manami cäsukayämantsu.
15 “Noqami alli kawayänanpä paykunata yachatsishqä.
Kallpayuq kayänanpäpis noqami kamashqä.
Tsaynö kaykaptinpis conträ shäriyänanpämi willanakuykäyan.
16 Munayyuq Dios kaykaptïpis manami imapäpis cuentayämantsu.
Wiksu flëcha flëchaptin jukläman aywaqnömi kaykäyan.
Autoridäninkunapis noqapä llutankunatami parlaykäyan.
Tsaymi contran soldädukunata kachashä espädawan wanutsiyänanpä.
Tsayta musyaykurmi Egiptuchöpis Israel runakunata manakaqman churar asipäyanqa”.